Бир ҝүн мәрһум Ахунд Кашинин тәләбәләри ондан “Тәфсири-Кәшшаф” китабыны онлара тәдрис етмәсини хаһиш едирләр. Устад онларла разылашыр. Анҹаг белә бир шәрт гојур ки, һәр ким бу тәфсир дәрсиндә иштирак етмәк истәјирсә, мүтләг өзү илә “Тәфсири-Кәшшаф” китабыны ҝәтирсин. Беләликлә, һәфтәнин мүәјјән бир ҝүнүнү тәфсир дәрсинә ајырырлар.
Гәрар гојулмуш ҝүн ҝәлиб чатыр. Тәләбәләр дәрсдә иштирак үчүн дәрс отағына топлашырлар. Тәләбәләрин арасында тәгва вә мүгәддәсликдә танынмыш бир нәфәр дә вар иди. Һамы она чох һөрмәтлә јанашырды. Һәмин тәләбә шәртә әмәл етмәјиб, о ҝүн өзү илә китаб ҝәтирмәмишди.
Ахунд дәрсинә башлајыр. Сонра ҝөз ҝәздирир ки, ҝөрсүн ким шәртә әмәл едәрәк китаб ҝәтириб вә ким әмәл етмәјәрәк китаб ҝәтирмәјиб. Устад, танынмыш тәләбәнин китаб ҝәтирмәдијини ҝөрүр. Ондан сорушур: - Китабын һардадыр?
Тәләбә “ҝәтирмәмишәм”-дејә ҹаваб верир.
Мәрһум Ахунд ону бәрк данлајыр. Белә ки, бүтүн тәләбәләр устадын тәгвасына шүбһә едирләр вә нараһат олурлар.
Устад әсәбләшәндә һеч кәс ондан бир сөз сорушмаға ҹүрәт етмирди. Һадисәдән бир нечә ҝүн өтдүкдән сонра онун хүсуси вә јахын шаҝирдләриндән бири (заһирән мәрһум Хорасани) устада дејир: - Аға! О тәләбәни сиз нә үчүн бу гәдәр инҹитдиниз? О, тәләбәләр арасында мүгәддәсликдә вә тәгвада мәшһурдур.
Ахунд Каши Һафизин шериндән бу һиссәни охујур:
Сән түк ҝөрүрсән, мән түкүн һөрҝүсүнү
Сән гаш ҝөрүрсән, мән гашын ишарәсини
Устад бундан артыг һеч бир сөз демир вә һеч бир ачыглама вермир.
Бу һадисдән чох кечмир ки, Молла Ахунд Каши вәфат едир. Онун вәфатындан ики һәфтә сонра тәләбәләр мүгәддәсликлә мәшһур олан тәләбәнин вәсаитләринин Тимавәр мәдрәсәсиндән чөлә атылдығынын шаһиди олурлар. Мәлум олур ки, о тәләбә бабилик вә бәһаилијин тәблиғчиси имиш. Устад бәрзәхи ҝөзү илә онун үрәјини ҝөрмүш, зеһнини охумушду.
Бу һадисәдән сонра Устад Ахунд Кашинин тәгвасына шүбһә илә јанашан тәләбәләр төвбә едирләр.
Диггәт: Хәбәрдән истифадә етдикдә мәнбәјә истинад лазымдыр
