Әһли Бејт (әлејһимус сәлам) -АБНА- Хәбәр Аҝентлијинин вердији хәбәрә әсасән, Азәрбајҹан Республикасы Милли Тәһлүкәсизлик Назирлији тәрәфиндән һәјата кечирилмиш әмәлијјат-ахтарыш тәдбирләри нәтиҹәсиндә, Азәрбајҹанын ганунвериҹилији илә нәзәрдә тутулмајан силаһлы бирләшмәләр вә ја груплар јаратма, еләҹә дә онларын јарадылмасында вә фәалијјәтиндә иштирак етмә, онлары силаһла, дөјүш сурсаты илә, партлајыҹы маддәләрлә, һәрби техника илә, јахуд әсҝәри ләвазиматла тәҹһиз етмә, һабелә, тәрбијә етмәк вәзифәсини дашыјан шәхс кими јеткинлик јашына чатмајан шәхси ағыр ҹинајәтин төрәдилмәсинә ҹәлб етмә вә башга һүгугазидд әмәлләринин төрәдилмәсинә ҝөрә үмумиликдә 26 нәфәр һәбс олунуб.
Азәрбајҹан вәтәндашы -Јусифов Фирдовси Солтан оғлу, Солтанов Талеһ Әзизаға оғлу, Һәсәнли Вилајәт Әләсдан оғлу, Мусајев Малик Елчин оғлу, Һаҹыјев Васиф Ордухан оғлу, Бабазадә Илкин Ајдын оғлу, Балакишијев Меһман Пирбала оғлу, Мустафајев Руслан Азәр оғлу, Мәммәдов Намиг Фирдовси оғлу, Мурадов Фәрид Ариф оғлу, Һәсәнов Турал Намиг оғлу, Әлијев Елвин Вилајәт оғлу, Мустафајев Таријел Тапдыг оғлу, Гәмбәров Азәр Асим оғлу, Бајрамов Вүсал Габил оғлу, Һәшимов Самир Самид оғлу, Аббасов Ниҹат Фаиг оғлу, Мәммәдов Һүсејн Хәгани оғлу, Ҹәфәров Руслан Илһам оғлу, Бахышов Сәнан Илгар оғлу, Гулијев Елдост Фирудин оғлу, Мәммәдәлијев Мәммәдшаһ Ағашаһ оғлу, Һәсәнов Әһмәд Елхан оғлу, Мәрданов Маариф Иршад оғлу, Дурсунәлијев Вүгар Әһәд оғлу вә Гурбанлы Елшән Әбүлфәт оғлу шүбһәли шәхс гисминдә тутулублар.
Фактларла бағлы Милли Тәһлүкәсизлик Назирлији Истинтаг Баш Идарәси тәрәфиндән АР Ҹинајәт Мәҹәлләсинин 12.1, 279.1-ҹи вә 170.3-ҹү маддәләри илә ҹинајәт ишләри башланылмышдыр. Адлары гејд едиләнләр тәгсирләндирилән шәхс гисминдә ҹәлб олунараг мәһкәмәнин гәрарлары илә барәләриндә һәбс гәтимкан тәдбири сечилиб.
Мүәјјән едилиб ки, Фирдовси Јусифов вә Талеһ Солтанов Пакистан Ислам Республикасынын әразисиндә һәмин дөвләтин вә Азәрбајҹан Республикасынын ганунвериҹилији илә нәзәрдә тутулмајан силаһлы бирләшмәләрин фәалијјәтиндә иштирак едибләр.
Белә ки, Фирдовси Јусифов Пакистан Ислам Республикасынын әразисиндә јарадылмыш ганунсуз силаһлы бирләшмәнин фәалијјәтиндә иштирак етмәк мәгсәдилә 2011-ҹи илин орталарында Иран Ислам Республикасына ҝедәрәк, ганунсуз јолла Пакистанын Вәзиристан вилајәтинә кечмиш вә орада «Тәһрики Талибан» адлы ганунсуз силаһлы бирләшмәнин табелијиндәки «Тајфатул Мансура» адлы силаһлы дәстәнин "әмири” тәјин едиләрәк, һәмин силаһлы дәстәнин тәркибиндә 2013-ҹү илин август ајынадәк фәалијјәт ҝөстәриб.
