Сонунҹу зәлзәлә баш верәндә Биләсувардајдым, јазырдым. Јан отагдан ев әһлинин һәјәҹанлы сәс-күјүндән бир сөзү дәгиг ешитдим вә тез масама, сонра чилчыраға бахдым – һәр икиси јелләнирди. Бөјүк һәјәт еви ләрзәјә ҝәлмишди.
Отурдуғум јердә отурдум, јазмаға давам еләдим. Билмирәм, бу архајынлыг гәдәрә ҝизли, етираф олунмајан инамданды, утанҹаглыданды, тәнбәлликдәнди, гүрурданды, өзүнә сығышдырмамагданды – һәр нәди, билмирәм вә бу сәбәбләрдән бири иди ки, 2000-ҹи илдә Бакыда ҝүҹлү зәлзәлә оланда һәјәтә дүшмәји өзүмә ар билмишдим. Бәзән мәнә елә ҝәлир ки, һачанса өлүм тәһлүкәси илә үз-үзә галанда да еләҹә јеримдә галарам. Горхудан ичим титрәр, ама гачмарам. Ҝөзүм ҝөрә-ҝөрә өлмәјимә тамаша еләјиб, тәәссүфлә өләрәм вә јәгин ки, сонрадан мәнә һәтта гәһрәман дејәрләр. Анҹаг ҝерчәк гәһрәманлар да вар, бу һагда бир аздан јазаҹам.
Нә исә, зәлзәләнин икинҹи далғасы гајыдыб баша чатандан сонра, евдәкиләр “инди Биләсуварын адынын чәкәҹәкләр ”,- дејиб, ТВ каналларымыза һүҹум чәкдиләр вә хәбәри анында јахаладылар. Хәбәрчи ханым Биләсуварын бөјүр-башындакы рајонларын адыны чәкиб, зәлзәлә далғасы кими рајонумуздан бир елә өтдү, бир белә гајытды, ама адыны чәкмәди. О заман кешкә бизимкиләрин үзүндәки тәәссүф вә пәришанлығы ҝөрәјдиниз! Санки ев башларына учмушду. Зәлзәләнин ән писи инди баш вермишди: “Ахы нијә бу бичарә Биләсуварын адыны чәкән јохду? Ахы биздә дә олду бу шоғәриб!..” Таныш һисс иди. Узун һәсрәтдән сонра, илк дәфә һава һагда мәлуматларда рајонумузун адыны ешидәндә нә гәдәр севинмишдим! Һалбуки јерличилик мәрәзәнин јохлуғундан өјүнәҹәк беш адам варса, бири дә мән дејиләмми?
Ејни суалы Гарабағ савашында ад ачмыш Биләсувар алајынын иҝид оғлу Елдардан да ешитдим: “Биләсувардан 191 шәһид вермишик, бу гәдәр ветеранымыз, әлилимиз вар. Бизим неҹә дөјүшдүјүмүзү һәр кәс билир. Анҹаг неҹә олур ки, кимсә адымызы чәкмир, бир Милли Гәһрәманымыз јохду? Мүбариздән башга. Анҹаг она да бу ад вериләнәҹән ат оғрусујмуш кими, евләринин үстүнү кәсдириб сорғу-суала тутмушдулар валидејнләрини...” Ејни сөзү атасы да демишди мәнә, Мүбаризин әшјалары евләринә ҝәтирилән ҝүн.
Һеч олмаса, бир һава һаггында мәлуматда, зәлзәлә хәбәриндә рајонунун адыны ефирдән ешитмәк истәјинин нәдән доғдуғуну тәсәввүр еләјә билирсинизми? Бу истәјин мајасында зәлзәлә гәдәр аҹы ҝерчәкликләр дајаныр.
“Тәбризим, гәлби јаралы Тәбризим” кими ҹүмләләр јазмагдан, јазанлардан үрәјим буланыр. Зәлзәлә далғаларында бу ҹүр буланмышды үрәјим. Азәрбајҹанын гузејиндә һәр ҝүн баш верән 9 баллыг зәлзәләдән бәһрәләнән, әтә-гана ҝәлән, 9 милјон сојдашынын дири-ҝөзлү, мәнәви вә физики өлүмүнә сусуб, анҹаг сусуласы, ичиндә чәкиләси дәрд олан, Ҝүнејдә баш верән 6,2 баллы зәлзәләјә вә онун сонуҹларына “Тәбризим, гәлби јаралы Тәбризим” јазыб шивән гопаранларын сахталығы адамын әтини төкүр. Ҝүнејә јолланан јардым карваны исә бу үздә өлән 9 милјондан оғурланмајыбмы? Онларын ән хејирхаһ ишләринин мајасы белә һарамдан тутулуб дејә, һеч нәјә, һеч нәјә севинмәк олмур бу виранә гојулмуш јурдда! Наркотикдән, спиртли ички алвериндән газаныб валидејнләрини Һәҹҹ зијарәтинә ҝөндәрәнләр ҝәлир ағлыма.
Иранын јунан-рома ҝүләши үзрә олимпија чемпиону Гасем Резаи гызыл медала ҝөрә алдығы пул мүкафатыны Шәрги Азәрбајҹанда зәлзәләдә зәрәр чәкәнләрә јардым фондуна бағышлајыб. Азәрбајҹанда исә галибләрә бирликдә 4 милјон 50 мин манат пул мүкафаты вериләҹәк. Елә чыхмасын ки, бир әдәбијјат адамы олараг һәсәд апарырам. Һеч о горхум да јохду ки, бүтүн ҝәнҹлик анҹаг митингләрдә адам дөјән идманчы олмаг һагда дүшүнәҹәк. Хејир. Кәл кими шаирләримиз, јазычыларымыз вар, ама һеч бир ҝәлир ҝәтирмәјәҹәк сөзү гојуб, идман залларына ҝетмәк һагда дүшүнмүр. Садәҹә, суал бу:
Неҹә олур ки, 191 шәһид вермиш Биләсувардан бир нәфәр Милли Гәһрәман јохду?.. Милли Гәһрәманлыг үчүн тәгдиматы Мүдафиә Назирлијинин дәһлизләриндә ит-бата дүшмүш ҹәнҝавәр Гәдир Әсәд оғлу Мусајевсә икинҹи дәфә шәрләнәрәк, икинҹи мәһбус һәјатыны јашајыр. Ики дәфә өзүнә гәсд еләјиб... Дејәсән, онун сијаси бахышларына ҝөрә һәбс едилмәси, виҹдан мәһбусу олмасы да һеч кәсин, һеч бир һүгуг мүдафиәчисинин јадына дүшмүр. Һардан дүшәҹәк ки? Зәлзәләдә белә бу рајонун адыны чәкмирләр...
Башын сағ олсун, Азәрбајҹан!
Пәрвиз Ҹәбрајыл
Диггәт: Хәбәрдән истифадә етдикдә мәнбәјә истинад лазымдыр
