Әһл Бејт-АБНА-хәбәр аҝентлијинин хәбәринә әсасән Милли Мәҹлисин ијунун 18-дә кечириләҹәк нөвбәдәнкәнар сессијасынын ҝүндәлијиндә даһа бир сәнәд вармыш. Мәлуматлы мәнбәдән бизә чатан хәбәрә ҝөрә, “Конститусија Мәһкәмәси һаггында” гануна едиләҹәк әлавәләрдә өлкәнин ҝүндәмини дәјишдирәҹәк бир нечә мүһүм мәгам јер алыб. Сөһбәт һәрби әмәлијјатларын башлајаҹағы тәгдирдә президент вә парламент сечкиләринин тәхирә салынмасынын гануну базасынын һазырланмасындан ҝедир. Мусаватын мүраҹиәт етдији милләт вәкили Пәнаһ Һүсејн белә бир лајиһәнин Милли Мәҹлисин ҝүндәлијинә салындығыны тәсдигләди. Милли Мәҹлисин сәлаһијјәт мүддәти мәсәләси Конститусијанын 84-ҹү маддәсинин биринҹи бәндиндә әксини тапыб. Маддәдә билдирилир ки, мүһарибә шәраитиндә һәрби әмәлијјатларын апарылмасы парламент сечкиләринин кечирилмәсини мүмкүнсүз едәрсә, Милли Мәҹлисин сәлаһијјәт мүддәти һәрби әмәлијјатларын сонунадәк узадылыр; бу барәдә гәрар исә сечкиләрин кечирилмәсини тәмин едән дөвләт органынын мүраҹиәти әсасында Конститусија Мәһкәмәси тәрәфиндән гәбул едилир. Гејд едәк ки, сөзүҝедән маддә даһа өнҹә дә мүзакирәләрә сәбәб олуб. Игтидарын мүһарибә һазырлығы ичәрисиндә олмасы вә бу еһтималы ҝөз өнүндә булундурараг, парламент сечкиләринин тәхирә салынмасы мөвзусунда “Јени Мүсават” гәзети дә јазыб. Бу һагда редаксијамызы мәлуматландыран мәнбә билдирмишди ки, Гәрбин ҝетдикҹә артан тәзјигләринин вә Азәрбајҹанла бағлы һакимијјәт дәјишиклији планларынын гаршылығында игтидар өз технологларына мүмкүн өнләјиҹи тәдбирләр планы һазырламағы тапшырыб. Ону да јада салаг ки, бир мүддәт өнҹә Гәрб тәмсилчиләри парламент сечкиләри илиндә Азәрбајҹанда бәзи демократик програмлары һәјата кечирәҹәкләрини бәјан етмишдиләр. Бундан сонра Азәрбајҹан игтидары АБШ-а гаршы тотал антитәблиғат кампанијасына старт вермишди. “Азадлыг”, “Американын сәси” радиолары орта тезликдән јығышдырылды, игтидар үзәринә ҝөтүрдүјү бејнәлхалг өһдәликләрә ачыг-ашкар етинасызлыг ҝөстәрмәјә башлады, һәтта Американын адыны дөвләт чеврилиши шоусунда һалландырмаға ҹәһд етди. Бу ҝүн артыг Вашингтон - Бакы мүнасибәтләриндә илыглашма јарандығындан данышылса да, Гәрбин Азәрбајҹанда демократија марагларындан имтина етмәдији, һакимијјәтә тәзјигләри ҝүндәмдән чыхармадығы да фактдыр. Ҝөрүнүр, о үздән гаршыдан ҝәлән сечкиләрин һансыса локал һәрби әмәлијјат бәһанәси илә тәхирә салынмасы ән идеал, ән әлверишли вариантлардан бири кими “јухарыларын” арсеналында (һәр еһтимала гаршы) сахланмагдадыр. Ајры сөзлә, ситуасијанын әлејһинә ишләјәҹәји, “форс-мажор” вәзијјәтин јаранаҹағы тәгдирдә игтидар һакимијјәти горујуб сахламаг үчүн јенә Гарабағ “картындан” јарарланмағы планлашдырыр. Бу хүсусда сәнәдин Президент Администрасијасындан јох, Милли Мәҹлисин Һүгуг сијасәти вә дөвләт гуруҹулуғу комитәсиндән ҝөндәрилмәси дә диггәт чәкир. Истисна дејил ки, һакимијјәт бунунла һансыса бәд нијјәтдә олмадығы вә мәсәләнин сырф парламентдән гајнагландығы ҝөрүнтүсүнү јаратмаға чалышыр. Мүзакирәјә чыхарылаҹаг әлавә вә дәјишикләрдә исә сечкиләрин тәхирә салынма механизми әкс олунуб. П.