АБНА24 Хәбәр Верир, Виртуал аз билдирир ки,бу ҝүнләрдә Москва әтрафында Русија Мүдафиә Назирлијинин һәр ил тәшкил етдији бејнәлхалг орду ојунлары илә јанашы силаһ сәнајесинин ән јени мәһсулларынын нүмајиш олундуғу “Армија-2021” сатыш-сәрҝисиндә Ермәнистанын мүдафиә назири Аршак Карапетјан башда олмагла ҝениш тәркибли нүмајәндә һејәти илә иштиракы белә бир еһтималы ҝүҹләндириб ки, Ермәнистан Русијадан модерн силаһлар алмаг барәдә мүгавиләләр имзалајыб.
Москвадан ҝәлән хәбәрләрә әсасән артыг Ермәнистан Русијадан бир сыра јени силаһларын алынмасына даир һәмин сәрҝи чәрчивәсиндә мүгавиләләр имзалајыб.
Русијаны јенидән Ермәнистаны силаһландырмаға башламасы Азәрбајҹан рәһбәрлијинин өз нараһатлығыны вә наразылығыны үмуми шәкилдә ачыгламасы илә мүшаијәт олунуб. Президент Илһам Әлијев ҸНН Түрк-ә мүсаһибәсиндә бәјан едиб ки, Русијанын Ермәнистаны јенидән силаһландырмаг нијјәтини анламыр вә буну мәнтигсиз һесаб едир. Дөвләт башчысы хатырладыб ки, Русија әввәлләр Ермәнистана милјардларла долларлыг силаһы һавајы вериб. Буна реаксијада Русија ХИН-ин рәсми нүмајәндәси Марија Захарова өтән һәфтә билдириб ки, һансыса өлкәјә силаһ вермәк Русијанын суверен һүгугудур вә Москванын мәгсәди “реҝионда һәрби таразлыг” јаратмагдыр.
Ермәнистанын малијјә вәсајитә малик олмамасыны нәзәрә алараг Русијадан јени силаһларын бу өлкәјә ја “һәдијјә” олараг, ја да ҝүзәштли кредитләр һесабына вериләҹәји дејилир. Ермәнистанын мүдафиә назири Аршак Карапетјан өтән һәфтә журналистләрә билдириб ки, Ермәнистан Русијадан анҹаг јени силаһлар алаҹаг.
Виртуал.аз мүәјјән мәнбәләрә истинадла Ермәнистанын Русијадан алаҹағы модерн силаһларын “Орион-9” вә “Орион-10” зәрбә пилотсуз тәјјарәләри, С-400 “Триумф” зенит-ракет комплексләри вә “Пантсир” зенит комплексинин модернизә едилмиш версијалары олаҹағыны етһтимал едир.
342/
