Әһли Бејт (әлејһимус сәлам) -АБНА- Хәбәр Аҝентлији- Имам Һүсејни (ә) хатырламаг, илдә бир дәфә Мәһәррәм ајында ону јад етмәк бизләрә Һәзрәт Пејғәмбәрдән (с) мирас галыб. О Һәзрәт дә һәјаты боју Кәрбәлада баш верәҹәк бу гәтлиамы јад едәрәк ағлајыб. Һәтта бир ҝүн гызы Фатимеји-Зәһраја белә бујуруб: “Һәр ким балам Һүсејнә ағласа, биз Гијамәт ҝүнү онун Ҹәннәтә дахил олмасына заминик”.
Ҝөрүндүјү кими, Һәзрәт Пејғәмбәр (с) һәлә сағлығында баш верәҹәк Кәрбәла шәһадәтинә гијмәт вермиш вә Имам Һүсејнә (ә) ағлајан гәлбләрин Гијамәт ҝүнү Ҹәннәтлә мүкафатланаҹағыны билдирмишдир. Лакин чох тәәссүф ки, бәзи һалларда Пејғәмбәр (с) дининин давамчылары онун бујурдуғуну әһәмијјәтсиз бир мәсәлә кими гәбул едирләр.
Тарихдә Кәрбәла һадисәсинә Имам Һүсејн (ә) вә Језид арасында дөјүш кими јох, ики иддианын тоггушмасы кими бахмаг лазымдыр. Имам Һүсејн (ә) һагг вә әдаләтин иддиасында, Језид зүлм вә гәсбкарлыг тәләбиндә иди. Имам Һүсејн (ә) һаггын, әдаләтин, азадлығын ҹарчысы, Језид исә батилин, зүлмүн тәрәфдары иди.
Тарих боју бу ики идеја даим гаршы-гаршыја олуб, әдаләт зүлмә гаршы мүбаризә апарыб, залым да өз зүлмүндә мүбаризәјә мүгавимәт ҝөстәриб. Имам Һүсејн (ә) зүлмә гаршы мүбаризә апарыр вә дејирди: “Мән ҹәддимин үммәти арасында ислаһат апармаг үчүн ајаға галхмышам вә бу мүбаризәни ганымын баһасы һесабына белә олса да һагг олдуғу үчүн давам етдирәҹәјәм”.
Һеч шүбһәсиз әҝәр о Һәзрәт бу мүбаризәдә ҝери чәкилсәјди, зүлм вә залымлара ҝөз јуммушлардан олар, гәлбләрдә мүгәддәслијини һеч вәҹһлә уҹалда билмәзди.
Мәһәррәм ајы дахил оланда Имам Һүсејн (ә) елә бил јенидән доғулур, јенидән дирилир вә дејир: “Һүсејн вә зилләт?! Һүсејн һеч вахт зилләтә дөзмәз. Һејһат! Биз (Әһли-бејт) һара, зилләт һара?! Аллаһ зилләти бәјәнмир. Мәнә Зәһра (ә) сүд вериб, мән Зәһранын (ә) гуҹағында бөјүмүшәм, биз зилләтә, алчаглыға дөзмәрик”. Бу сөзләр Имам Һүсејнин (ә) ганла јаздығы сөзләрдир вә Гијамәтә гәдәр јашајаҹаг. Неҹә ки, јашајыр…
Инҝилис шәргшүнасы, профессор Едвард Браун Кәрбәла һадисәси илә бағлы белә јазыр: “Ҝөрәсән, елә бир шәхс тапылар ки, Кәрбәла һадисәсини ешидә, онун үрәји гәмлә, кәдәрлә долмаја?”
Бәзи әһли-дилавәрләр исә Кәрбәла һадисәсини вә хүсусән дә Имам Һүсејнин (ә) шәһадәтини әһәмијјәтсиз бир һадисә кими гијмәтләндирирләр. Онларын ән радикал груплары һесаб едир ки, Имам Һүсејн (ә) һаглы јерә өлдүрүлмүшдүр. Чүнки о, ваһид рәһбәрә гаршы чыхмыш вә мүсәлманларын бирлијини позмаға чалышмышдыр. Һәтта буна дәлил олараг Пејғәмбәрдән (с) һәдис дә ҝәтирирләр: "Сизин ваһид рәһбәриниз олдуғу һалда кимсә ҝәлиб сизи парчаламаг истәсә кимлијиндән асылы олмајараг ону өлдүрүн". (Сәһиһ Мүслим, Китаб әл-Имарә, № 1852.)
