АБНА24 Хәбәр Верир, өлкәмизин Президент Администрасијасынын рәһбәри Маһмуд Ваези Иранла Азәрбајҹан Республикасы арасында игтисади, тиҹарәт вә һуманитар саһәләрдә әмәкдашлыг үзрә Азәрбајҹан Республикасынын дөвләт комиссијасынын һәмсәдри Шаһин Мустафајевлә ҝөрүшүндә билдириб ки, Иранла Азәрбајҹан Республикасы арасында преференсиал (тәрҹиһли) тиҹарәт һаггында сазишин сәнәди там разылашдырылыб. Иран Администрасија рәһбәри гејд едиб ки, артыг јахын 1 ај әрзиндә бу сазиш имзалана биләр. Тәрҹиһли тиҹарәт сазишинин имзаланмасы илә Азәрбајҹан вә Иран арасында әлагәләр даһа да инкишаф едәҹәк. М. Ваези мүштәрәк игтисади комиссијанын фәалијјәтини јүксәк гијмәтләндирәрәк бу комиссијанын иши нәтиҹәсиндә бир чох мәсәләләрин һәлл олундуғуну билдириб: "Бу ҝүнәдәк Иран Президенти Һәсән Руһани илә Азәрбајҹан Президенти Илһам Әлијев арасында 13 ҝөрүш кечирилиб. Рәсми Теһран ҹәнаб Илһам Әлијевин Теһрана нөвбәти сәфәринә ев саһиблији етмәјә һазырдыр. Назирләр сәвијјәсиндә 100-дән чох нүмајәндә ҝедиш-ҝәлиш едиб. Ики өлкә арасында 40-дан чох сәнәд имзаланыб. Бүтүн бунлар әлагәләрин инкишафы үчүн атылмыш аддымлардыр. Коронавирусун јајылмасына ҝөрә мәһдудијјәтләрә бахмајараг Иран вә Азәрбајҹан Республикасы арасында әлагәләр давам етдирилир вә манеәләр арадан галдырылмагла әмәкдашлыг артмагдадыр". Иранын һәр заман Азәрбајҹан Республикасынын әрази бүтөвлүјүнү таныдығыны дејән М. Ваези Азәрбајҹан рајонларынын ишғалдан азад олмасынын севиндириҹи олдуғуну гејд едиб. О билдириб ки, артыг реҝионда јени имканлар јараныб вә бу имканлардан истифадә едиб, игтисади әлагәләри даһа да ҝенишләндирмәк зәрурәти мејдана чыхыб. Јени шәраитдә өлкәләр арасында чохтәрәфли әмәкдашлыг үчүн зәмин јараныб. Иран Администрасија рәһбәри вурғулајыб ки, Гарабағын бәрпасында Иран ширкәтләри дә иштирак етмәјә һазырдыр. Өз нөвбәсиндә, Ш. Мустафајев билдириб ки, Гарабағын ишғалдан азад едилмәси реҝионда јени вәзијјәтин јаранмасына сәбәб олуб. Бу, реҝион дөвләтләринин гаршылыглы игтисади әлагәләр гурмасы үчүн ҝениш имканлар јарадыб. О әлавә едиб ки, Бакы-Нахчыван дәмир јолунун јенидән гурулараг истисмара верилмәси Русија, Азәрбајҹан Республикасы, Иран, Түркијә, Ҝүрҹүстан вә Ермәнистанын бир-бириләри илә игтисади-тиҹарәт әлагәләри јаратмасына имканы верәҹәк. Нәглијјат вә транзит саһәсиндә фајдалы әмәкдашлыг әлагәләри гурулаҹаг. Ш. Мустафајев ики өлкә арасында имзаланан сәнәдләрин иҹрасы үзрә ишләрин давам етдијини дә нәзәрә чатдырыб. Иранла Азәрбајҹан Республикасы арасында преференсиал (тәрҹиһли) тиҹарәт һаггында сазишин имзаланмасы илә Иран вә Азәрбајҹан Республикасы арасында игтисади әлагәләрин инкишафынын даһа да артаҹағыны дејән Мустафајев билдириб: "Мүштәрәк лајиһәләрин иҹрасынын тезләшдирилмәси, о ҹүмләдән Худафәрин бәнди лајиһәсинин вә ики өлкә арасында сәнаје саһәсиндә әмәкдашлығын хүсусилә Иран ширкәтләринин азад олмуш әразиләрин јенидән гурулмасында иштиракы мәсәләләрини ҹидди шәкилдә диггәтдә сахлајаҹағыг".
342/
