Әһл Бејт-АБНА-хәбәр аҝентлији - Ҝүрҹүстан әразисиндән Ермәнистана ҝедән маҝистрал газ кәмәри һәр ики өлкәдә кәскин сијаси дебатлара сәбәб олуб. Хәбәр верилдији кими, Ҝүрҹүстан парламенти Ермәнистаны Русија газы илә тәмин едән газ кәмәрини өзәлләшдирилмәси гадаған едилән стратежи објектләр сијаһысындан чыхарыб.
Ардынҹа һөкумәт елан едиб ки, кәмәрин сәһмләринин бир һиссәси Лондон биржасында сатыша чыхарылаҹаг. Дәрһал белә мүбаһисәләр башлајыб ки, кәмәри Русијанын “Газпром” ширкәти ала вә Ҝүрҹүстанын марагларына зәрбә вурула биләр. Ермәнистанда исә кәмәрин Азәрбајҹанын нәзарәтинә кечә биләҹәјинә даир горху јараныб. Артыг мәлумат вар ки, кәмәри алмаға “Газпром”, Азәрбајҹан Республикасы Дөвләт Нефт Ширкәти (АРДНШ) вә Газахыстанын “Казмунајгаз” ширкәти мараг ҝөстәрир.
Мүбаһисәләри сакитләшдирмәк үчүн баш назир Ника Гилуари билдириб ки, кәмәрин нәзарәт сәһм пакетини сатмағын әлејһинәдир. О, Лондон биржасында кәмәрин сәһмләринин 10-15 фаизинин сатыла биләҹәјини дејиб. Буна бахмајараг һаким партија кәмәрин нәзарәт сәһм пакетини сатмағы гадаған едән дүзәлишин парламентдән кечмәсинә имкан вермәјиб.
Мүхалифәт исә һесаб едир ки, кәмәрин нәзарәт сәһм пакети “Газпром”ун әлинә кечә вә бунунла да Ҝүрҹүстанын милли тәһлүкәсизлији үчүн горху јарана биләр. Ән чох нараһатлыг доғуран исә одур ки, Русија ганунвериҹилијинә ҝөрә, бу өлкә хариҹдәки һәрби марагларыны горумаг үчүн ҝүҹ тәтбигини мүмкүн сајан ганунвериҹилијә маликдир. Мүхалифәтдән олан депутатлар һесаб едир ки, һөкумәт кәмәри сатыша чыхармагла Русија гаршысында капитулјасијаја ҝедир. Онлар һесаб едир ки, Ермәнистанла Русијаны бирләшдирән газ кәмәри башга һеч бир өлкә үчүн коммерсија мараглары кәсб етмир. “Газпром” әввәлләр кәмәри алмаг үчүн дәфәләрлә сәј ҝөстәриб, лакин Гәрбин истәји илә онун сатышына гадаға гојулуб.
Игтисадчылар исә дејирләр ки, газ кәмәри рентабелли дејил вә ону алмаг истәјән анҹаг сијаси мараглара сөјкәнәҹәк. Белә инвестор исә анҹаг “Газпром” ола биләр. Лакин Ермәнистанда нараһатдырлар ки, мәһз сијаси мараглардан чыхыш едәрәк кәмәри АРДНШ ала вә бунунла да Ирәвана игтисади тәсир механизми әлдә едә биләр.
Мүбаһисәләрин фонунда һөкумәт нөвбәти дәфә бәјан едиб ки, 235 километрлик кәмәрин бүтүнлүклә сатылмасындан сөһбәт ҝетмир. Билдирилир ки, кәмәрин сәһмләринин бир һиссәси јахын 2-3 илдә биржаја чыхарыла биләр, нәзарәт пакети исә дөвләтдә галаҹаг. Ејни мүбаһисәләр Ҝүрҹүстан әразисиндән Ермәнистана ҝедән дәмир јолунун мүмкүн сатышы әтрафында да ҝедир. Ермәнистан һөкумәти исә бу өлкәнин тәләбаты үчүн малларын әксәријјәтинин дашындығы Ҝүрҹүстан дәһлизи әтрафында баш верәнләрдән нараһат олараг Тифлисдән изаһат истәјир.
Ф.МӘММӘДОВ
