Әһли Бејт - АБНА – Хәбәр Аҝентлијинин вердији хәбәрә әсасән, Августун 26-да Бакы Ағыр Ҹинајәтләр Мәһкәмәсиндә 2015, Ганлы 26 Нојабр Нардаран Фаҹиәси илә бағлы иш үзрә Тале Бағырзадә вә нөвбәти мәһкәмә иҹласы кечирилиб.
Иҹласа һаким Әлөвсәт Аббасов сәдрлик едиб. Иҹласда тәгсирләндирилән Аббас Һүсејнов һаким Әлөвсәт Аббасовдан Бакы ағыр Ҹинајәтләр Мәһкәмәсинин сәдри Маһмуд Нәбијевә шикајәт јаздығыны билдириб. Гејд едиб ки, һаким шаһидләрә истигамәтвериҹи сөзләр дејир. Һаким шикајәти сәдрә чатдыраҹагларыны билдириб.
Даһа сонра вәкилләр тәгсирләндирилән шәхсләрә сахланыландан сонра ишҝәнҹә верилмәси һаггында тибби експертизанын кечирилмәси барәдә вәсатәт верибләр. Билдирибләр ки, Фуад Гәһрәманлыдан башга сахланылан шәхсләрин һәр бири ишҝәнҹәјә мәруз галдыгларыны билдирирләр. Шамил Абдуләлијевин вәкили Зибејдә Садыгова исә онун бәдәниндә олан ҝүлләләрин чыхарылмасы барәдә вәсатәт вериб.
Прокурор вәсатәтләрин тәмин едилмәмәсини истәјиб. Мәһкәмә вәсатәти тәмин едиб.
Иҹласда Баш Мүтәшәккил Ҹинајәткарлыгла Мүбаризә Идарәсинин әмәкдашы Елчин Тағыјев суаллары ҹавабландырыб. Вәкил Елчин Садыгов ондан сорушуб ки, бүтүн полисләр зиреһли ҝөдәкҹә ҝејинмишдиләрсә, өлән полисләрдән биринин гарнына ҝүллә неҹә дәјиб? Шаһид өзүнүн ҝөдәкҹә ҝејиндијини, диҝәрләриндән исә хәбәри олмадығыны дејиб.
Вәкил ондан јараланан полисләрә тибби јардым ҝөстәрилмәсини ҝөрүб-ҝөрмәмәсини сорушуб. Шаһид ҝөрмәдијини дејиб.
Вәкил Јалчын Иманов ондан полисләрдә гумбара олуб-олмамасыны сорушуб. Шаһид полисләрдә гумбара олмадығыны дејиб.
Тәгсирләндирилән Ҹаббар Ҹаббаров исә машында онлара ишҝәнҹә верән шәхсләрдән биринин Елчин Тағыјев олдуғуну дејиб.
Талеһ Бағырзадә исә чыхыш едәрәк билдириб ки, әмәллијјат заманы мүһафизә полисләри әразини мүһафизә едибләр: “Сиз нәјә ҝөрә сәсҝүҹләндириҹидән истифадә етмәдиниз? Онсуз да әрази мүһафизә олунурду. Һеч ким јахынлаша билмәјәҹкди”. Елчин Тағыјев суала ҹаваб вермәјиб. Билдириб ки, буну група рәһбәрлик едән Кәрим Әлимәрданов ҹавабландырар. Шаһид вәкилләрин суалларынын чохуна “хатырламырам” ҹавабыны вериб. Вәкил Немәт Кәримли исә бунунла бағлы вәсатәт галдырб. Билдириб ки, шаһид суалларын чохуна “хатырламырам” ҹавабыны верир. Вәкил онун психиатрик експертизадан кечирилмәсини, експерт гаршысында онун һадисә баш верән ҝүнү оланлары дәрк едиб хатырлајыб-хатырламамасы суалынын гојулмасыны истәјиб. Һаким вәсатәти нөвбәти иҹласда мүзакирә едәҹәкләрини билдириб.
