Һүсејн Әмир-Абдуллаһијан өз Твиттер сәһифәсиндә јазыб: “Ермәнистанда мәним баш назир Никол Пашинјанла Ҹәнуби Гафгазын тәһлүкәсизлији, Ермәнистанла Азәрбајҹан арасында сәрһәдин демаркасијасы вә хариҹи гүввәләрин мүдахилә етмәмәси мәсәләләри илә бағлы мүһүм ҝөрүшүм олду”.
Иран ХИН башчысы әлавә едиб: “Биз Шимал-Ҹәнуб транзит јолуна, ики өлкә арасында тиҹарәт вә туризмин инкишафына бөјүк әһәмијјәт веририк. Мәһз бу мәгсәдлә Иранын Гафанда Баш Консуллуғу ачылыб”.
Гејд едәк ки, дипломат ики ҝүнлүк Ермәнистан сәфәринин сон ҝүнүндә парламент сәдри Ален Симонјан вә баш назир Никол Пашинјанла ҝөрүшүб.
Диҝәр бир мәлумата әсасән, Иран ХИН рәһбәри Әмир-Абдуллаһијан Ермәнистанын өлкәсиндән силаһ алмаг истәдијинә даир јајылан хәбәрләрә мүнасибәт билдириб.
АПА Хәбәр Аҝентлијинин мәлуматына әсасән, иранлы назир Ирәванда она бу барәдә үнванланан суала ҹаваб олараг дејиб ки, Иранын бәзи өлкәләрлә, о ҹүмләдән дә гоншу өлкәләрлә мүдафиә саһәсиндә әмәкдашлығы мөвҹуддур.
О даһа сонра Азәрбајҹан-Ермәнистан мүнасибәтләринин нормаллашмасы мәсәләсиндә дә тохунуб. Назир, Азәрбајҹанла Ермәнистан арасындакы мәсәләнин сијаси вә диалог јолу илә һәллинин ваҹиблијини вурғулајыб.
342/