Һәмчинин мүәјјән едилиб ки, Талеһ Солтанов да Пакистан Ислам Республикасынын әразисиндә јарадылмыш ганунсуз силаһлы бирләшмәнин фәалијјәтиндә иштирак етмәк мәгсәди илә 2012-ҹи илин сонларында Азәрбајҹандан Ирана ҝедәрәк, орадан гејри-легал јолла Пакистана кечмиш вә «Тәһрики Талибан» адлы ганунсуз силаһлы бирләшмәнин табелијиндәки «Сејфуллаһ» адлы диҝәр силаһлы дәстәдә 2013-ҹү илин август ајынадәк иштирак едиб. Талеһ Солтанов Пакистана ҝедәркән јени аилә һәјаты гурдуғу арвадыны, һәмчинин гајынанасыны да өзү илә ҝөтүрмүш вә онлары әввәлҹәдән Ирандан Пакистанын Вәзиристан әразисинә ҝөндәриб. Пакистанда Фирдовси Јусифов вә Талеһ Солтанов таныш олараг бирликдә ганунсуз силаһлы бирләшмәләрдә иштирак етдикдән сонра Сурија Әрәб Республикасынын әразисиндә фәалијјәт ҝөстәрән ганунсуз силаһлы бирләшмәләрдә иштирак етмәк гәрарына ҝәлибләр. Онлар бу мәгсәдлә 2013-ҹү илин август ајында Пакистандан Иран әразисинә ганунсуз кечәркән јерли һүгуг мүһафизә органлары тәрәфиндән јахаланмыш вә 2014-ҹү ил апрелин 24-дә Азәрбајҹан Республикасына тәһвил верилмишләр. Талеһ Солтановун арвады вә гајынанасы исә Сурија әразисиндә ганунсуз силаһлы бирләшмәләрдә иштирак едән шәхсләрлә әввәлҹәдән әлдә олунмуш разылыға әсасән, онларын көмәклији илә бу өлкәјә кечирилмишләр. Иранда һәбсдә олдуғу мүддәтдә Талеһ Солтановун Суријада өвлады олмуш вә һазырда онун аилә үзвләри гызғын дөјүшләрин ҝетдији әразиләрдә галыблар.
Тәгсирләндирилән диҝәр шәхсләр - Вилајәт Һәсәнли, Малик Мусајев, Васиф Һаҹыјев, Илкин Бабазадә, Меһман Балакишијев, Руслан Мустафајев, Намиг Мәммәдов, Фәрид Мурадов, Турал Һәсәнов, Елвин Әлијев, Таријел Мустафајев, Азәр Гәмбәров, Вүсал Бајрамов, Самир Һәшимов, Ниҹат Аббасов, Һүсејн Мәммәдов, Руслан Ҹәфәров, Сәнан Бахышов, Елдост Гулијев, Мәммәдшаһ Мәммәдәлијев, Әһмәд Һәсәнов вә Маариф Мәрданов 2013-ҹү илдән 2014-ҹү илин мүхтәлиф ајларынадәк Сурија Әрәб Республикасынын әразисиндә һәмин дөвләтин вә Азәрбајҹан Республикасынын ганунвериҹилији илә нәзәрдә тутулмајан силаһлы бирләшмәләрин фәалијјәтиндә иштирак едибләр.
Вүгар Дурсунәлијев тәрбијә етмәк вәзифәсини дашыјан шәхс кими јеткинлик јашына чатмајан шәхси ағыр ҹинајәтин төрәдилмәсинә ҹәлб етмишдир. Белә ки, Вүгар Дурсунәлијев јеткинлик јашына чатмајан оғлу, 1998-ҹи ил тәвәллүдлү Елвин Дурсунәлијевдә радикал дини бахышларын даһа да мөһкәмләндирилмәси мәгсәди илә онда Суријада фәалијјәт ҝөстәрән ганунсуз силаһлы бирләшмәләрин тәркибиндә иштирак етмәк арзусу јарадараг, Елвини һәмин силаһлы бирләшмәләрин тәркибинә гошулмагла ағыр ҹинајәт төрәтмәси үчүн бүтүн нәглијјат хәрҹләрини өдәмәклә Суријаја ҝөндәриб. 15 јашлы Елвин Дурсунәлијев дә 2013-ҹү илин декабр ајындан 2014-ҹү илин апрел ајынадәк Сурија Әрәб Республикасынын әразисиндә һәмин дөвләтин вә Азәрбајҹан Республикасынын ганунвериҹилији илә нәзәрдә тутулмајан силаһлы бирләшмәнин фәалијјәтиндә иштирак едиб.
