Әһли Бејт -АБНА- хәбәр аҝентлији- Салам, Һикмәт мүәллим. Сизә Немәтлә бағлы бир мәлумат вермәк истәјирәм. Даһа доғрусу бу мәлуматын әсасында бүтүн һүгуг мүдафиәчиләринә мүраҹиәт етмәк истәјирәм. Мүраҹиәти јазыб сизә ҝөндәрирәм. Анлашылмаз бир һиссә олса, зәһмәт олмаса әлагә сахлајын изаһ едим. Анҹаг хүсуси олараг дејим ки, мүраҹиәт мүдафиә комитәси адындан јајымланаҹаг. Өнҹәдән тәшәккүр едирәм.
Немәт Пәнаһлыны Мүдафиә Комитәси һүгуг мүдафиәчиләринә мүраҹиәт едиб. Мүраҹиәтдә дејилир: “Һөрмәтли һүгуг мүдафиәчиләри! Азәрбајҹанын, демәк олар, бүтүн һүгуг мүдафиәчиләринин сијаси мәһбус кими таныдығы Немәт Пәнаһлынын һәјаты ҹидди тәһлүкә алтындадыр. Биз бу барәдә мәлуматы Немәт Пәнаһлынын шәхсән өзүндән алмышыг. Баш вермиш һадисәни онун дилиндән ешитдијимиз кими диггәтинизә чатдырмаг истәјирик:
- Мәним сахландығым корпуса јениҹә салынмыш дустаг бура ҝәлдији ҝүндән мәни изләмәјә башлады. Һара ҝедирдимсә, ону көлҝә кими архамда ҝөрүрдүм. Буну о гәдәр габарыг едирди ки, һәтта дустагларын чоху да һисс етмишди. Даһа сонра бәзи дустаглар мәнә чатдырдылар ки, бу адамы дәфәләрлә ҝеҹәјары сәнин чарпајынын јанында ҝөрүб говмушуг.
Доғрусу, әгли зәифлији дәрһал һисс олунан бу адамын һәрәкәтләрини ҹиддијә алмырдым. Дустагларса мәни тез-тез хәбәрдар едирдиләр. Даһа сонра ешитдим ки, дустаглар ону мөһкәм сыхышдырыблар вә мәни нијә изләдијинин сәбәбини сорушублар. Узун чәк-чевирдән сонра дејиб ки, мән Немәти өлдүрән кими мәни һәбсдән азад едәҹәкләр. Баша дүшдүм ки, ону буна инандырыблар. Дәрһал бу барәдә рәһбәрлијә мәлумат вердим, алдығым ҹавабса бу олду ки, о адам руһи хәстәдир. Бу хәбәр јајылан кими ону бизим корпусдан чыхардылар...
Һөрмәтли һүгуг мүдафиәчиләри. Хатырлатмаг истәрдик ки, бу, Немәт Пәнаһлынын һәјатына гәсд ҹәһдинин үчүнҹүсүдүр. Биринҹи дәфә Бакы Истинтаг тәҹридханасында онунла бир отагда галан мәһбус үлҝүҹлә Немәт Пәнаһлыја һүҹум етмишди. Икинҹи һадисә исә бир нечә ај бундан өнҹә баш вериб. Дустаглардан бири Немәт Пәнаһлыја архадан стулла зәрбә ендириб. Бу һадисә дустагларын ҝөзү өнүндә баш вериб. Һадисәдән сонра дустаглар о адамы корпуса бурахмајыблар. Бу фактлары нәзәринизә чатдырараг сиздән мәсәләјә мүдахилә етмәјинизи хаһиш едирик”.
Мүраҹиәтин мәтнини “Медиа форум” сајтына Немәт Пәнаһлынын һәјат јолдашы Һәҹәр Пәнаһлы јоллајыб.
Немәт Пәнаһлы 1988-ҹи илдә башлајан милли азадлыг һәрәкатынын өнҹүл сималарындан, Азәрбајҹан Халг Ҹәбһәсинин гуруҹуларындан олуб. 2011-ҹи ил јанварын 8-дә тутулуб, хулиганлыг вә гәсдән сағламлыға аз ағыр зәрәр вурма иттиһамы илә 6 ил мүддәтинә азадлыгдан мәһрум олунуб.
Диггәт: Хәбәрдән истифадә етдикдә мәнбәјә истинад лазымдыр
