Әһли Бејт (әлејһимус сәлам) -АБНА- Хәбәр Аҝентлијинин вердији хәбәрә әсасән анти-Ислам әлијевләр режиминин Исламафоб сијасәтләри сәнҝимир. Белә ки, бу ҝүн сәһәр саатларында һиҹабда олан ханым тәләбләрдән биринин Азәрбајҹан Дөвләт Нефт Академијасынын (АДНА) бинасына бурахылмајыб.
Университетдә олан әмәкдашымыз сојуг һавада саатларла чөлдә галан вә бинаја бурахылмајан һәмин ханымла бағлы мараглы мәлуматлар әлдә едиб. Һеч демә бу тәләбә һиҹаблы олмасы сәбәбиндән дүнән дә охшар һалла растлашыб вә сонунда евә гајытмаға мәҹбур олуб.
Сөзүҝедән ханымын тәләбә јолдашлары илә сөһбәт едән Бизимхебер.аз-ын мүхбири ону да өјрәниб ки, университетдә бу хошаҝәлмәз олај ҹидди наразылыға јол ачыб: “Академија үч корпусдан ибарәтдир. Биринҹи илә икинҹи корпусун гапысындан һиҹаблы ханымлар сәрбәст дахил ола билирләр вә мүһафизәчиләр онлара һеч нә демир. Амма мараглыдыр ки, үчүнҹү корпуса дахил олмаға имкан вермирләр вә сәбәбини сорушанда билдирирләр ки, рәһбәрлијин һиҹаблылары бурахмамаг барәдә гәрары вар. Анормал бир вәзијјәт јараныб. Бу тәләбә ханым биринҹи вә икинҹи корпусда олан дәрсләрдә иштирак едә билир, амма үчүнҹү корпусда ону гапыдан бурахмырлар”.
Тәләбәләрин сөзләринә ҝөрә, бу проблем ики ҝүндүр јараныб. Бу ҝүн дә мәсәлә илә марагланан тәләбәләр деканлыға ҝедәрәк, бунун сәбәбини сорушанда ганеедиҹи ҹаваб алмајыблар: “Бизә билдирибләр ки, Тәһсил Назирлијинин бунунла бағлы әмри јохдур. Биз гајнар хәттә зәнҝ едиб проблем илә марагланаҹағыг”.
Һиҹаблы ханымын тәләбә јолдашлары билдириблыр ки, һәмин ханым Бејнәлхалг Игтисади Мүнасибәтләр факултәсиндә охујур вә дүнән дә чөлдә галыб: “Бу ҝүн дә һеч бир һиҹаблы тәләбәни корпуса бурахмадылар”.
Бунунла бағлы һансыса етиразын олуб-олмајаҹағына ҝәлинҹә, тәләбәләр билдирдиләр ки, һәлә конкрет олараг тәләбәләрдән дәстәк ҝәлмир: “Јалныз онун јахынлары вә груп јолдашларындан бәзиләри ханымын әтрафында олублар. Етиразымызы күтләви олараг билдирмәмишик. Өз арамызда мәсәләни ректорлугла һәлл етмәјә чалышырыг. Ушаглардан бәзиләри артыг рәһбәрлијин гәбулунда олуб. Бу да онунла бағлы олду ки, һәмин тәләбәләрдән биринин дә нишанлысы һиҹаблы олдуғу үчүн охшар һалла үзләшиб. Инди нә етмәлијик? Университети јарыдан бурахмалыјыг ки, һиҹаба гадаға гојулду? Һазырда проблемин һәлли илә бағлы тәләбәләрә һеч нә демирләр”.
Диггәт: Хәбәрдән истифадә етдикдә мәнбәјә истинад лазымдыр
