Әһли Бејт (әлејһимус сәлам) -АБНА- Хәбәр Аҝентлијинин вердији хәбәрә әсасән, Авропа Шурасы Парламент Ассамблејасында(АШ ПА) Азәрбајҹанла бағлы сәрт гәтнамәнин гәбул олунмасы һакимијјәтдә ҹидди нараһатлыг јарадыб. Мәлумат үчүн дејәк ки, гәтнамә 140 нәфәр леһинә, 13 нәфәр әлејһинә олмагла гәбул едилиб. Гәтнамәдә Азәрбајҹан һакимијјәтиндән сијаси мәһбусларын дәрһал азадлыға бурахылмасы, репрессијалара, мәтбуата басгылара сон гојулмасы, инсан һаглары саһәсиндә, мәһкәмә системиндә ислаһатлар апарылмасы тәләб олунур.
АШ ПА-да белә бир гәтнамәнин гәбул едиләҹәји ҝөзләнилирди. Лакин һакимијјәтдә о үмид дә вар иди ки, “күрү дипломатијасы” вәзијјәти дәјишдирә биләр. Һәлә мүзакирәләр заманы игтидарын бүтүн ҹәһдләринин боша чыхдығы ајдын олду. Нәһајәт, гәтнамәнин әлејһинә 13 нәфәрин чыхмағы Азәрбајҹан һакимијјәтинин АШ ПА-да дајагларынын ҹидди шәкилдә сарсылдығыны ортаја гојду.
Редаксијамыза дахил олан мәлумата ҝөрә, һакимијјәтдә нараһатлыг артыг АШ ПА-ны да итирмәсилә бағлыдыр. Заман-заман Азәрбајҹан игтидары бејнәлхалг аләмдә бу гурумдан галхан кими истифадә едиб. Өзүнә олан бејнәлхалг тәзјигләри мәһз АШ ПА-да нејтраллашдыра билиб. Һакимијјәт фәргиндәдир ки, артыг бу мүмкүн олмајаҹаг. Игтидар баша дүшүр ки, бејнәлхалг аләмдә тәкләниб.
Она ҝөрә дә әнәнәви олараг шантажа кечиб вә “Гарабағ карты”ндан истифадә едәрәк вахтилә галхан кими истифадә етдији АШ ПА-нын да “ермәнипәрәст” гурум олдуғуну иҹтимаи рәјә сырымаға чалышыр. Лакин АШ ПА-дакы мүзакирәләрдән бир нечә ҝүн әввәл Алманија Бундестагында Азәрбајҹанла бағлы гәтнамә гәбул едилди. Бундестагда мүзакирәләр апарыларкән Азәрбајҹанын торпагларынын ишғал олундуғу вурғуланды, бу гәтнамәјә салынды. “Вәтәнпәрвәр” Азәрбајҹан игтидары исә Алманијаны топа тутду. Рәсми дөвләт гәзети олан “Азәрбајҹан”да Алманијанын канслери Анҝела Меркел тәһгир едилди. Чүнки Бундестагда гәбул олунан гәтнамәдә дә Азәрбајҹан һакимијјәтиндән сијаси мәһбуслары азад етмәк, инсан һаглары саһәсиндә ислаһатлар апармаг тәләб олунурду. Бу факт ҝөстәрир ки, Азәрбајҹан һакимијјәти “Гарабағ карты”ндан јалныз өз мараглары үчүн јарарланыр. Авропа структурлары да бунун фәргиндә олдуғундан артыг һакимијјәтин Гарабағ нағылларына ҹидди јанашмыр.
Диггәт: Хәбәрдән истифадә етдикдә мәнбәјә истинад лазымдыр