Јахшы, әҝәр беләдирсә, бәзи Ислами тәригәтләрин нүмунәви сәһабә кими Ислама дүртүштүрмәјә чалышдығы Мүавијә нијә Һәзрәт Әлијә (ә) бејәт етмәди. Будурму сизин вәһшәт сачан әдаләтиниз?
Ҹәннәт ҹаванларынын ағасыны сусуз бир чөлдә гәтлә јетирән хәлифә вәһабиләрин ҝөзүндә нүмунәви сәһабәјә чеврилир. Ахы, Пејғәмбәр (с) бујуруб: "Һәсән вә Һүсејн ҹәннәт ҹаванларынын ағасыдыр". (Тирмизи, Китаб әл-Мәнагиб, Баб Мәнагиб әл-Һәсән вәл Һүсејн, № 3768.)
Будурму, сизләрин әһли-бејтә сүннә нөгтеји-нәзәрдән севҝиниз...
Имам Һүсејнин (с) өлдүрүлмәсиндә Језидин әли олмадығыны билдирирләр. Бәс, Убејдуллаһ ибн Зијады Имамын үзәринә ҝөндәрән ким иди?
Мүавијә оғлу Језидин зүлмү о јерә чатды ки, артыг Имам Һүсејн (ә) өз доғма вәтәни Мәдинә шәһәриндә јашаја билмәјиб Мәккәјә көчмәк мәҹбуријјәтиндә галды. О, бүтүн әһл-әјалыны да өзү илә апарырды. Мәдинә шәһәриндән чыхмамышдан габаг гардашы Мәһәммәд Һәнәфијјәјә јаздығы мәктубунда өзүнүн мәгсәдини – зүлм вә күфрә гаршы чыхдығыны белә бәјан едирди: “Дүнја әһли билсин ки, сәлтәнәтә јетишмәјә чалышан јаланчы, үсјанчы, дава-далашчы, мәгампәрәст, залым дејиләм вә белә мәгсәдләрим дә јохдур. Мән јалныз ислаһ тәләб едир, бу јолда гијам галдырырам. Мән өз бабамын үммәтини – мүсәлманлары нәһј әз-мүнкәр (писликләрдән чәкиндирмәк, јахшылыға тәрәф апармаг) истәјирәм”.
Тәәссүф ки, Кәрбәла һадисәсини идеја вә әгидә ҹарчысы јох, рәјасәт вә мүлкијјәтин савашы кими гәләмә вермәјә чалышанлары да ҝөрмәмәк олмур. Достлар, әҝәр белә олсајды, Имам Һүсејн (ә) Језидин она тәклиф етдији Јәсриб вилајәтини, ҹәддинин шәһәрини – Мәдинәни тәрк етмәз, сусуз Кәрбәла чөлүнә ҝетмәзди. Әҝәр мүлкијјәт вә рәјасәт үстүндә мүбаризә ҝетсәјди, онлар асанлыгла бөлҝүләрә разылыг вериб, араларында јаранмыш проблеми һәлл едәрдиләр. Лакин бу һеч дә белә дејилди. Бу мүбаризә дин вә әгидә үзәриндә гурулмушдур.
Имам Һүсејн (ә) Исламын мејары олан иманын рәһбәри, Језид исә күфрүн нүмајәндәси иди. Имам Һүсејн (ә) ҹәддинин ҝәтирдији Ислам шәриәтини олдуғу кими јашатмаг истәјирди. Језид исә бүтпәрәстлији, гумары, зинаны, шәрабхорлуг вә бу кими Исламын јасаг етдикләрини бәрпа етмәк истәјиндә иди.
Имам Һүсејн (ә) ҹәддинин ҝәтирдији шәриәтин һәјатда галмасы үчүн бүтүн варындан, гардашларындан, өвладларындан кечди. О дејирди: “Әҝәр ҹәддимин шәриәти мәним өлмәјимлә дири галарса, еј гылынҹлар, ҝәлин мәни доғрајын”.
Нијаз Нифтијев
Диггәт: Хәбәрдән истифадә етдикдә мәнбәјә истинад лазымдыр
