Әһли Бејт -АБНА- хәбәр аҝентлији- Мәлум олдуғу кими бу ҝүнләр Теһранда дүнјанын ән мүһүм топлантысы кечирилмәкдәдир. Бу ил рәсми шәкилдә дүнјанын әксәр өлкәләрини өзүндә бирләшдирән Гошулмама Һәрәкатына Азәрбајҹан да гошулду. Һәрәкатын әсас мәрамы һеч бир блок вә ҝүҹ мәркәзләринә табечилик етмәдән, дүнјада сүлһүн бәргәрар олунмасында сәј ҝөстәрмәкдир. Даһа ајдын десәк, дүнја өлкәләри заман ҝечдикҹә бејнәлхалг аләми диктатура үсулу илә идарә едәрәк, онларын истиглалијјәтини әлиндән алмаг истәјән АБШ блокуна гаршы чыхмагдадырлар.
Совет Иттифагы вә Шәрг блоку дағылдыгдан сонра, башында АБШ-ын дурдуғу Гәрб блоку дүнјаны тәкбашына идарә етмәкдәдир. Гаршысында ҝүҹ ҝөрмәјән АБШ, дүнјаны истәдији формада идарә едир. Она ҝөрә дә Гошулмама Һәрәкатынын ҝүҹләнмәси бу өлкәни ҹидди нараһат етмәјә башлајыб. Чүнки бу онун империалист бахышларына там зиддир. Елә бу бахымдан да дүнјанын әксәријјәтинин топландығы бу гуруму зәифләтмәк вә ҝөздән салмаг Гәрб вә онларын информасија империјасынын әсас приоритетинә чеврилиб.
Инди исә кечәк Азәрбајҹанын бу гурума үзв олмасына вә бу гурумда атдығы илк зиддијјәтли аддыма. Гошулмама Һәрәкатынын диҝәр бир ады “Өһдәлик ҝөтүрмәјән өлкәләр”дир. Мәлум олдуғу кими Азәрбајҹан бу ил гурума илк дәфә гошулмасына бахмајараг, президент Илһам Әлијев белә бир мүһүм гурумда иштирак едә билмәди. БМТ-дән сонра дүнјанын икинҹи мүһүм трибунасындан Азәрбајҹанын милли марагларынын ән јүксәк сәвијјәдә сәсләндирилмәси Азәрбајҹана нәсиб олмады. Бу исә о демәкдир ки, 20 илдән артыгдыр мүстәгил олмағымыза бахмајараг, һәлә дә биз мүстәгил шәкилдә атмалы олдуғумуз аддымларла бағлы киминсә биздән разы олуб-олмамасына фикир веририк. Бир нечә ај өнҹә Азәрбајҹан өз ишғал олунмуш торпагларыны ҝүҹ јолу илә азад едәҹәји илә бағлы бәјанат верән кими, ермәниләрин халасы, јәни Һиллари Клинтон башыловлу өзүнү Азәрбајҹана чатдырараг, бу сөһбәти тамамилә бағламаг тапшырығыны верди. Белә олан һалда сән һа бајраг узат, һа мүстәгил дипломатијадан даныш, нә хејри! Сән евинә сохулан тәҹавүзкарын говулмасы изнини ҝөзләјирсәнсә, отуруб-дурмағынын, һара ҝедиб-ҝетмәмәјинин кимисә нараһат едәҹәјини дүшүнүрсәнсә, бу мүстәгиллик дејил.
Мүстәгиллик ҝүнү кечирмәклә өзүмүзү ҝүлүнҹ вәзијјәтә гојмушуг. Чүнки дүшмәнләримизә бизим белә мүстәгиллик һиссимиз там сәрф едир. Она ҝөрә дә јахшы оларды ки, Азәрбајҹан бу һәрәката гошулмадан өнҹә папағыны гаршысына гојуб јахшыҹа фикирләшәјди, бахыб ҝөрсүн өзүнү хариҹи өһдәчиликдән гуртара билиб, јохса јох.
Мараглы ачыгламаны исә Азәрбајҹанда Америкајөнлү ачыгламалары илә танынан бир политолог вермишди. О демишди ки, Азәрбајҹанын бу Һәрәкатда иштирак етмәси, бизим гүдрәтли АБШ гаршысында мөвгејимизи зәифләдәр. Политолог бу ачыгламасы илә әслиндә АБШ-ын өлкәләрә мүстәгил сијасәт јүрүтмәјә иҹазә вермәмәсини тәсдиг етмиш олур. Даһа доғрусу, сөзүҝедән политолог долајысы илә Американын дүнјаны гулдур вә диктатура үсулу илә идарәетмәсини өзү дә хәбәри олмадан етираф едиб. Һәр һалда үмид едирик ки, бир ҝүн биз һәгиги мүстәгиллијимизи әлдә едәрәк, һеч кәсдән изн алмадан торпагларымызы азад едәрәк, бајрағымыз Гарабағда фәхрлә далғаландыраҹағыг.
Әзиз Саһибоғлу
Диггәт: Хәбәрдән истифадә етдијдә мәнбәјә истинад лазымдыр
