Әһли Бејт (әлејһимус сәлам) -АБНА- Хәбәр Аҝентлијинин вердији хәбәрә әсасән дүнән Бәрдә рајон мәһкәмәсиндә саат 18:00-а Сејид Нәсими Һәсәновун сон мәһкәмә просеси кечирилиб. Мәһкәмәнин вахты ани олараг тәјин едилиб. Бу да мәһкәмәдә иштирак едәнләрин сајынын аз олмасына сәбәб олуб.
Нәсими Һәсәновун вәкили мәһкәмәдә һакимә шаһид ифадәләринин үст-үстә дүшмәдијини, полисләр ифадәләриндә тәзадларын олдуғуну билдириб: "Диҝәр факт исә Нәсими полисә өзү ҝәлиб. Һансы инсан полисә ҝедәндә машынында силаһ, ҹибиндә наркотик ҝәтирәр?! Бүтүн бунларын шәрләмә олдуғу ашкардыр. Һәбс олунандан сонра она вәкил белә тәјин едилмәјиб. Протоколда исә Нәсими ҝүја вәкилдән имтина етдији гејд едилиб. Бүтүн бунлары нәзәрә алыб һөрмәтли һакимдән әдаләтли гәрар чыхармасыны истәјирик."
Мәһкәмә вәкилин чыхышындан сонра гыса фасилә елан едиб. Фасиләдән гајыдан һаким Әһмәд Саријев Сејид Нәсими Һәсәновун 4 ил мүддәтинә азадлыгдан мәһрум едилмәсинә, ҹәзасынын үмумиҹәзачәкмә мүәссисәсиндә кечирмәсинә һөкм вериб.
Сејид Нәсими Һәсәновун һәбсинә сәбәб исә 2012-ҹи ил 5 октјабр тарихиндә тәһсил оҹагларында 2 илдир давам едән һиҹаб гадағасына Тәһсил Назирлијинин инзибати бинасы гаршысында кечирилән етираз аксијасында иштирак етмәсидир.
Диггәт: Хәбәрдән истифадә етдикдә мәнбәјә истинад лазымдыр
