Әһли Бејт (әлејһимус сәлам) -АБНА- Хәбәр Аҝентлијинин вердији хәбәрә әсасән Азәрбајҹан Ислам Партијасынын рәсми хәбәр порталы олан Исламинсеси.аз, Азәрбајҹан Ислам Партијасынын Астара Рајон Комитәсинин сәдри Фамил Шүкүровдан мүсаһибә алмышдыр.
Јерли тәшкилат нә вахт тәсис олунуб вә јерли тәшкилатын дуруму һазырда неҹәдир?
- Астара Рајон Комитәси Азәрбајҹан Ислам Партијасы (АИП) тәсис олунандан бу ҝүнә гәдәр фәалијјәтдәдир. Астаралылар һәр заман Ислам дининә вә она хидмәт едәнләрә һөрмәт бәсләјибләр. АИП дә сијаси вә дини гурум олдуғуна ҝөрә бу зонада чох севилир. Биз һәр заман астаралыларын јанында олмушуг. Она ҝөрә дә ҹамаат бизә етимад едир вә бизим комитәјә үзв олурлар. Уҹа Аллаһа шүкүрләр олсун ки, јерли әһалинин рәғбәтини газаныб, чох сајда үзв вә тәәссүбкеш топламышыг.
- Иҹра һакимијјәти вә диҝәр дөвләт структурлары тәрәфиндән сизләрә тәзјигләр олунурму?
- Олунан тәзјиг ҝөз габағындадыр. Бизим рајонун комитә рәһбәри олан Руфуллаһ Ахундзадәни наһаг јерә, шәрләјәрәк һәбс едибләр. Даһа сонра да бизләрә тәзјиг вә тәгибләр олду. Анҹаг бүтүн бу чәтинликләрә бахмајараг, биз ирәли ҝениш аддымларла ирәлиләјирик. Буну да бизә динимиз, Аллаһымыз өјрәдиб.
- Һәбсләрдән сонра АИП-ин даһа да мөһкәмләнмәсини нә илә әлагәләндирирсиниз?
- Азана гадаға, мәсҹидләрин сөкүлмәси, һиҹаб гадағасы вә диҝәр һагсызлыглар мөминләрин зүлмә гаршы һаглы сәсләрини уҹалтмаларына сәбәб олду. Исламын мүдафиәсинә галхдыгларына ҝөрә, һәбс олунан, һәтта шәһидләр верән халгын ирадә вә әзиминин мөһкәмләнмәси тәбиидир. Мән бир мүсәлман вә Азәрбајҹан өвлады олмағымла вә АИП кими уҹа вә кејфијјәтли бир гурумун үзвү олмағымла фәхр едирәм. Бүтүн бу сүни мүшкүлләри јарадан һакимијјәт өзүнүн һансы мөвгедә олдуғуну ҝөстәрди. Бахмајараг ки, өзләрини мүсәлман кими гәләмә верирдиләр, амма әмәлләриндә бунун там әксини етдиләр.
- Ислам Партијасы бу ил кечириләҹәк Президент сечкиләриндә фәаллыг ҝөстәрәҹәјини бәјан етмишдир. Бунун перспективлијини нәдә ҝөрүрсүнүз?
- АИП-ин буилки сечкиләрдә фәал иштирак етмәсинин мүсбәт ҹәһәтләри чохдур. Бу фәаллыг, бир нөв ҝәләҹәк сечкиләрдә АИП-ин уғурлар газанмасына сәбәб ола биләр.
- Үмумијјәтлә сечки демократија, халгын һакимијјәти демәкдир. Сиз Азәрбајҹанда демократик сечки кечириләҹәјинә инанырсынызмы?
- Мүстәгиллик газандығымыздан бәри мән Азәрбајҹанда демократик сечки ҝөрмәмишәм. Сечкиләрдә ГҺТ тәрәфиндән мүшаһидәчи олдуғма ҝөрә,бу просесләри јахындан изләмиш бир шәхс кими буну сизә дејирәм. Анҹаг ону да дејим ки, бу она дәлаләт еләмир ки, мән вә вәтәндашларымыз бу сечкиләрдә иштирак еләмәјәк. Әксинә, биз өз сәсимизи сәмәрәли шәкилдә, һәгиги рәһбәр ҝөрмәк истәдијимиз шәхсә вермәлијик. Јохса, бизим сәсләримизи она-буна верәҹәкләр. Бу ишин өзү мүгәддәс бир ишдир ки, инсан да буну, јәни сечкидә иштирак етмәји өзүнә ваҹиб билмәлидир.
- Бөлҝәләрдә сечки сахтакарлығы узун илләр әнәнәви һал алыб. Буна гаршы һәр һансы тәдбир ҝөрмәк олармы? Үмумијјәтлә ҹәмијјәтдә, үзвләринизлә бу истигамәтдә һансы тәблиғат-тәшвигат ишләри апарылыр?
- Бөлҝәләр дедикдә,үмумијјәтлә Азәрбајҹанда сечки сахтакарлығы әнәнәви һал алыб. Бу сахтакарлығын гаршысыны алмаг анҹаг халгын вәһдәти нәтиҹәсиндә мүмкүндүр. Биздә АИП олараг нәинки сечкигабағы, һәтта һәр вахт халгын бу истигамәтдә маарифләнмәсинә чалышырыг вә бундан сонрада чалышаҹағыг.
- АИП олараг һакимијјәтлә бағлы марағынызда ән чох һансы әламәт вә кејфијјәтләр приоритет сајылыр. Вә ја белә дејәк Азәрбајҹан халгынын, әһалисинин 97фаизи мүсәлман олан бир мәмләкәтин президентинирәһбәр кими неҹә ҝөрмәк истәрдиниз?
- АИП олараг ҝәләҹәк президентимизи баҹарыглы, тәдбирли вә бу ишә һамысындан ләјагәтли олан шәхси ҝөрмәк истәрдик.
Диггәт: Хәбәрдән истифадә етдикдә мәнбәјә истинад лазымдыр
