Әһли Бејт -АБНА- хәбәр аҝентлијинин вердији хәбәрә әсасән: Полисләр Сабирабадда үч нәфәри сахлајыб. Онлары аксија кечирмәк ҹәһдиндә иттиһам едибләр. Бу барәдә Сабирабад рајонунда фәалијјәт ҝөстәрән мүхалифәтчиләр мәлумат вериб.
Онларын сөзләринә ҝөрә, сахланан шәхсләр - Алим Әлијев, Тофиг Гулијев вә Елман Мирзәјев рајон мәдәнијјәт евинин гаршысында сахланылараг полис шөбәсинә апарылыблар.
Гејд едәк ки, дүнән КИВ-дә Сабирабадда күтләви аксијалар олаҹағы барәдә информасијалар ҝетмишди. Һәбсләрлә јанашы, рајонун мәркәзи мејданында пост-патрул хидмәти ҝүҹләндирилиб, супүскүрән машынлар ҝәтирилиб. Шәһәрин мүхтәлиф јерләриндә мүһафизә хидмәтинин ишчиләринин ҝәзмәси мүшаһидә едилир.
Сабирабадын кәндләринин сакинләри рајон мәркәзинә хүсуси јохлама илә бурахылырлар. Бу барәдә сајта Үмид Партијасынын функсионери, һазырда Сабирабадда олан Рази Абасбәјли билдириб. Онун сөзләринә ҝөрә, јаранмыш вәзијјәтә сәбәб сон заманлар рајонун Ҹавад кәнд сакинләринин кифајәт гәдәр активләшмәси олуб. О, билдириб ки, дүнән ахшам саат 8 радәләриндә Сабирабад рајон мәркәзиндәки чајханада ики нәфәр - Тофиг Зејналлы вә Заур Ағајев һәбс едилибләр. Һәбс едиләнләрдән Заур Ағајевин ҹибиндән исә рајонун Ҹавад кәнд сакинләринин шикајәт мәктубу чыхыб. Мәктубда проблемләринин һәлл едилмәјәҹәји тәгдирдә сакинләр аксијалара башлајаҹагларыны билдирибләр: “Даһа сонра исә рајонда тәшвишә дүшән иҹра һакимијјәти полисә бүтүн сијаси актив инсанларын һәбс едилмәси барәдә ҝөстәриш вериб. Сахланыланларын талеји барәдә һеч бир мәлумат алмаг мүмкүн дејил. Даһа сонра исә Саһиб Рүстәмли вә диҝәр шәхсләр дә һәбс едиләрәк полис бөлмәсинә апарылыб вә бир саатдан сонра митинг кечирмәмәклә бағлы һәдә-горху ҝәлинәрәк бурахылыб”.
Р. Абасбәјли дејиб ки, рајонда фөвгәладә вәзијјәт јараныб: “100-ә јахын полис әмәкдашыны рајона ҝәтирибләр. Хүсусилә дә Ҹавад кәндинин сакинләрини рајон мәркәзинә хүсуси јохлама илә бурахырлар. Бу да инсанларын ҹидди наразылыгларына сәбәб олур. Мәсәләнин көкү исә рајон мәркәзи илә бәзи кәндләри ајыран Күр чајы үзәриндәки көрпү проблеми илә бағлыдыр. Онларын бу проблеми илә бағлы лазыми үнванлара мүраҹиәтләр јолланыб. Дүшүнүрүк ки, даһа сивил формада проблемләрин һәллинә наил олаг. Әлбәттә ки, әҝәр јенә дә әлагәдар гурумлар вә вәзифәли шәхсләр 50 минә јахын әһалиси олан 7 кәндин әһалисинин мүраҹиәтинә мәһәл гојмаса етираз аксијалары да гачылмаз олаҹаг”.
Мәсәлә илә бағлы ачыглама верән рајон полис шөбәсинин рәис мүавини Зүлфү Исајев јајылан мәлуматларын шајиә олдуғуну дејиб. Онун сөзләринә ҝөрә, Сбирабадда һеч бир ҝәрҝинлик јохдур, һеч кәс дә һәбс едилмәјиб. Рәис мүавини һәмчинин рајона полис гүввәләринин ҹәлб едилмәсинин дә дүзҝүн олмадығыны билдриб. О, һәр ејин өз ахары илә давам етдијини вурғулајыб.
Диггәт: Хәбәрдән истифадә етдикдә мәбәјә истинад лазымдыр
