Әһл Бејт-АБНА-хәбәр аҝентлијинә верилән хәбәрә әсасән , “Ҹаным, атам вә анам. Мәндән сары дарыхмајын. Иншаллаһ, ҹәннәтдә ҝөрүшәҹәјик. Мәним үчүн бол-бол дуа един. Вәтәнин дар ҝүнүндә артыг үрәјим дөзмүр. Аллаһа хатир буну етмәлијәм. Ән азындан үрәјим сәринлик тапар. Шәһид оланадәк бу шәрәфсизләрин үзәринә ҝедәҹәјәм. Шәһид олсам - ағламајын. Әксинә, севинин ки, о мәртәбәјә јүксәлдим. Аллаһа ибадәтләринизи дәгиг јеринә јетирин. Чохлу сәдәгә верин. Сејид нәвәси олараг буну етмәлијәм. Аллаһ бөјүкдүр. Вәтән сағ олсун. Оғлунуз Мүбариз. Һаггынызы һалал един”.
***
Бу сөзләр ҹәбһәнин Тәртәрин Чајлы кәнди истигамәтиндә Ермәнистан силаһлы гүввәләринин һүҹумуну дәф едәркән бир нечә ермәни әсҝәрини өлдүрәрәк гәһрәманҹасына шәһид олан Милли Ордунун 22 јашлы ҝизири Мүбариз Ағакәрим оғлу Ибраһимовун валидејнләринә өлүмүндән бир ҝүн габаг јаздығы мәктубдандыр.
Шәһид гардашы Мүбаризин сөзләриндән ситат ҝәтирир. Дејир ки, Мүбариз “мән евләнмәјәҹәм, мәним јолум башгадыр”, кими сөзләр дејәрмиш.
***
Дүнән исә 10-15 јашлы ушаглар палтарларынын синәсинә Мүбаризин шәкилини вурараг рајонда јүрүш кечирибләр. Һамы онун ҹәсәдинин ермәни әсҝәрләринин әлиндә галмағындан нараһатдыр. Елә онун аиләси дә.
Һамы гәһрәман Мүбариздән данышыр. Бу иҝидә Азәрбајҹан дөвләти милли гәһрәман ады вермәлидир - о, әсил милли гәһрәман кими савашыб, бир нечә дүшмәни өлдүрүб, ҝери чәкилмәјиб вә вуруша-вуруша да шәһид олуб.
Ону унутмајаг. Јери беһишт олсун. Вәтән сағ олсун...
Елмин БӘДӘЛОВ, Бакы - Биләсувар - Бакы
