Әһли Бејт (әлејһимус сәлам) -АБНА- Хәбәр Аҝентлијинин вердији хәбәрә әсасән, Иран Ислам Республикасы вә Азәрбајҹан арасында дәмир јолу көрпүсүнүн тәмәли гојулуб.
Мәлуматымыза ҝөрә, Шимал-Ҹәнуб бејнәлхалг нәглијјат дәһлиз васитәсилә Һиндистандан Русија вә Авропаја, һабелә әкс истигамәтдә дашымаларын һәјата кечирилмәси планлашдырылыр ки, бу да һәр ил милјонларла тон јүкүн ИИР вә Азәрбајҹан Республикасы үзәриндән транзит кечиди демәкдир. Илкин мәрһәләдә дәһлиз васитәсилә 5 млн. тон, нөвбәти мәрһәләдә исә 10 млн. тондан артыг јүкүн дашынмасы прогнозлашдырылыр.
Шимал-Ҹәнуб бејнәлхалг нәглијјат дәһлизинин өнәмли һәлгәләриндән олаҹаг дәмир јолу көрпүсүнүн ени 10 метр, узунлуғу исә 82 метр олаҹаг. 3 ашырымлы вә 4 дајаглы олмагла лајиһәләндирилән көрпүнүн үзәриндә һәр 2 истигамәтдә гатарларын һәрәкәтинин тәмин олунмасы мәгсәдилә ики хәтт гурашдырылаҹаг. Дәмир јолу көрпүсүнүн тикинтиси хәрҹләри Азәрбајҹан вә ИИР тәрәфиндән бәрабәр пајларла өдәниләҹәк.
Көрпүнүн тикинтисинин 2016-ҹы илин сонунадәк јекунлашдырылмасы планлашдырылыр. Бу, дәһлизин биринҹи мәрһәләси һесаб олунан Азәрбајҹанын әразисиндә Астара дәмир јолу стансијасындан Иран Ислам Республикасы сәрһәдинә кими 8,3 км-лик јолун, ИИР тәрәфиндә 1,7 км-лик дәмир јолу хәттинин вә јүкашырма терминалынын тикинтиси ишләринин тамамланаҹағы вахт илә үст-үстә дүшүр.
Тәмәл мәрасиминдә чыхыш едән ИИР-ын рабитә вә информасија технолоҝијалары назири ики өлкә президентләринин өлкәләримиз арасында әлагәләрин инкишафыны даим диггәтдә сахладығыны, бу ҝүн тәмәли гојулмуш дәмир јолу көрпүсүнүн дә мәһз һәр ики өлкә рәһбәринин сијаси ирадәсинин вә әмәкдашлығын инкишафына вердикләри өнәмин ҝөстәриҹиси олдуғуну вурғулајыб.
Диггәт: Хәбәрдән истифадә етдикдә мәнбәјә истинад лазымдыр
