Иран илә Түркијәнин Ҹәнуби Гафгазда әмәкдашлығы нә вәд едир? - Тәһлил

АБНА24 Хәбәр Верир, Мәһәммәд Ҹавад Зәрифин диҝәр өлкәләрдән фәргли олараг Анкараја сәфәри вә орада вердији месажлар бөјүк марагла гаршыланыб. Түркијәдә рәсми сәфәри чәрчивәсиндә һәмкары Мөвлуд Чавушоғлу илә ҝөрүшдә Зәриф бәјан едиб ки, јахын заманда Иранда Түркијә вә Азәрбајҹанын хариҹи ишләр назирләри илә топланты кечирәҹәк. О, һәмчинин гејд едиб ки, Иранла Түркијәнин Гафгаз мәсәләсиндәки әмәкдашлығы бөлҝәдә јашајан халгларын вә өлкәләрин хејринә олаҹаг. Зәрифин Түркијәдәки чыхышы әслиндә мөвҹуд атәшкәс режиминин давамлы олмасына вә игтисади әлагәләрин ҹанланмасына јол ачаҹаг, өлкәләр арасында гуру вә дәмир јоллары, енержи кими фәргли саһәләрдә әмәкдашлыг исә реҝионда јени игтисади платформанын тәмәлини даһа да бәркидәҹәк. Бу сәбәбдән дә үч өлкәнин јүксәк чинли рәсмиләринин Теһран ҝөрүшүнү Дағлыг Гарабағдакы сүлһүн узун мүддәтли олмасы, өлкәләр арасында игтисади әлагәләрин даһа да дәринләшмәси вә Гәрбә гаршы бирҝә коалисијанын даһа да мөһкәмләнмәси кими гијмәтләндирмәк олар. Диҝәр тәрәфдән Иранла Түркијәни бир-биринә бағлајан һәм дә Ислам дүнјасынын бир парчасы олмаларыдыр. Бу өлкәләрин әмәкдашлығы вә әлагәләринин ҝенишләнмәсини истәмәјән АБШ, сионист Исраил режими вә Гәрб өлкәләридир. Ики мүсәлман өлкәнин әмәкдашлығы, Јахын Шәрг вә дүнјада сүлһүн тәмин олунмасында бирбаша иштирак етмәси дүнјанын низамыны тәјин етмәјә чалышан гүввәләрин һеч дә хошуна ҝәлмир. Бу сәбәбдән заман-заман Иран Ислам Республикасы вә Түркијә арасында мүәјјән ҝәрҝинликләр вә сојуглуглар јаранса да, сонрадан бу, тез бир заманда јолуна гојулуб. Ики өлкәнин бир-биринә ән чәтин дурумларында дәстәк ҝөстәрмәси дә сијасәтчиләр тәрәфиндән даим ҝүндәмә ҝәтирилир. Бу сәбәбдән Теһран вә Анкаранын Јахын Шәрглә јанашы, Ҹәнуби Гафгаз реҝионунда да әмәкдашлығы вә сүлһүн тәмин олунмасында бирҝә, координасијалы шәкилдә иштиракы реҝион үчүн узун мүддәтли игтисади, сијаси вә сосиал лајиһәләрин баш тутумасыны лабүд едир. 342/