АБНА24 Хәбәр Верир, 10 нојабр 2020-ҹи ил тарихиндә Москава вахты илә 00:00-дан етибарән Дағлыг Гарабағ мүнагишсәсиндә атәшкәс елан олунуб. Азәрбајҹан Республикасынын Президенти Илһам Әлијевин, Ермәнистанын баш назири Никол Пашинјанын вә Русија Федерасијасынын Президенти Владимир Путинин Бәјанатынын там мәтни ачыгланыб. Сәнәддә дејилир: "Биз, Азәрбајҹан Республикасынын Президенти И.Һ.Әлијев, Ермәнистан Республикасынын баш назири Н.В.Пашинјан вә Русија Федерасијасынын Президенти В.В.Путин ашағыдакылары бәјан едирик: 1. 10 нојабр 2020-ҹи ил тарихиндә Москва вахты илә саат 00.00-дан етибарән Дағлыг Гарабағ мүнагишәси зонасында атәшин вә бүтүн һәрби әмәлијјатларын там дајандырылмасы елан олунур. Бундан сонра Тәрәфләр адландырылаҹаг Азәрбајҹан Республикасы вә Ермәнистан Республикасы һазырда тутдуглары мөвгеләрдә галаҹаглар. 2. 20 нојабр 2020-ҹи ил тарихинәдәк Ағдам рајону Азәрбајҹан Республикасына гајтарылыр. 3. Дағлыг Гарабағда тәмас хәтти вә Лачын дәһлизи боју Русија Федерасијасынын 1960 сајда одлу силаһлы һәрби гуллугчусундан, 90 һәрби зиреһли техника, 380 әдәд автомобил вә хүсуси техникадан ибарәт сүлһмәрамлы континҝенти јерләшдирилир. 4. Русија Федерасијасынын сүлһмәрамлы континҝенти ермәни силаһлы гүввәләринин чыхарылмасы илә паралел шәкилдә јерләшдирилир. Русија Федерасијасынын сүлһмәрамлы континҝентинин галма мүддәти 5 илдир вә мүддәтин битмәсинә 6 ај галмыш һазыркы мүддәанын тәтбигинә хитам верилмәси нијјәти илә бағлы Тәрәфләрдән һәр һансы бири чыхыш етмәзсә, мүддәт автоматик олараг нөвбәти 5 илә узадылыр. 5. Мүнагишә тәрәфләринин разылашмалара әмәл етмәсинә нәзарәтин сәмәрәлилијинин артырылмасы мәгсәдилә атәшкәсә нәзарәт үзрә сүлһмәрамлы мәркәз јарадылыр. 6. Ермәнистан Республикасы 15 нојабр 2020-ҹи ил тарихинәдәк Азәрбајҹан Республикасына Кәлбәҹәр рајонуну, 1 декабр 2020-ҹи ил тарихинәдәк исә Лачын рајонуну гајтарыр. Дағлыг Гарабағла Ермәнистан арасында әлагәни тәмин едәҹәк вә бунунла белә Шуша шәһәринә тохунмајаҹаг Лачын дәһлизи (5 км. енлијиндә) Русија сүлһмәрамлы континҝентинин нәзарәти алтында галыр. Тәрәфләрин разылығы әсасында нөвбәти үч ил әрзиндә Дағлыг Гарабағла Ермәнистан арасында әлагәни тәмин едән Лачын дәһлизи үзрә јени һәрәкәт маршрутунун иншасы планы мүәјјән едиләҹәк вә бунунла да һәмин маршрутун мүһафизәси үчүн Русија сүлһмәрамлы континҝентинин ҝәләҹәк јердәјишмәси нәзәрдә тутулур. Азәрбајҹан Республикасы Лачын дәһлизи үзрә һәр ики истигамәтдә вәтәндашларын, нәглијјат васитәләринин вә јүкләрин һәрәкәтинә тәһлүкәсизлик зәманәти верир. 7. Дахили мәҹбури көчкүнләр вә гачгынлар Дағлыг Гарабағын әразисинә вә әтраф рајонлара БМТ-нин Гачгынлар үзрә Али Комиссарлығынын Офисинин нәзарәти алтында ҝери гајыдыр. 8. Һәрби әсирләр, ҝировлар вә диҝәр сахланылан шәхсләрин, һабелә ҹәсәдләрин мүбадиләси һәјата кечирилир. 9. Бөлҝәдәки бүтүн игтисади вә нәглијјат әлагәләри бәрпа едилир. Ермәнистан Республикасы вәтәндашларын, нәглијјат васитәләринин вә јүкләрин һәр ики истигамәтдә манеәсиз һәрәкәтинин тәшкили мәгсәди илә Азәрбајҹан Республикасынын гәрб рајонлары вә Нахчыван Мухтар Республикасы арасында нәглијјат әлагәсинин тәһлүкәсизлијинә зәманәт верир. Нәглијјат әлагәси үзрә нәзарәти Русијанын Федерал Тәһлүкәсизлик Хидмәтинин Сәрһәд Хидмәтинин органлары һәјата кечирир". Тәрәфләрин разылығы әсасында Нахчыван Мухтар Республикасы илә Азәрбајҹанын гәрб рајонларыны бирләшдирән јени нәглијјат коммуникасијаларынын иншасы тәмин едиләҹәкдир.
342/
