Әһли Бејт (әлејһимус сәлам) -АБНА- Хәбәр Аҝентлијинин вердији хәбәрә әсасән Азәрбајҹан Ислам Партијасы (АИП) бөлҝәләрдә актив сечкиөнҹәси фәалијјәт апарыр
Ислам Партијасы, президент сечкиләриндә һазырладыг програмынын икинҹи мәрһәләси кими мајын 6-да Мәшвәрәт Шурасы (МШ) јарадыб.
Мөвзу илә әлагәдар исламынсеси.аз порталы үчүн АИП сәдринин сијаси мәсәләләр үзрә мүавини Акиф Һејдәрли шәрһ едиб.
- МШ сечки кампанијасында һансы вәзифәләрин иҹрасы үчүн нәзәрдә тутулуб?
- АИП президент сечкиләриндә актив иштиракла бағлы 27 март 2013-ҹү ил тарихли гәрарында сечки кампанијасына һазырлыгла вә сечкинин ҝедиши илә бағлы ваҹиб гәрарларын гәбул олунмасында Мәшвәрәт Шурасынын јарадылмасы гејд олунмушду. Партијанын идарә һејәтинин вә Мәшвәрәт Шурасына дахил олан илк үзвләрин бирҝә кечирдикләри 6 мај 2013-ҹү ил тарихли јығынҹағында һәмин Шуранын тәгдиматы олду.
Бурада сәсләнән фикирләрдән дә ајдын олду ки, гурум сечки просесинин уғурла кечирилмәсиндән өтрү јарадылыб. МШ-нин әсас сәлаһијјәтләри сечки просесиндә башлыҹа гәрарларын гәбул олунмасындан, һабелә сечки комиссијасынын гурума тәгдим едәҹәји мәсәлә вә тәклифләр барәдә әсас рәј билдирмәсиндән ибарәт олаҹагдыр. Башлыҹа мәсәлә МШ үзвләринин истәр мәркәз шәһәрләрдә, истәрсә дә бөлҝәләрдә јашајыб фәалијјәт ҝөстәрән нүфузлу инсанларын, алим, зијалы, әсасән дә диндарлардан тәшкил олунмасыдыр. Сечки әрәфәсиндә гаршыја чыхаҹаг һәр һансы һәлледиҹи мөвгејин гәбул олунмасы мәһз Мәшвәрәт Шурасынын мүзакирәси вә гәбул олунаҹаг бирҝә гәрарла јеринә јетириләҹәк.
- АИП сәдри Мөвсүм Сәмәдовун пассив сечки һүгугундан истифадә етмәси неҹә баш тута биләр?
- Биз вә үмумән Азәрбајҹан ҹәмијјәти Һаҹы Мөвсүм Сәмәдовун һәбсинин гәрәзли вә һагсыз олмасына әминик. Инанырыг вә үмидварыг ки, һакимијјәт онун пассив сечки һүгугуна һөрмәтлә јанашмалыдыр. Буну М.Сәмәдову президентлијә намизәд кими ҝөрмәк истәјин он минләрлә һөрмәтли инсанын вә сырави вәтәндашларын сон бир нечә ҝүн әрзиндә бизә едилән мүраҹиәтләри зәрури едир.
- Бөлҝәләрдә кечирилән ҝөрүшләрдә һансы нәтиҹәләрә ҝәлиниб?
- Бөлҝәләрдә кечирилән ҝөрүшләр ики мәрһәләдә - сечки гәрары верилмәмишдән әввәл вә сечкијә һазырлыг тәдбирләри әрәфәсиндә апарылыб. Илк мәрһәләдә бизә ајдын олду ки, исламчылар вә тәәссүбкешләримиз бу аддыма һазырдырлар вә гәләбә әһвал-руһијјәсиндәдирләр.
Икинҹи мәрһәләдә апардығымыз ҝөрүшләрдә исә сечки илә бағлы гаршыда дуран башлыҹа вәзифәләр мүзакирә мөвзусу олуб. Бөлҝәләрдә нүфузлу инсанлар партијанын "Әхлаглы сечки вә әдаләтли һакимијјәт" адлы сечки блокунун јаранмасыны алгышлајыб вә уғурлу нәтиҹәләрә үмид етдикләрини билдирибләр.
Вәһдәтимизин горунмасы вә мөһкәмләндирилмәсиндә атдығымыз аддымларын нә гәдәр өнәмли олдуғуну ҝәләҹәк һадисәләр, уғурлар ајдын ҝөстәрәҹәк.
Диггәт: Хәбәрдән истифадә етдикдә мәнбәјә истинад лазымдыр
