Әһл Бејт-АБНА-хәбәр аҝентлијинә верилән хәбәрә әсасән , Түркијә Күр чајында сујун истигамәтини дәјишдирмәји планлашдырыр. Анкаранын Ҝүрҹүстанла сәрһәддәки Әрдаһан вилајәти јахынлығында башладығы лајиһә јекунлашандан сонра, Күр чајынын Анадолу дағларындан топланан сујунун бөјүк һиссәси Ҝүрҹүстан вә Азәрбајҹандан кечмәклә Хәзәр дәнизинә дејил, бирбаша Түркијә әразисиндән Гара дәнизә ахыдылаҹаг.
Лент.аз-ын Түркијә мәтбуатына истинадән вердији мәлумата ҝөрә, артыг белә бир планын олдуғуну әтраф мүһит вә мешә назири Вејсил Әроғлу да тәсдигләјиб: “Күрүн сују Түркијәниндир. Јөнүнү истәдијимиз истигамәтә чевирә биләрик. Артыг јени су анбарынын тикинтисинә башланыб вә Күрүн һәмин анбара топланан сују Чоруһ чајына бурахылаҹаг”. Назир ону да вурғулајыб ки, бу истигамәтдәјишмәдә Түркијәнин үч өнәмли газанҹы олаҹаг: “Әкин саһәләрини суварма имканы әлдә едәҹәк, енержи истеһсал едәҹәк вә дашгынларын гаршысыны алаҹаг”.
Түркијә һөкумәтинин Күр чајынын истигамәтини дәјишдирмәк гәрары јерли һүгугшүнаслар тәрәфиндән дүзҝүн аддым сајылмајыб. Әрдаһанлы вәкил Мүзәјјән Чифтчи билдириб ки, Күр чајы үч өлкәнин әразисиндән кечир вә сују бејнәлхалг әһәмијјәт дашыјыр. Она ҝөрә дә һөкумәтин Күрүн истигамәтини дәјишмә планы бејнәлхалг сәвијјәдә дәстәк газанмајаҹаг вә бир сыра проблемләр јарадаҹаг. Диҝәр тәрәфдән, бу аддымын еколожи проблем јарадаҹағыны дүшүнән вәкил Әрдаһанда фәалијјәт ҝөстәрән бәзи еколожи тәшкилатларын һөкумәтин бу аддымына гаршы мәһкәмәјә мүраҹиәт етмәк нијјәтиндә олдугларыны дејиб.
