Лүксембургда Хариҹи Әлагәләр Шурасынын јекунларына даир мәтбуат конфрансында чыхыш едән Боррел дејиб: “Авропа Иттифагынын Ҝүрҹүстандакы миссијасынын Азәрбајҹанла сәрһәдин Ермәнистан тәрәфинә мониторинг апармасына разылыг верилиб. Команда артыг орададыр вә шуранын тәлиматына ујғун олараг биз јахын һәфтәләрдә Азәрбајҹанла бејнәлхалг сәрһәдин Ермәнистан тәрәфиндә чох тез 40 монитор јерләшдирәҹәјик”.
Авропа Шурасынын президенти Шарл Мишел дә өз нөвбәсиндә “Ермәнистанын Азәрбајҹанла бејнәлхалг сәрһәдиндә мониторинг потенсиалынын сүрәтлә јерләшдирилмәсини” алгышлајыб.
Октјабрын 17-дә Авропа Иттифагы Шурасы реҝиондакы вәзијјәтин мониторинги, тәһлили вә мәлуматландырылмасы мәгсәди илә Азәрбајҹанла бејнәлхалг сәрһәдин Ермәнистан тәрәфи бојунҹа 40-а гәдәр АИ мониторинг експертинин јерләшдирилмәси барәдә гәрар гәбул едиб.
Бу гәрар октјабрын 6-да Ермәнистанын баш назири Никол Пашинјан, Франса президенти Еммануел Макрон, Авропа Иттифагы Шурасынын президенти Шарл Мишел вә Азәрбајҹан президенти Илһам Әлијевин дөрдтәрәфли ҝөрүшүндән сонра верилиб.
Шура билдириб ки, бу гәрар бөлҝәдә сүлһ вә тәһлүкәсизлијин бәрпасына, етимадын јарадылмасына вә ики дөвләт арасында бејнәлхалг сәрһәдин делимитасијасына көмәк етмәк мәгсәди дашыјыр.
Гејд олунур ки, мониторинг миссијасы мүвәггәти характер дашыјаҹаг вә принсипҹә ики ајдан чох олмајаҹаг. Русија исә үчтәрәфли бәјтанатын тәшәббүскары олараг Гәрб дөвләтләринин Ҹәнуби Гафгазда активләшмәсинә мүсбәт јанашмыр вә олајлары диггәт мәркәзиндә сахлајыр.
342/