Иҹласда Баш Мүтәшәккил Ҹинајәткарлыгла Мүбаризә Идарәсинин әмәкдашы Һикмәт Әлијев шаһид вә зәрәрчәкмиш шәхс гисминдә ифадә вериб. О, Тале Бағырзадәнин Нардаранда силаһлы дәстә јаратмасы, һакимијјәти зорла әлә кечирмәк истәмәси барәдә онларда мәлумат олдуғуну, бунунла бағлы идарәдә мүшавирә кечирилдијини дејиб. Билдириб ки, кечирилән әмәлијјатда иштирак едиб. О, һадисә баш верән евә чатанда полис әмәкдашларынын хәбәрдарлыг атәши ачдыгларыны билдириб. Һәјәтә о вә диҝәр полисләр ҝирәндә партлајыш баш вериб. Һәјәтдә олан һовузун јанында ҝизләндији үчүн хәсарәт алмајыб: “Һәјәтдә бир нәфәри ҝөрдүм. Даһа сонра евә кечиб 50-55 јашларында бир кишини зәрәрсизләшдирдим. Онун әлиндә бычаг вар иди вә мәнә мүгавимәт ҝөстәрмәк истәјирди. Бахыш заманы ҹибиндән гумбара чыхды. Һәмин шәхс Ибраһим Худавердијев иди. Она идман фәнди ишләдиб јерә јыхдым вә зәрәрсизләшдирдим”. Шаһид билдириб ки, атәш олан тәрәфә о да атәш ачыб. Лакин онун атдығы ҝүлләләрин кимәсә дәјмәсини вә јахуд киминсә өлмәсини билмир.
Прокурор Нәсиб Бајрамов исә ондан тәгсирләндирилән шәхсләрә ишҝәнҹә верилмәси һаггында сорушуб. Билдириб ки, әсас мүзакирә мөвзуларындан бири дә онлара ишҝәнҹә вериымәсидир. Прокурор шаһиддән кимәсә ишҝәнҹә верилмәсини вә јахуд белә бир һадисәјә шаһид олуб-олмамасыны сорушуб. Шаһид белә бир һадисәнин шаһиди олмадығыны, кимәсә ишҝәнҹә вермәдијини дејиб.
Вәкилләр ондан һансы зәрәри чәкдијини сорушублар. Шаһид мәнәви зәрәр чәкдијини дејиб: “Бизә гаршы атәш ачылыб”.
Вәкил Јалчын Иманов ондан мүшавирәјә кимин рәһбәрлик етдијини, башга мүшавирә олуб-олмамасыны, әмәлијјат заманы онун һарада дајанмасыны, һансы мөвгеји сечмәсини кимин мүәјјән етдијини сорушуб.
Шаһид билдириб ки, мүшавирәјә Кәрим Әлимәрданов рәһбәрлик едиб. Башга мүшавирәнин кечирилмәси барәдә мәлуматы јохдур. Онун һансы мөвгеји сечмәсини вә һарда дајанмасыны исә Кәрим Әлимәрданов мүәјјән едиб. О, суаллара ҹаваб олараг үзәриндә "Зәфәр" силаһынын, бәзи полисләрдә исә резин атан автоматын олдуғуну дејиб.
О, ИбраһимХудавердијевиевдәсахладығыныдејиб. Вәкил Јалчын Иманов исә ондан сорушуб ки, неҹә олур, евә илк дахил олан Елман Бајрамов олур вә Ибраһим Худавердијев она һеч бир хәсарәт јетирмир, лакин о, ичәри дахил оланда Ибраһим Худавердијев она һүҹум едир. Шаһид һәмин шәхсин бир нәфәрә һүҹум едә биләҹијини дејиб: “О, бир нәфәрә һүҹум едә биләрди. Јәгин она ҝөрә белә олду”.
Вәкилләр шаһиддән сорушуб ки, о, бир нәфәри зәрәрсизләшдирдији заман неҹә олур Аббас Гулијевин дә кимәсә мүгавимәт ҝөстәрмәсини ҝөрүр? Шаһид һәјәтә ҝирәндә Аббасы ҝөрдүјүнү дејиб.
Тәгсирләндирилән Ибраһим Худавердијев исә ону тутан шәхсин Һикмәт Әлијев олмадығыны дејиб: “Мән евин ичиндә јох, мәтбәхин гапысынын јахынлығында сахланылмышам. Билмирәм нә фәрги вар ки, мәни тутан јох, башгасы ҝәлиб ифадә верир. Мән елә билирдим мүстәнги арашдыраҹаг. Лакин 9 ајда мүстәнтиг ҝөрмәдим. Инди дә ҹинајәт төрәдәнләри мәһкәмәјә зәрәрчәкмиш кими чағырырлар. Ҝүнаһсыз адамлар исә зинданда галыб”. Шаһид исә ифадәсини вердијини, Ибраһим Худавердијеви өзүнүн тутдуғуну дејиб.