Һүсејн конститусија мүддәасынын 53.1 вә 55.1- ҹи маддәләринә дә әлавәләр едилдијини сөјләди: “Бу дәјишикликләр мүһарибә шәраитиндә Милли Мәҹлисин сәлаһијјәт мүддәтинин узадылмасы һагда мәсәләјә бахмағын хүсусијјәтләри һаггындадыр. Ҝөстәрилир ки, мүһарибә шәраитиндә һәрби әмәлијјатларын апарылмасы заманы Милли Мәҹлисә сечкиләрин кечирилмәсини гејри-мүмкүн һесаб етдикдә бу сәлаһијјәт МСК-ја верилир. МСК исә мүвафиг тәклифлә Конститусија Мәһкәмәсинә мүраҹиәт едир. 53-ҹү маддәнин 1-ҹи вә 2-ҹи бәндләринә едилән дәјишикликләрдә исә гејд едилир ки, Конститусија Мәһкәмәси Милли Мәҹлисин сәлаһијјәт мүддәтинин һәрби әмәлијјатларын сонунадәк узадылмасы һаггында МСК-нын тәклифинә даир гәрар вермәкдән имтина едә билмәз. Өзү дә тәклифә ән ҝеҹ једди ҝүнә бахылмалыдыр вә алты сәс чохлуғу илә гәбул едилмәлидир. Бу гәрар дәрһал Милли Мәҹлисә вә МСК-ја ҝөндәрилир. Ејни мүддәалар президент сечкиләринә аид маддәләрә дә әлавә едилир”. *** Бу мәсәләнин ҝөзләнилмәдән Милли Мәҹлисин нөвбәдәнкәнар сессијасынын ҝүндәлијинә салынмасы, шүбһәсиз, гәзетимизин даһа өнҹә һәм бу мөвзуда, һәм дә һакимијјәтин мүһарибә һазырлыглары апардығы барәдә јаздыгларынын тәсдиги сајыла биләр. Һәтта иш о дәрәҹәјә гәдәр инкишаф едиб ки, ајры-ајры сивил назирлик вә комитәләрин нәздиндә мәхфи шәкилдә хүсуси тәјинатлы алајлар, һәрби бирликләр формалашдырылыр. Доғрудур, гәзетимиз бунларын халгын ҝөзләнилән һәр һансы етиразларына гаршы истифадә едилә биләҹәјини даһа чох габартмышды. Лакин апарылан ишләрин истигамәти вә тәјинаты ону ҝөстәрир ки, рәсми Бакы Дағлыг Гарабағда һәрби әмәлијјатларын кечириләҹәјини ҹидди бир перспектив кими ҝөрүр вә габилијјәти чатан шәкилдә буна һазырлашыр. Милли Мәҹлисә ҝөндәрилән “Конститусија Мәһкәмәси һаггында” гануна едиләҹәк әлавәләр дә маһијјәтҹә һәмин һазырлығын алтјапысыны тәмин етмәк анламыны дашыјыр. Азәрбајҹан һакимијјәти өзүнү вә өлкәсини фөвгәладә дурума һазырлајыр - һәм дә ганунвериҹи базаны һәмин дурума ујғунлашдырмагла. Бу барәдә хариҹи експертләр дә дәфәләрлә јазыблар; сон ҝүнләр Русија һакимијјәтинә јахын полит-технологлар да иддиа етмәјә башлајыблар ки, Азәрбајҹан игтидары Дағлыг Гарабағла бағлы јахынларда һәрби әмәлијјатлара башлаја биләр. Бу еһтимал Ермәнистанын һакимијјәт даирәләриндә дә дәфәләрлә мүзакирә едилиб. Доғрудур, онлар бу мәсәләјә бир нөв тәблиғат характерли реаксијалар верибләр (“Азәрбајҹан бизә һеч нә едә билмәз”, - кими - Ред.); лакин ҝәлән билҝиләр вә спесифик мониторингләр ҝөстәрир ки, дүшмән бу еһтималы ҹиддијә алыр вә һазырлашыр... Азәрбајҹанын демократик дүшәрҝә јеткилиләри исә дәфәләрлә бәјан едибләр ки, өлкә рәһбәрлији торпагларымызын ишғалдан азад едилмәси уғрунда һәрби әмәлијјатлар башлајарса, о заман онлар өз сијаси фәалијјәтләрини дәрһал дондураҹаг вә дүшмән үзәриндә һәрби гәләбәнин тәмин едилмәси үчүн әлләриндән ҝәләни едәҹәкләр. Тәки һакимијјәт өз истәјиндә сәмими олсун. Лакин буну дејәнләрин ичәрисиндә дә игтидарымызын мүһарибә мөвзусунда сәмими олмадығыны, онун әсас нијјәтинин һакимијјәтинин өмрүнү узатмаг олдуғуну гејд едәнләр дә вар.
