Әһли Бејт -АБНА- хәбәр аҝентлијинин вердији хәбәрә әсасән: Полис рәиси һадисәнин тәфәррүатларыны белә ачыглајыб: “Јанварын 13-дә саат 01.45 радәләриндә Низами рајону М. Әлијев күчәси 15 үнванда јерләшән “Неон” шадлыг сарајынын гаршысындакы дајанаҹагда бир нечә шәхс налајиг сөјүшләр сөјәрәк әлбәјаха олублар. Буну ҝөрән Дахили Ишләр Назирлијинин Чевик Полис Алајынын 5-ҹи патрул бөлүјүнүн әмәкдашлары онлара јахынлашыб вә сакитләшдирәрәк патрул машынына миндирмәк истәјибләр. Бу вахт ҝөзләнилмәдән онлардан бири белиндә олан бычағы чыхардараг полис әмәкдашларына һүҹум едиб. Һәмин шәхс үч нәфәр полис әмәкдашыны бычаглајараг, онлара мүхтәлиф бәдән хәсарәтләри јетириб вә һадисә јериндән гачмаға чалышыб. Һәддиндән артыг сәрхош вәзијјәтдә олан һәмин шәхс полис әмәкдашларынын ону тәгиб етдијини ҝөрүб бир нечә дәфә јыхылыб-дурараг гачмаға давам едиб вә сонда јолун кәнарындакы сәкијә илишәрәк јыхылыб. Онун башы сәкијә дәјәрәк, һушуну итириб. Әразијә јахынлашан полис әмәкдашлары ону бу вәзијјәтдә 3 нөмрәли шәһәр Клиник Хәстәханасына, полис әмәкдашларыны исә “Азәрсу” Тикинти Бирлијинин хәстәханасына апарыблар. Фактла әлагәдар дәрһал Низами рајон прокурорлуғу тәрәфиндән ҹинајәт иши башланыб, истинтаг апарылыр”.
Н. Мәһәррәмовун сөзләринә ҝөрә, сонрадан һәмин шәхсин кимлији мүәјјән едилиб. Мәлум олуб ки, бу, 1979-ҹу илдән анадан олмуш Бакы шәһәри, Сураханы рајону, Ҹапаридзе күчәси, ев 1 мәнзил 15 үнванында паспорт гејдијјатында олан Әсҝәров Елвин Имран оғлудур: “Тәрәфимиздән апарылан арашдырмалар нәтиҹәсиндә мәлум олду ки, Елвин Әсҝәров һеч бир јердә ишләмир, спиртли ичкиләрә мејллидир, гејри-сағлам һәјат тәрзи кечирир. Әввәлләр мәһкум олунмаса да, дәфәләрлә полислә проблемләри олдуғу барәдә мәлуматлар вар, идманчыдыр, ҹинајәтә мејлли шәхсдир, өзүнү һәмишә ҹинајәткар аләмдә нүфузу олан шәхс кими гәләмә вермәјә чалышыр. Өзүндән зәифләри инҹитмәк кими хүсусијјәтләрә малик олан Елвин һәр кәси өзүнә табе етдирмәк, јахуд кимләрәсә мәсләһәт вермәк кими хасијјәтә малик олуб. Јанындакылара ону “дед” дејә чағырмаға вадар едирмиш. Дәфәләрлә Русија Федерасијасында олмасы вә орада “разборкалар” апармасы барәдә гејри-рәсми мәлуматлар да әлдә етмишик. Дејиләнләрә ҝөрә, Рига шәһәринә чох ҝедиб-ҝәлиб. Орада онун дајысы јашајыр. Дајысынын Ригада ҹинајәткар аләмдә нүфузлу шәхс олмасы билдирилир. Бакы шәһәриндә стабил даирәси јохдур”.
Гејд едәк ки, мәлум һадисә јанварын 13-дә саат 02.00 радәләриндә “Неон” шадлыг сарајынын јахынлығында, Микајыл Әлијев күчәси, 15 үнванында гејдә алыныб.
ДИН-ин рәсми мәлуматына ҝөрә, ресторандан чыхан бир груп шәхс күчәдә дава едиб. Даваја мүдахилә едән Чевик Полис Алајынын әмәкдашлары Елчин Зирәддин оғлу Мүтәллимов, Зүлфүгар Әләкбәр оғлу Сүлејманов вә Сәбуһи Тағы оғлу Ағајев бычагланыблар. Јаралы полис әмәкдашлары хәстәханаја јерләшдирилибләр. Һәмин давада иштирак едән, Бакы шәһәр сакини, 1979-ҹу ил тәвәллүдлү Елвин Әсҝәров исә алдығы ағыр бәдән хәсарәтләриндән хәстәханада дүнјасыны дәјишиб. Онун полис әмәкдашлары тәрәфиндән дөјүләрәк өлдүрүлдүјү иддиа едилир. Фактла бағлы ҹинајәт иши башланыб, истинтаг апарылыр.
Диггәт: Хәбәрдән истифадә етдикдә мәнбәјә истинад лазымдыр
