Әһли Бејт -АБНА- хәбәр аҝентлијинин вердији хәбәрә әсасән Азәрбајҹан Ислам Партијасынын (АИП) сәдр әвәзи Елчин Манафов Мүсават Ҝәнҹләр Тәшкилатынын сәдр мүавини Ниҝар Јагублунун һәбсиндән данышаркән билдириб: “Иҹтимаи фәалларын һагсыз һәбсләри о гәдәр артыб ки, артыг буна һеч ким тәәҹҹүбләнмир. Һәтта белә һадисә баш вермәјән ҝүн нараһат олуруг ки, нә әҹәб һәбс олунан јохдур, тәтилдир?”
Елчин Манафов даһа сонра дејиб: ки, АИП азәрбајҹанлы ханымын, ҝәнҹ гызын һагсыз һәбсини писләјир: “Фәрги јохдур иҹтимаи шәхсдир, јахуд садә инсандыр һагсызлыға уғрајан... Белә гәрарлар верәнләр анламалыдырлар ки, өлкәсинә, онун вәтәндашларына хәјанәт едир. Һәм вәтәндашлар әзијјәт чәкир, нараһат олур, мәнәви зәрбә алырлар, һәм дә һакимијјәтә гаршы инамсызлыг, етимадсызлыг јараныр. Бу, һакимијјәтин өзүнә дә зијандыр. Халгы бу гәдәр күсдүрмәк олмаз, гаршыдан президент сечкиси ҝәлир”.
Сәдр әвәзи даһа сонра Азәрбајҹан Ислам Партијасынын Ниҝар Јагублунун мүдафиәсиндә кәнар галмајаҹағыны дејиб: “Көмәјимизи әсирҝәмәрик, бу ишә биҝанә галмарыг”.
Диггәт: Хәбәрдән истифадә етдијдә мәнбәјә истинад лазымдыр
