Әһли Бејт -АБНА- хәбәр аҝентлији- "Тәсәввүр едирсиз, Иҹтимаи Телевизијанын гаршысында бунлар нә ојундан чыхдылар. Адамын дили ҝәлмир орадакылара ханым десин. Өзләрини атыб јерә, нәләри варды төкдүләр ҹамаатын гаршысына. Ајыбдыр. Дәдә-бабадан ҝөрмүшүк ки, ханымлар хејирдә-шәрдә бәлли бир мәсафә ҝөзләјәрләр. Мәҝәр бу, Азәрбајҹан ханымына јарашан һәрәкәт идими?".
Бу сөзләри Президент Администрасијасы иҹтимаи-сијаси шөбәсинин мүдири Әли Һәсәнов мајын 24-дә Иҹтимаи Телевизија гаршысында кечирилән пикетдә иштирак едән фәал гадынлар барәсиндә дејиб. Хатырладаг ки, аксија заманы ханымлар полисин ҝөзү гаршысында мүлки ҝејимли шәхсләрин зоракы һәрәкәтләрилә үзләшмишдиләр.
АХҸП сәдринин мүавини Ҝөзәл Бајрамлы дејир ки, Ә.Һәсәновун бу сөзләри нә Азәрбајҹан кишисинә, нә дә дөвләт мәмуруна јарашыр: "Иҹтимаи Телевизијанын гаршысында Азәрбајҹан полиси ханымлара гаршы зораклыг етмишди. Јахшы оларды ки, Әли Һәсәнов бу мәсәләјә етираз едәрди. Икинҹиси дә, Азәрбајҹан гадынынын ҹәмијјәтдәки ролуну вә мөвгејини Әли Һәсәнов мүәјјәнләшдирмир. Јәгин Әли Һәсәнов фикирләшир ки, Азәрбајҹан гадынынын иши сечки мәнтәгәләриндә сечкини сахталашдырмагдыр. Јахуд һесаб едир ки, бүтүн гадынлар халгын малыны талајан мәмурларын ханымлары кими дүшүнмәлидиләр. Үмумијјәтлә "Еуровисион" биабырчылығындан сонра Әли Һәсәнов ҹәмијјәтә гаршы һәддән артыг агрессивлик нүмајиш етдирир. Һакимијјәт ҝөрүр ки, бир тәрәфдән дүнја үзәрләринә ҝәлир, бу бири тәрәфдән дә халг онлары гәбул етмир".
Иҹтимаи Палатанын Координасија Шурасынын үзвү Меһрибан Вәзир исә һесаб едир ки, Ә.Һәсәнов бу һакимијјәтин лексиконуна ујғун ифадә ишләдиб: "Өзләринә бахсынлар ҝөрәк, Азәрбајҹан кишисинә лајиг һәрәкәт едирләрми. Азәрбајҹан кишиси һеч вахт бүтүн халгын сәрвәтини јағмалајыб халгы аҹ сахламыр. Бу да Азәрбајҹан кишисинә јарашмыр. Әввәлҹә бахсынлар ки, халгла неҹә давранырлар. Өзләринә киши дејән инсанлар әввәлҹә бу гадынларын һаггыны, малыны-мүлкүнү, чөрәјини әлиндән алдыглары һаггында дүшүнсүнләр, ондан сонра гадын-киши вә мәнәвијјат сөһбәти ачсынлар".
АХҸП Гадынлар Шурасынын Низами рајон тәшкилатынын сәдри Кәмалә Хәлилова Ә.Һәсәновун тәк онлары јох, бүтүн Азәрбајҹан гадынларыны тәһгир етдијини дејир: "Мејдана чыхан гадынлар Азәрбајҹанын гејрәт символларыдыр. Мән Әли Һәсәнова бурада јох, мәһкәмәдә ҹаваб верәҹәм. Бизә гаршы ачыг тәһгирә јол верилиб вә буна ҹаваб верилмәлидир. Имза топлајыб мәһкәмәјә мүраҹиәт едәҹәјик. Тәбии ки, Азәрбајҹан мәһкәмәләриндән әдаләтли гәрар ҝөзләмирик. Биз бу иши Авропа Мәһкәмәсинә гәдәр апараҹағыг. Онсуз да о, һәр данышанда өзүнү рүсвај едир. "Еуровисион" биабырчылығындан сонра исә үмумијјәтлә нә данышдығынын фәргинә вармыр".
Феминист Гадынлар Һәрәкаты да Ә.Һәсәновун чыхышыны писләјән бәјанат јајыб. Бәјанат мүәллифләри Ә.Һәсәновун сәрбәст топлашмаг азадлығы һүгугуну һәјата кечирән гадынлар барәсиндә ишләтдији ифадәни писләјир вә дөвләт рәсмисинин бу ҹүр фикирләриндән тәәссүфләндирјини билдирирләр.
Гурум бу һадисәни гадынлара гаршы ајры-сечкилик кими дәјәрләндирәрәк билдирир ки, ПА рәсмиси бу чыхышыјла гадынлара гаршы зоракылыға да һагг газандырыб.
Диггәт: Хәбәрдән истифадә етдикдә мәнбәјә истинад лазымдыр