Елшән Гурбанлы гејриләри илә бирликдә Сурија Әрәб Республикасынын вә Ираг Республикасынын әразиләриндә ганунсуз силаһлы бирләшмәләрин фәалијјәтиндә иштирак етмәк мәгсәдилә 2014-ҹү илин мај ајында Түркијә Республикасына, бурадан исә "Әбу-Бәкр” ләгәбли шәхсин васитәсилә ганунсуз јолла Сурија Әрәб Республикасына ҝедиб. Елшән Гурбанлы Сурија, Ираг вә Азәрбајҹан республикаларынын ганунвериҹиликләри илә нәзәрдә тутулмајан "Ираг-Шам Ислам Дөвләти” – "ИШИД” адлы ганунсуз силаһлы бирләшмәнин өзүнүн пајтахты елан етдији Суријанын Рагга шәһәриндә ганунсуз силаһлы бирләшмәләрә гошулараг радикал дини вә һәрби тәлимләр кечмишдир. Тәлимләр битдикдән сонра бөлҝү заманы Елшән Гурбанлы өз истәјилә шәхсијјәти истинтагла арашдырылан "Хаттаб” ләгәбли "әмир”ин рәһбәрлик етдији "Азәри ҹамааты” адлы ганунсуз силаһлы дәстәнин тәркибинә дахил олуб. Бундан сонра Елшән Гурбанлы вә диҝәрләри "ИШИД” адлы ганунсуз силаһлы бирләшмәнин тәркибиндә 2014-ҹү илин август ајында Ирагын Анбар вилајәтинин Һәдисә шәһәри әтрафындакы һәрби әмәлијјатларда иштирак етмишләр. Бу һәрби әмәлијјатлар заманы силаһлы дәстә тәрәфиндән һүҹум планлашдырыларкән баш вермиш партлајыш нәтиҹәсиндә 35 нәфәр мәһв олмуш, Елшән Гурбанлы исә јараланараг, сағ галмыш диҝәр јараглыларла бирликдә Сурија әразисинә гајыдыб.
Ҹинајәт ишләри үзрә бүтүн һалларын арашдырылмасы, бу һүгугазидд әмәлләрин диҝәр иштиракчыларынын мүәјјәнләшдирилмәси истигамәтиндә истинтаг-әмәлијјат тәдбирләри давам етдирилир.
Мәлумат үчүн бир даһа билдирилир ки, Азәрбајҹан Республикасынын ганунвериҹилији илә нәзәрдә тутулмајан силаһлы бирләшмәләр вә ја груплар јаратма, еләҹә дә онларын јарадылмасында вә фәалијјәтиндә иштирак етмә, онлары силаһла, дөјүш сурсаты илә, партлајыҹы маддәләрлә, һәрби техника илә, јахуд әсҝәри ләвазиматла тәҹһиз етмә, террорчулуг, јәни дөвләт һакимијјәти органлары вә ја бејнәлхалг тәшкилатлар тәрәфиндән гәрар гәбул едилмәсинә тәсир ҝөстәрмәк мәгсәдилә инсанларын һәлак олмасы, онларын сағламлығына зәрәр вурулмасы, әһәмијјәтли әмлак зијанынын вә ја башга иҹтимаи тәһлүкәли нәтиҹәләрин баш вермәси тәһлүкәси јарадан партлајыш, јанғын вә ја диҝәр һәрәкәтләр төрәтмә, һабелә һәмин мәгсәдлә бу ҹүр һәрәкәтләрин төрәдиләҹәји илә һәдәләмә, һәмчинин Азәрбајҹан Республикасы вәтәндашлары вә ја Азәрбајҹан Республикасында даими јашајан вәтәндашлығы олмајан шәхсләри дини мәһзәбләри јајмаг, дини ајинләрин иҹрасы ады алтында, јахуд дини дүшмәнчилик зәмининдә Азәрбајҹан Республикасынын һүдудларындан кәнарда апарылан силаһлы мүнагишәләрә ҹәлб етмә, јахуд бу мәгсәдлә дөјүш тәлимләри кечмә, јахуд һәмин мәгсәдлә фәалијјәт ҝөстәрән сабит груп јаратма вә ја белә група рәһбәрлик етмә, еләҹә дә һәмин групларда, тәлимләрдә вә ја силаһлы мүнагишәләрдә иштирак етмә һүгугазидд әмәлләрин төрәдилмәсинә ҝөрә ганунвериҹиликлә мүәјјән едилмиш ҹәза мүддәтләри артырылараг 20 ил вә ја өмүрлүк азадлыгдан мәһруметмә ҹәзасына мәһкуметмә илә ҹәзаландырылыр.
Диггәт: Хәбәрдән истифадә етдикдә мәнбәјә истинад лазымдыр
