Әһли Бејт -АБНА- хәбәр аҝентлијинин вердији хәбәрә әсасән бу ҝүн Сејјид Мүбариз Ағакәрим оғлу Ибраһимовун шәһадәтә јетмәсинин икинҹи ил дөнүмүдүр.
Сејјид Мүбариз 1988-ҹи ил февралын 7-дә Биләсувар рајонунун Әлиабад кәндиндә анадан олуб. 2005-ҹи илдә шәһид Сејјид М. Пиријев адына Әлиабад кәнд орта мәктәбиндә орта тәһсилини баша вуран Ибраһимов һәмин ил һәгиги һәрби хидмәтә чағырылыб. Әсҝәри хидмәтини Дахили Гошунларын "Н" сајлы һәрби һиссәсинин Хүсуси Тәјинатлы Бөлүјүндә кечириб. Һәгиги һәрби хидмәтини 2007-ҹи илдә чавуш рүтбәсиндә баша вуруб.
Бир мүддәт мүлки ишләрдә ишләдикдән сонра 2009-ҹу илин август ајында јенидән ҝизир рүтбәсиндә һәрби хидмәтдә чалышмаға башлајыб. Даһа сонра өз арзусу илә ҹәбһә бөлҝәсиндәки һәрби һиссәләрдән бириндә хидмәт етмәјә башлајыб. 18 ијун 2010-ҹу ил тарихиндә ҝеҹә саат 23:30 радәләриндә ҝизир Мүбариз Ибраһимов тәкбашына ики орду арасындакы бир километрлик миналанмыш саһәни кечиб, ишғалчы Ермәнистан Силаһлы Гүввәләринин чох сајда әсҝәр вә забитини ҝөзләнилмәз биринҹи һәмләдә мәһв едиб. Сонра исә дүшмәнин өз силаһларыны өзүнә гаршы истифадә едәрәк, 5 саат онларла тәкбәтәк дөјүшүб. Дүшмәни ағыр иткиләрә мәруз гојан Сејјд Мүбариз Ибраһимов сәһәр саатларында гејри-бәрабәр дөјүшдә гәһрәманҹасына шәһид олуб.
Сејјид валидејнләринә јаздығы сон мәктубунда бу аддымы көнүллү атдығыны вурғулајыб: "Ҹаным, атам вә анам. Мәндән сары дарыхмајын. Иншаллаһ, ҹәннәтдә ҝөрүшәҹәјик. Мәним үчүн бол-бол дуа един. Вәтәнин дар ҝүнүндә артыг үрәјим дөзмүр. Аллаһа хатир буну етмәлијәм. Ән азындан үрәјим сәринлик тапар. Шәһид оланадәк бу шәрәфсизләрин үзәринә ҝедәҹәјәм. Шәһид олсам – ағламајын. Әксинә, севинин ки, о мәртәбәјә јүксәлдим. Аллаһа ибадәтләринизи дәгиг јеринә јетирин. Чохлу сәдәгә верин. Сејид нәвәси олараг буну етмәлијәм. Аллаһ бөјүкдүр. Вәтән сағ олсун. Оғлунуз Мүбариз. Һаггынызы һалал един".
Азәрбајҹан, Ермәнистан вә Русија президентләринин Дағлыг Гарабағ мүнагишәсинин тәнзимләнмәсинә даир 27 октјабр 2010-ҹу ил тарихли бирҝә бәјанатына ујғун олараг, ејни заманда, Әсир вә иткин дүшмүш, ҝиров ҝөтүрүлмүш вәтәндашларла әлагәдар Дөвләт Комиссијасынын бејнәлхалг тәшкилатларла апардығы мүнтәзәм вә сәмәрәли данышыгларын нәтиҹәсиндә, Азәрбајҹанын Тәртәр рајону истигамәтиндә ишғалчы Ермәнистан һәрбчиләринин һүҹумуну дәф едәркән 2010-ҹу ил ијунун 18-дән 19-на кечән ҝеҹә шәһид олмуш Сејјид Мүбариз Ибраһимовун ҹәназәси 6 нојабр 2010-ҹу ил тарихдә гаршы тәрәфдән алыныб. Бир ҝүн сонра, нојабрын 7-дә шәһид гәһрәман Икинҹи Фәхри хијабанда дәфн олунуб.
Диггәт: Хәбәрдән истифадә етдикдә мәнбәјә истинад лазымдыр