Тале Бағырзадә ондан сорушуб ки, неҹә ола биләр, дәстә башчысы һесаб олунан өзү евдә көмәксиз вәзијјәтдә галыр. Шаһид исә һәјәтин Тале Бағырзадәнин адамлары тәрәфиндән мүһафизә олундуғуну дејиб.
Фуад Гәһрәманлы исә ондан сорушуб ки, идманчы олмаја-олмаја неҹә идман фәнди ишләдиб
Шаһид пешәкар идманчы олмаса да, һәфтәдә ики дәфә идманла мәшғул олдуғуну дејиб. Фуад Гәһрәманлы дејиб ки, диҝәр шаһид Елман Бајрамов илк 2 полис һәјәтә ҝирәндә партлајышын баш вердијини, Һикмәт Әлијев исә һәјәтдә 7-8 нәфәр олан заман партлајыш баш вердијини дејир: “Бу зиддијјәти неҹә изаһ едә биләрсиниз?" Һикмәт Әлијев һадисәни белә хатырладығыны дејиб.
Тәгсирләндирилән Әли Нуријев исә Һикмәт Әлијевин онун әлини гандалладығыны, Кәрим Әлимәрдановла бирликдә ону тока вердикләрини дејиб. О, әлләриндә олан изләри дә ҝөстәриб: “Лакин мәним ифадәмә голу Ислам Ағабәјов чәкдириб. О, гардашымын вә әмим оғлунун шәкилләрин мәнә ҝөсдтәриб деди ки, онларын сәнин јериндә олмасыны истәмирсәнсә, гол чәк”.
Расим Ҹәбрајылов да Һикмәт Әлијев тәрәфиндән ишҝәнҹәјә мәруз галдығыны дејиб. Шаһид ону киминләсә сәһв салдыгларыны сөјләјиб. Билдириб ки, тәгсирләндирилән шәхсләрдән Аббас Гулијеви үзләшмә заманы ҝөрүб. Һеч кимә ишҝәнҹә вермәјиб: “Мән башга бир бөлмәдә ишләјирәм. Кәрим Әлимәрдановла бир шөбәдә ишләмирик. Садәҹә әмәлијјатда бирликдә олмушуг. Мән орда ади бир ишчијәм, кимәсә ҝөстәриш верә билмәрәм”. О, истинтаг заманы вердији ифадәсини тәсдиг едиб. Билдириб ки, тәгсирләндирилән шәхсләрә гаршы һәр һансы шикајәти јохдур. Онларын ҹәза мәсәләсинин исә мәһкәмә тәрәфиндән һәлл олунмасыны истәјиб.
Просес августун 31-дә давам едәҹәк.
Хатырладаг ки, “Мүсәлман Бирлији Һәрәкатынын” рәһбәри Т.Бағырзадә өтән ил нојабрын 26-да Нардаран гәсәбәсиндә кечирилән хүсуси әмәлијјат заманы сахланыб. О, Ҹинајәт Мәҹәлләсинин 120-ҹи (гәсдән адам өлдүрмә) маддәсинин 120.2.1, 120.2.3, 120.2.4, 120.2.7, 120.2.12, 29,120-ҹи (гәсдән адам өлдүрмәјә ҹәһд) маддәсинин 29, 120. 2.1, 29,120.2.3, 29, 120.2.4, 29,120.2.7, 29, 120. 2. 12, 228.3-ҹү (ганунсуз олараг одлу силаһ әлдә етмә), 228.4-ҹү (ганунсуз олараг силаһ ҝәздирмә) вә диҝәр маддәләри илә иттиһам олунур. Т.Бағырзадә һеч кими өлдүрмәдијини, һеч бир силаһларынын олмадығыны, әксинә ҝүҹ органларынын тәхрибатлары илә үзләшдијини билдирир.
АХҸП сәдринин мүавини Ф. Гәһрәманлы исә өтән ил декабрын 8-дә һәбс едилиб. О, Ҹинајәт Мәҹәлләсинин 281-ҹи (дөвләт әлејһинә ачыг чағырышлар), 283-ҹү ( милли, ирги, сосиал вә ја дини нифрәт вә дүшмәнчилијин салынмасы) вә 220.2-ҹи (һакимијјәт нүмајәндәсинин гануни тәләбләринә фәал шәкилдә табе олмамаға вә күтләви иғтишашлара, һабелә вәтәндашлара гаршы зоракылыг етмәјә чағырышлар етмә) маддәләри илә иттиһам олунур.
Һәр ики шәхс сијаси сифаришлә һәбс олундугларыны билдирибләр.
Диггәт: Хәбәрдән истифадә етдикдә мәнбәјә истинад лазымдыр
