Әһли Беjт (әлеjһимус сәлам) -АБНА- Хәбәр Аҝентлиjинин вердиjи хәбәрә әсасән, Президент Администрасиjасы рәһбәринин мүавини вә хариҹи әлагәләр шөбәсинин мүдири Новруз Мәммәдов рәсми Бакынын Авропа Иттифагы илә интеграсиjадан имтина етдиjинә ишарә вуруб. АИ-нин “Шәрг Тәрәфдашлығы” өлкәләри илә бу jахынларда Вилнүсдә кечириләҹәк саммити барәдә данышан Мәммәдов деjиб:
“Авропа Иттифагы илә әмәкдашлығымызын мүһүм мәрһәләләриндән бири - Вилнүс саммити кечирилмәлидир. Инди биз дүшүнүрүк, ора нә үчүн ҝетмәлиjик? Бу ҝүнә гәдәр Авропа Азәрбаjҹан үчүн нә едиб? Бу ҝүнә гәдәр Гәрб Азәрбаjҹан үчүн нә едиб?”.
Хатырладаг ки, буҝүнләрдә һакимиjjәтә jахын бир нечә КИВ рәһбәрләри вә иҹтимаиjjәт нүмаjәндәси дә Илһам Әлиjевә мүраҹиәт едәрәк “Шәрг Тәрәфдашлығы” програмындан имтинаjа, Вилнүс саммитиндә иштирак етмәмәjә чағырмышдылар. Сиjаси тәһлилчиләр бу чағырышын Президент Администрасиjасындан тәшкил олундуғуна шүбһә етмирләр. Ҝөрүнүр, һакимиjjәт Авропа илә әмәкдашлыгдан имтинасыны иҹтимаиjjәтин мөвгеjи илә әсасландырмаға чалышыр.
Н.Мәммәдовун сон ачыгламасыны исә артыг бу имтинанын анонсу кими гәбул етмәк олар.
АХҸП Рәjасәт Һеjәтинин үзвү, сиjаси шәрһчи Сеjмур Һәзи һесаб едир ки, Новруз Мәммәдовун Авропа Иттифагыны иттиһам едәрәк гурумун Вилнүсдә кечирилән самитинә Азәрбаjҹанын гошулмаjаҹағыны бәjан етмәси мүәjjән гәдәр ҝөзләнилән иди. Чүнки Азәрбаjҹан һөкумәти баша дүшүр ки, артыг сивил дүнjада һеч кимлә ҹидди тәрәфдашлыг етмәк имканы галмаjыб. Игтисади, сиjаси вә тәһлүкәсизлик истигамәтләри үзрә бүтүн тәрәфдашлары илә шантаж дилиндә данышан рәсми Бакынын сиjаси драматизми елә бир һәддә чатыб ки, Илһам Әлиjев президент елан олунандан сонра ону ҹәми 21 дөвләт вә һөкумәт рәһбәри тәбрик едиб. Нәзәрә алмаг лазымдыр ки, тәкҹә Ислам Конфрансы Тәшкилатынын 57 үзвү вар. Бу, Азәрбаjҹан һөкумәтинин тәкҹә Гәрблә деjил, һәм дә Ислам дүнjасы илә ҹидди проблемләр ичәрисиндә олдуғунун ҝөстәриҹисидир.
Експертин сөзләринә ҝөрә, бу ҹүр мәсәләләрдә ҝуjа ҹәмиjjәтин сиjаси һакимиjjәти дәстәкләдиjини ҝөстәрмәк үчүн игтидара jахынлығы илә сечилән, иҹтимаи рәjә һеч бир тәсири вә аидиjjәти олмаjан шәхсләрин Илһам Әлиjевә Авропа Иттифагы илә мүнасибәтләрә даир мүраҹиәти һакимиjjәтин ҝениш мәнада өзүнә гапылдығыны вә бөһрандан чыхыш jоллары тапа билмәдиjини ҝөстәрир. Әҝәр белә олмасаjды, Авропа Бирлиjи кими ҹидди беjнәлхалг тәшкилатла мүнасибәтләри һеч кимин танымадығы шәхсләрин “мөвгеjинә” уjғунлашдырмазды. Бүтүн бунлар бир даһа тәсдиг едир ки, Илһам Әлиjев вә командасы дүнjанын онларла әмәкдашлыг етмәjәҹәjини анлаjыр.
Диггәт: Хәбәрдән истифадә етдикдә мәнбәjә истинад лазымдыр
