Әһл Бејт-АБНА-хәбәр аҝентлијинин хәбәринә әсасән дүнән Бакы Медиа Мәркәзиндә Јевлах рајонундан олан бир груп диндар нөвбәти мәтбуат конфрансы кечириб. Диндарлар адындан чыхыш едән Рамин Гулијев Јевлах рајонунун иҹра башчысы Јелмар Вәлијевин зүлмү илә үзләшдикләрини билдирди.
Онун сөзләринә ҝөрә, иҹра башчысы илә диндарлар арасында јаранан наразылығын әсасы өтән илин апрел ајында гојулуб: “2009-ҹү илин апрел ајында иҹра башчысы Јевлах шәһәриндә јерләшән Ҹүмә мәсҹидинин әразисини сатды. Биз диндарлар бу ганунсуз әмәлә етиразымызы билдирдик. Президент Апаратына вә шејхә мүраҹиәт етдик. Шејхин мүдахиләсиндән сонра мәсҹидин әразиси өзүнә гајтарылды. Лакин о һадисәдән сонра иҹра башчысы биздән гисас алмаға башлады”. Р. Гулијевин сөзләринә ҝөрә иҹра башчысы илк нөвбәдә диндарлара мәхсус мағазалары бағладыб: “Иҹра башчысынын ҝөстәриши илә диндарлара мәхсус дөрд дини әдәбијјат сатылан мағаза бағланды. Мәнин базарда ев әшјалары сатан јерим вар иди. Һәмин јер дә иҹра башчысынын ҝөстәриши илә гападылды. Бәзи диндарлар ајры-ајры саһибкарлардан објектләри иҹарәјә ҝөтүрәрәк ишләдирди. Иҹра башчысы објект саһибләринә тәзјигләр етмәјә башлады. Бунун нәтиҹәсиндә објект саһибләри бизимлә олан мүгавиләләрини позмаға мәҹбур олдулар. Иҹра башчысы диндарларын һамысынын сијаһысыны тутуб. Бизә ишләјиб аиләләримизи доландырмаға имкан вермир”.
Мәтбуат конфрансы заманы иҹра башчысынын диндар ханымлары да ән налајиг сөзләрлә тәһгир етдији барәдә фикирләр сәсләнди.
Р. Гулијевин сөзләринә ҝөрә 5 нәфәр диндар полис тәрәфиндән һәбс едилиб: “Полисдә бизә билдирдиләр ки, ҝуја Мир Садиг вә Мир Халиг иҹра башчысынын 1-ҹи мүавини Вагиф Абдуллајеви дөјүб. Бу бөһтан нәтиҹәсиндә ики нәфәр диндар беш ҝүн мүддәтинә һәбс едилди. Ики нәфәр ҹәримәләнди вә бир нәфәрә хәбәрдарлыг едилди” . Мәтбуат конфрансында Ј. Вәлијевин Јевлах рајонунун ахундуну да тәгиб етдијини сөјләдиләр: “Јевлах рајонунун ахунду Намиг Әлијев ејни заманда дини иҹманын рәһбәридир. Лакин иҹра башчысы ахунду да тәгиб едир. Онун ҝөстәриши илә ахунд 2500 манат ҹәримнә олунуб. Ахундун оғлу хәстәханада әмәлијјат олунаркән иҹра башчысынын ҝөстәриши илә електрик енержиси кәсилиб. 2009-ҹү илин мајында иҹра башчысынын ҝөстәриши илә евләр идарәсинин Зәфәр адлы мүдири ахунду бычагла гәтлә јетирмәк истәди. Лакин диндарлар буна имкан вермәди. Ахунд һадисә илә бағлы дөвләт гурумларына мүраҹиәт етсә дә ҝүнаһкар бу ҝүнә гәдәр ҹәзаландырылмајыб” . Мәтбуат конфрансынын сонунда диндарлар өлкә рәһбәрлијиндән көмәк истәди: “Мәтбуат васитәси илә бир даһа өлкә рәһбәрлијинә мүраҹиәт едирик. Бизим тәһлүкәсизлијимизә тәминат верин”.
Әфган МУХТАРЛЫ
