Әһли-Бејт (әлејһимус сәлам) – Бејнәлхалг Хәбәр Аҝентлији- АБНА: Сон ҝүнләр Бакы вә Абшерон јарымадасында су тәҹһизатында ҹидди фасиләләр јараныр. Артыг бир нечә әразидә су илә бағлы шикајәтләр артмагдадыр.
Јерли мәтбуатын јаздығына ҝөрә, Ири Шәһәрләрин Бирләшмиш Су Тәҹһизаты Хидмәтиндән билдирилиб ки, јај мөвсүмүндә һаваларын кәскин истиләшмәси нәтиҹәсиндә суја олан тәләбат артыр. Бунунла белә әһалинин 70%-дән чоху 24 саатлыг су режиминдәдир, ҝери галан абонентләрә исә 12, 8 вә 4 саатлыг су тәҹһизаты режими тәтбиг едилир. Лакин дөвләт мүәссисәсинин вердији изаһат чохларыны гане етмир.
Ҝөрүнән будур ки, Бакы вә диҝәр бөлҝәләрдә ичмәли вә техники су чатышмазлығы проблеми илләрдир өз һәллини тапмыр. Хүсусилә јај ајларында су кәсинтиләри, зәиф тәзјигли су, ја да үмумијјәтлә сујун олмамасы ҝениш јајылмыш шикајәтләр сырасындадыр.
Експертләр исә јаранмыш вәзијјәтлә бағлы ики ваҹиб мәгама диггәт чәкирләр:
1. Су борулары чох һалларда Совет дөврүндән галыб вә сызмалара сәбәб олур.
2. Идарәетмәдә шәффафлыг чатышмазлығы вар вә су еһтијатларынын планлашдырылмасы вә бөлҝүләриндә еффективлик зәифдир.
Бу арада валјута еһтијатлары 77 милјард доллара чатмыш өлкәнин су тәҹһизатыны модернләшдирмәјә вәсаит ајырмамасы, үстәлик аз гала һәр ҝүн мүхтәлиф коммунал хидмәтләрә јени тарифләрин тәтбиг едилмәси вәтәндашларда наразылыг доғурмаја билмәз.
Онлар дејирләр ки, зәнҝин ресурсларын мүәјјән һиссәсини инсанларын рифаһына вә мәишәт проблемләринин һәллинә сәрф етмәк ҝүнүн ән ваҹиб мәсәләсидир. Лакин бу мәсәлә фактики олараг арха плана кечиб вә һөкумәт үчүн Түркијәдә зәлзәләдән зәрәрчәкәнләрә шәһәр тикмәк, диаспора тәшкилатларыны малијјәләшдирмәк вә лоббичилик фәалијјәтләринә вәсаит ајырмаг даһа ваҹиб мәсәләјә чеврилиб.
Бу ҝүнләрдә исә бу кими неҹә дејәрләр сәхавәтли ишләрә бири дә әлавә олунду: Суријаја газ ихраҹы.
Тәбии ки, һөкумәтин бу мәсәләдә өз аргументи вар вә Гәрби Асијада ҹәрәјан едән ҝеосијаси ојунларда о да пај алмаг истәјир. Анҹаг парадокс јараныр ки, аталар демишкән: "Өз евини јандырыб гоншуну исидирсән".
Хариҹдә имиҹ газанмг вә хариҹи аренада һуманист вә реҝионал лидер кими ҝөрүнмәк үчүн дахилдәки проблемләри икинҹи плана атмаг дүзҝүндүрмү? Вә ја дөвләт ресурсларынын әһали үчүн дејил, ҝеосијаси мараглара јөнләндирилмәси һансы нәтиҹәләрә апара биләр?
Sizin rəyiniz