Әһли Бејт (әлејһимус-сәлам) - АБНА – Хәбәр Аҝентлијинин вердији хәбәрә әсасән, февралын 3-дә әлијевләр режиминин Ағыр Ҹинајәтләр Мәһкәмәсиндә "Мүсәлман Бирлији" Һәрәкатынын сәдр мүавини Елчин Гасымов, Наһид Гәһрәманов, Аға-Әли Јәһјајев, Сејфәддин Ширванов, Фәрһад Мурадов, Рамил Әлијев, Елҝүн Ахундов, Вүсал Алыш, Иса Ибраһимов, СејмурАсланов, Әли Шаһбазов вә Әмирли Әлијевин ҹинајәт иши үзрә мәһкәмә просеси давам едиб.
Автомобил аиләмә гајтарылсын
Әдаләтсиз һаким Мајыл Бајрамовун сәдрлик етдији иҹласда тәгсирләндирилән шәхсләрдән А. Јәһјаев тәрәфиндән верилән вәсатәт мүзакирә едилиб. Белә ки, өтән иҹласда А.Јәһајев чыхыш едәрәк билдирмишди ки, она мәхсус автомобил истинтаг органы тәрәфиндән мадди сүбут кими ҝөтүрүлүб. Лакин һәмин автомобилин һеч бир ҹинајәтдә васитә кими истифадә едилмәдији мәлумдур. О, өвладынын хәстә олдуғу үчүн автомобилин онун аилә үзвләринә гајтарылмасыны истәјиб. Билдириб ки, автомобили сатыб ушағы әмәлијјат еләтдирмәк истәјирләр. Һәмин мәсәләјә мүнасибәт билдирән прокурор дејиб ки, бу мәсәләјә мәһкәмә һөкм заманы гијмәт верә биләр.
Мәһкәмә јериндә мүшавирә едәрәк вәсатәти тәмин етмәјиб.
Мәһкәмәнин гәрары исә тәгсирләндирилән шәхсләр тәрәфиндән наразылыгла гаршыланыб. А.Јәһјајев мәһкәмәнин вәсатәти тәмин етмәјәҹәјини билдикләрини дејиб:
Биз ушағын мүалиҹәси үчүн ону истәмишдик. О машын мадди сүбут дејил.
Һаким исә билдириб ки, бу мәсәлә онларын сәлаһијјәтиндә дејил:
"Бизә мүраҹиәт един, биз дә Сәһијјә Назирлијинә мүраҹиәт едәк, ушағы әмәлијјат етсинләр".
Јәһјајев исә индијә кими бүтүн гурумлара мүраҹиәт етдикләрини дејиб: "Һејдәр Әлијев Фондуна мүраҹиәт етдик, имтина етдиләр. Бизим ана-баҹымызла, аиләмизлә мүбаризә апарырлар. Әҝәр сиз дә команда илә ҝәлиб һөкм охујаҹагсынызса, бу шоуну тез битирин".
Даһа сонра А.Јәһјајев вәкилин вә дөвләт иттиһамчысынын суалларыны ҹавабландырыб. Билдириб ки, Елчин Гасымовла мүнасибәтләри олдуғу үчүн онун һәбс хәбәрини ешидән кими Сабунчу рајон Полис Идарәсинин гаршысына ҝедиб:
"Орада мәни тутуб идарәјә апардылар. Ҝөзүмә о гәдәр вурмушдулар, һеч нәји ҝөрмүрдүм. Инди дә һәмин зәдәләр галыр. Мүстәнтиг ҝәлиб бизи сөјүб тәһгир едиб деди ки, "мәним ахшам ҝөрүшүм вар иди, јемәк-ичмәјә ҝедәҹәкдим, сиз һәр шеји корладыныз". Орада полисләр адамлары сыхышдырырдылар, биз полисләрә һәр һансы мүгавимәт ҝөстәрмәмишдик" .
"Бандотдел"дә дедиләр ки, биз ксерокопија"јыг
Даһа сонра тәгсирләндирилән шәхсләрдән Наһид Гәһрәманов ифадә вериб. О, иттиһамлары сахта вә әсассыз һесаб едиб:
""Бандотдел"дә дедим ки, ифадәни дүзҝүн јазмамысыныз. Дедиләр ки, биз "ксерокопија"јыг. Нә дејирләр, ону едирик. Дедим, бәс гол чәкмәсәм нә олаҹаг? Дедиләр, сән гол чәкмәјә билмәзсән".
