Әһли Бејт (әлејһимус сәлам) -АБНА- Хәбәр Аҝентлији- Аллаһ Тәала инсаны мәхлугларын ән алиси олараг хәлг етмиш вә ону Јер үзүндә өз ҹанишини елан етмишдир. “Вә(јадына сал) о заман(ы) ки, Рәббин мәләкләрә деди: «Һәгигәтән Мән јер үзүндә бир ҹанишин (Аллаһын орадакы нүмајәндәси, ја да оранын нәсли кәсилмиш гәдим сакинләринин ҹанишини) гојаҹағам»”. (“Бәгәрә” 30).
Бу ајәдә мәгсәд о инсандыр ки, Илаһи убудијјәт јолунда аддымлајар вә бүтүн һәдәфи Илаһи гүрб мәгамына чатмаг үчүн олар. Бу инсан һәгиги инсан олмаг адыны газанар вә Јер үзүндә Аллаһын хәлифәси олар. (Тебјан)
Инсан беһишт үчүн јарадылмышдыр. Мәсумларымыз (ә) бујурур ки, инсан ҝәрәк өзүнү беһиштдән уҹузуна сатмасын. Бәс нә едәк ки, ҹәһәннәм атәшиндән азад олаг?
Бәзи фәзиләтли әмәлләр вардыр ки, онлары јеринә јетирәрәк өзүмүзү ҹәһәннәм атәшиндән горуја биләрик.
1. Тәвга вә диндарлыг. Инсанын талејинә бирбаша тәсир гојан әмәлләрдән бири – тәгвадыр. Имам Әли (ә) Пејғәмбәрә (с) суал верир ки, Рамазан ајынын ән үстүн әмәли нәдир? Һәзрәт (с) бујурур: “Еј Әбул Һәсән! Бу ајда ән үстүн әмәл – Аллаһын һарамларындан чәкинмәкдир”. “Иман ҝәтириб јахшы ишләр ҝөрән шәхсләрә мүждә вер ки, онлар үчүн (евләринин вә ағаҹларынын) алтындан чајлар ахан ҹәннәтләр (вә ја бағлар) вардыр”. (“Бәгәрә” 25).
2. Јохсуллара вә јетимләрә јахшылыг етмәк вә әлләриндән тутмаг. Бу әмәл Илаһи рәһмәт вә кәрәми ҹәлб едән әмәлләрдәндир. Инсан јохсуллара вә јетимләрә јахшылыг едәрәк, ҹәмијјәтин мәһрум олмуш тәбәгәсинә дәстәк олмуш олар. Пејғәмбәримиз (с) “Шәбанијјә” хүтбәсиндә мүсәлманлары бу әмәлә дәвәт едир вә бујурур: “Инсанларын јетимләринә мәһәббәт един ки, сизин јетимләринизә мәһәббәт етсинләр”. Мөмин о кәсдир ки, өзүнүн еһтијаҹы олмасына бахмајараг, малындан јохсула вә јетимә пај верәр вә онлары дојуздурар. Бу инсан ҹәһәннәм атәшиндән узаг олар. “Вә онлар јемәкләрини, өзләри(нин еһтијаҹы олуб чох) истәдикләри һалда Аллаһа олан мәһәббәт үзүндән фәгирә, јетимә вә әсирә верәрләр”. (“Инсан” 8). Неҹә ки, Мәсумларымыз (ә) бу әмәли јеринә јетирирдиләр.
3. Төвбә вә истиғфар. Бизи ҹәһәннәмдән узаглашдыра билән әмәлләрдән бири дә төвбә вә истиғфардыр. Аллаһ Гуранда бујурур: “Вә дедим ки; «Өз Рәббиниздән бағышланмаг диләјин. Чүнки О, чох бағышлајандыр». «Ҝөјдән (булуддан) сизә бол јағыш ҝөндәрсин». «Вә сизә мал-дөвләт вә оғуллар (әта етмәклә) јардым етсин, сизин үчүн бағлар јаратсын вә сизин үчүн чајлар ахытсын»”. (“Нуһ” 10-12). Һәзрәт Пејғәмбәр (с) бујурур: “Еј инсанлар! Һәгигәтән сизин ҹанларыныз әмәлләринизин ҝировундадыр. Она ҝөрә дә истиғфар едәрәк (онлары) азад един. Белләриниз ҝүнаһларыныздан ағырлашмышдыр. Она ҝөрә дә сәҹдәләринизи узадараг ону јүнҝүлләшдирин. Билин ки, Аллаһ Өз иззәтинә анд вермишдир ки, намаз гыланлара вә сәҹдә едәнләрә әзаб вермәјәҹәкдир. Онлары Гијамәт ҝүнү ҹәһәннәм атәши илә горхутмајаҹагдыр”.
4. Аллаһа дуа етмәк. Аллаһ Тәала дуанын әһәмијјәти барәсиндә бујурур: “(Мүшрикләрә) де: «Әҝәр мәним Рәббим (үмуми мәрһәмәтин вә бәһанәјә јер гојмамаг үчүн дәлил-сүбутун тамамланмасынын тәләбинә әсасән) сизи (товһид вә имана) дәвәт етмәк истәмәсәјди, сизә әһәмијјәт вермәзди”. (”Фурган” 77). Јәни дуаларыныз олмасајды Аллаһ сизә әһәмијјәт вермәзди. Пејғәмбәр (с) бујурур: “Әлләринизи намаз вахты дуа үчүн јухары галдырын ки, о заман – ән јахшы саатлардыр. Аллаһ бу саатда бәндәләринә рәһмәтлә нәзәр салар. Нә заман Онунла мүнаҹат етсәниз, сизә ҹаваб верәр. Нә заман Она хитаб етсәниз “Ләббејк!” дејәр. Нә заман Ону чағырсаныз, јеринә јетирәр”.
Дуа – мөминин силаһыдыр. Дуа васитәсилә мөмин өзүнү һәр бир бәладан горујар вә ҹәһәннәм атәшиндән азад едәр.
Диггәт: Хәбәрдән истифадә етдикдә мәнбәјә истинад лазымдыр
