Әһли Бејт -АБНА- хәбәр аҝентлијинин вердији хәбәрә әсасән: Әфганыстана гејри-һәрби саһәдә јардымлар ҝөстәрилмәси илә әлагәдар тәдбирләр чәрчивәсиндә Азәрбајҹан Милли Тәһлүкәсизлик Назирлијинин (МТН) Һејдәр Әлијев адына Академијасында нојабр ајында Әфганыстанын бир груп јүксәк рүтбәли тәһлүкәсизлик забити үчүн «Мүасир дөврдә террор тәһдидләри вә онлара гаршы мүбаризә» мөвзусунда ики һәфтәлик тәдрис курслары тәшкил едилиб. МТН-ин Иҹтимаи Әлагәләр Мәркәзиндән верилән мәлумата ҝөрә, тәлим просесиндә академијанын профессор-мүәллим һејәти вә милли тәһлүкәсизлик органларынын тәҹрүбәли әмәкдашлары тәрәфиндән мүһазирәләр охунмуш вә практики мәшғәләләр кечирилиб.
Курс мүддәтиндә Әфганыстанын тәһлүкәсизлик забитләринә Азәрбајҹан халгынын тарихи вә мәдәнијјәти, дөвләт гуруҹулуғунун инкишаф јоллары вә мүасир мәрһәләси барәдә әтрафлы мәлумат верилиб. Онлар үчүн һабелә Азәрбајҹан Тарих Музејинә, Ширваншаһлар Сарајына, Биби Һејбәт Мәсҹидинә, Бакы шәһәринин диҝәр ҝөрмәли јерләринә, Шамахы вә Ләнкәран шәһәрләринә екскурсија вә сәфәрләр тәшкил олунуб. Нојабр ајынын 30-да тәдрисин баша чатмасы илә әлагәдар курс иштиракчылары илә ҝөрүш кечирилиб. Академија рәиси ҝенерал-лејтенант Зија Јусифзадә Әфганыстанын дөвләт гуруҹулуғу үчүн ваҹиб олан тарихи мәрһәләдә әфган халгына јардым ҝөстәрилмәсинин хүсуси әһәмијјәтини гејд едиб.
Сонда Әфганыстанын тәһлүкәсизлик забитләринә тәлим-тәдрис курсларыны мүвәффәгијјәтлә битирмәләри барәдә мүвафиг сертификатлар тәгдим олунуб.
Диггәт: Хәбәрдән истифадә етдикдә мәнбәјә истинад лазымдыр