Н. Гәһрәманов бундан әввәл "Һиҹаба азадлыг" акисјасында тутулдуғуну, 2014-ҹү ил 30 декабрда әфв сәрәнҹамы илә азадлыға чыхдығыны дејиб:
"Һәбсдә оланда Аға-Әли Јәһјајевлә таныш олмушдум. Азадлыға чыхандан сонра онунла ҝөрүшдүм. Деди ки, "Мүсәлман Бирлији" адлы тәшкилат јарадылыр. Мән дә гошулдум. Тәшкилатын сәнәдләшмә ишләрини өзүм етмишәм. Бүтүн сәнәдләри апарыб Әдлијјә Назирлијинин Нотариус Идарәсинә вердим. Орада Фатимә Сәлимзадә адлы ханымдан сорушдум ки, биз ҹаваблар ҝәләнә гәдәр фәалијјәт ҝөстәрә биләрикми? Онун ҹавабы мүсбәт олду. Биз дә фаәлијјәт ҝөстәрдик. Инди дејирләр ки, ганунсуз фәалијјәт ҝөстәрмисиниз. Һиҹабла бағлы проблем оланда биз јүз миндән чох имза топлајыб президентә ҝөндәрдик ки, бу мәсәләни һәлл етсин. Лакин бизә һеч бир ҹаваб верилмәди".
Азәрбајҹанда фикирә ҝөрә ҹәза верирләр
Н.Гәһрәманов бир нечә ил әввәл Тәһсил Назирлијинин гаршысында кечирилән аксијаларда баш верән полис зоракылығындан да данышыб:
"Тәһсил Назирлијинин гаршысында илк дәфә динҹ аксија кечирәндә полисләр бизим ханымлары сүрүдүләр. Президентин анд ичдији "Гуран"ы тапдаладылар. Ондан сонракы аксијада полисләр дөјүләндә дедиләр, бу агрессија һардандыр? Мән дә дедим, кечән дәфә гадынлары сүрүјүб, "Гуран"ы тапдаламағын әвәзидир. Азәрбајҹанда фикирә ҝөрә ҹәза верирләр. Биз һәр заман интиһары писләјән, наркоманијаја гаршы олан чыхышлар етмишик. МТН-ә мәни чағырыб дејирдиләр ки, Бинәгәдидә орта мәктәбләрдә һәр ај ики килограм һероин сатылырды. Сиз нә етмисиниз ки, јарым килоја дүшүб? АНС "Хоҹа" филмини мәнә 200 маната сатмышды. Ону апарыб мәктәбләрдә нүмајиш етдирирдик ки, вәтәнпәрвәрлик руһу јүксәк олсун".
Сәрдарын башына һава ҝәлмишди
Н.Гәһрәманов Нардаран һадисәләри заманы өлдүрүлән полисләрин диндар олдугларыны дејиб:
"Нардаранда нијә ики полиси өлдүрдүләр? Чүнки онларын шәрәфсиз сыраларына лајиг дејилдиләр. Һадисәдән әввәл өлән полисләрдән бири - Исмајл Зүлфүгар Микајылова зәнҝ едиб дејиб ки, "һаҹы мәнә дуа елә, горхурам, мөмүнләрин үзәринә ҝетмәк истәмирәм". Һәр ики полис намаз гылан олуб вә телефонларыны изләјибләр. Буна ҝөрә дә онлары өлдүрдүләр. Нардаран һадисәләриндән сонра Сәрдар Бүнјадовҝилә ҝетдим. Ораја јас мәрасиминә ҝетмишдим. Һадисә баш верән евин јијәси Әбүлфәз Сәрдарын әмисиоғлудур. Һәмин вахт һүҹум етдиләр. Евә елә ҝирдиләр, елә бил ермәни евинә ҝирирләр. Гадын, ушаг - һамысы горхмушду. Сәрдарын башына һава ҝәлмишди. Ҝедиб јағышын алтында дуруб намаз гылырды. Јазыблар ки, ҝуја мән һәмин евдә тәзә ҝәлинин јатаг отағында силаһ ҝизләтмишәм. Бир өзүнүз фикирләшин, Нардаранда буну неҹә етмәк олар? Мән һәмин отаға неҹә ҝирә биләрәм? Орадан мәни тутуб апардылар Сабунчу рајон Полис Идарәсинә. Рәшад адлы тәдгигатчы башлады нардаранлылары, шәһидләри сөјмәјә. Орада јерә јыхыб дөјдүләр вә тока вердиләр. Сонра "Бандотдел"ә апардылар. Орада мәни Фәхри адлы мүстәнтигә тәһвил вердиләр. Идарәнин рәиси Сејфулла ҝәлиб деди ки, онларла