Аз. Р. президенти Илһам Әлијев дүнән кечирдији ҝениш мәтбуат конфрансында Ермәнистанын икинҹи Гарабағ мүһарибәсинин ҝедишиндә “Исҝәндәр” оператив-тактики ракет комплексләрини тәтбиг етмәси һагда һазырда бу өлкәдә ҹидди сијаси чахнашмаја сәбәб олмуш мәсәләјә мүнасибәт билдириб. Президент дејиб ки, Ермәнистан мүһарибәдә бу ракетләри тәтбиг етмәјиб, Азәрбајҹан тәрәфи буну ҝөрмәјиб вә гејдә алмајыб. Ситат: “О ки галды Ермәнистан баш назиринин “Исҝәндәр” ракет комплекси илә бағлы бәјанатларына, о, биздә дә суаллар доғуруб. Мән буну иронијалашдырмаг истәмәздим. Бу мәсәләјә истәр Русијанын рәсми шәхсләри, истәр парламент үзвләри, истәрсә дә експертләр тәрәфиндән кифајәт гәдәр шәрһ верилиб ки, ракетин 10% партламасы үчүн ҝәрәк хејли чалышасан. Биз “Исҝәндәр” ракетинин атылмасыны ҝөрмәмишик. Она ҝөрә бу бәјанат сәсләндириләндә өтән ҝүн биз јенә дә марагландыг, анҹаг јох, биз буну ҝөрмәмишик. Бу садәҹә публик шәкилдә дејилмиш бош сөз иди”, - Президент гејд едиб. Илһам Әлијев дејиб ки, һәрби әмәлијјатларын ҝедишиндә Русија президент Владимир Путинлә тәмаслары заманы “Исҝәндәр” ракетләринин Ермәнистандан ҝөтүрүлмәсинә чағырмышды. “Һәлә бу ракетләр Ермәнистана вериләндә мән билдирмишдим ки, бу дүзҝүн аддым дејил, чүнки реҝионда сүлһә вә стабиллијә хидмәт етмир, бунлар бизи чәкиндирә билмәз. Вә мүһарибә вахты мән Русија тәрәфинә тәклиф едирдим ки, “Исҝәндәр”ләри ҝери ҝөтүрсүнләр, һәлә дә бу мөвгејимдә галырам”,- дејә Азәрбајҹан президенти билдириб.
342/