әмәкдашлыг етмәлијәм. Деди: "Әҝәр етмәсән, бурадан мејитин чыхаҹаг". Буну дејиб ҝедәндән сонра Фәхри сорушду: "Баша дүшдүн?" Дедим ки, јох. Башлады дәјәнәклә башыма вурмаға. Сонра тапшырды ки, мәни зирзәмијә апарсынлар. Бир ҝүн орада галандан сонра бешинҹи мәртәбәјә галдырдылар. Орада Елман Бајрамов мәни сорғу-суал етди. Дејирди: "Ирандан сизә 2 милјон доллар пул ҝәлиб ки, чеврилиш едәсиниз". Мән дә дедим ки, елә бир шеј олмајыб. Башлады ки, сиз аҝентсиниз, ермәнисиниз, сатгынсыныз. Дедим, сиз мәни тикә-тикә дә еләсәниз дә, Талеһин әлејһинә ифадә вермәјәҹәм. Мәним ајағымын алтына о гәдәр вурмушдулар ки, јерә гоја билмирдим. 2 ај орада мәнә ишҝәнҹә вердиләр. Башыма торба кечириб дөјүрдүләр. Мән һеч нә һисс етмирдим. Аллаһын мәләкләри мәни горујурду. Башымдакы торбаны чыхаранда ҝөрүрдүләр ҝүлүрәм, дәли олурдулар. Бир мүддәт кечәндән сонра дедиләр ки, сиз Американын адамларысыныз. Дедим: "Биз һара, Америка һара?" Дедиләр, јох, Ҹәмил Һәсәнли дебатда Талеһин адыны чәкиб. Өзү дә Милли Шура үзвүдүр. Даһа сонра дедиләр, Талеһин мүраҹиәт китабчасыны сән јазмысан. Кәрим Әлимәрданов ҝәлиб отурурду, дејирди: "Нијә сәнин башында сач вар, мән кечәләм?" Дејирдим, мән һардан билим? Башлајырды башыма дәјәнәклә вурмаға. Прокурорлуг әмәкдашы бизи сорғу-суала ҝәләндә дуа едирди. Дејирдиләр, Аллаһ көмәјиниз олсун. Ики ајдан сонра өзүмү лифтин ҝүзҝүзүсүндә ҝөрәндә горхдум. Бир шеји дејим ки, бунларын һамысы чарын ишидир. О, дүјмәни басмаса, бунлар олмазды. Мүстәнтигә дедим ки, ифадәми дүзҝүн јаз. Деди, мән дүзҝүн јазсам ишдән чыхараҹаглар, башгасы ҝәлиб истәдикләрини јазаҹаг. Бу, сифаришли ишдир вә белә олмалыдыр. Мүбариз ҝедиб ермәниләри өлдүрдү. Онлар онун мејидинә һөрмәтсизлик етмәдиләр. Бизимкиләр Нардаранда өлдүрүлән Әкбәрин мејитинин намәһрәм јерләринә насист ишарәләри чәкиб бүтүн каналларда ефирә вердиләр".
Дедим, ушағы бурахын, мәни тутун
Даһа сонра иҹласда Әмирли Әлијев ифадә вериб. Билдириб ки, ону ики оғлу вә гардашы оғлу илә бирликдә тутублар:
"Мән дә дедим ки, ушаглары бурахын, мәни тутун. Дедим: "Бир түфәнҝдән-заддан јазарсыныз". Ҝөтүрүб 11 маддә илә иттиһам верибләр. Билмирәм ҝүнаһым нәдир. Билсәм, дејәрдим. Мән тиҹарәтлә мәшғул олмушам, террорчу дејиләм. Өвладларымы горумаг үчүн јазыланлары имзаламышам. Талеһи танымамышам".
Просес февралын 10-да давам едәҹәк.
Хатырлатма
Елчин Гасымов вә онунла бирликдә һаким өнүнә чыхарыланлар террорчулуға чағырыш, һакимијјәт нүмајәндәсинин тәләбләринә табе олмама, күтләви иғтишашларын тәшкили, силаһ-сурсат сахлама вә башга әмәлләрдә сучланырлар.
Мүсәлман Бирлији Һәрәкатынын сәдри Талеһ Бағыров 2015-ҹи илин нојабрын 26-да Нардаранда кечирилмиш әмәлијјат заманы һәбс олунуб. Бакы Ағыр Ҹинајәтләр Мәһкәмәсиндә Талеһ Бағыров вә онунла бирликдә мүһакимә олунан 17 нәфәрин мәһкәмәси јанварын 25-дә јекунлашыб. Илаһијјатчыја 20 ил һәбс ҹәзасы кәсилиб.
Диггәт: Хәбәрдән истифадә етдикдә мәнбәјә истинад лазымдыр
