Әһли Бејт -АБНА- хәбәр аҝентлијинин вердији хәбәрә әсасән батмыш әманәтләрин гајтарылмасы илә бағлы мартын 14-дә верилән фәрман ҹәмијјәтдә бирмәналы гаршыланмыр. Експертләр әманәтләрлә бағлы верилмәси нәзәрдә тутулан әмсаллардан наразылыг едирләр. Депортасија Гурбанлары Ҹәмијјәтинин сәдри, политолог Елдар Намазовун сөзләринә ҝөрә, әманәтләрин гајтарылмасы мүсбәт гәрар олса да, онун мүәјјән шәртләри експертләри гане етмир, һәмчинин ади вәтәндашлары да нараһат едир.
“Мәсәлән, гајтарылаҹаг мәбләғләр инсанларын банка гојдуғу пуллара ујғун дејил. Анҹаг мәни вә чохларыны нараһат едән башга бир мәсәлә дә вар. Азәрбајҹанда 1988-89-ҹу илләрдә Ермәнистандан депортасија олунмуш 250 мин сојдашымызын әманәт проблеми јаддан чыхыб. Вахты илә онлары зорла Ермәнистандан депортасија едәндә онлар нәинки банклардан пулларыны, һәтта евләриндән әшјаларыны өзләри илә ҝөтүрә билмәјибләр. Онлар 1992-ҹи илдә беш иллијә гачгын статусу алмышдылар, 1998-ҹи илдә бунун вахты узадылды, 2002-ҹи илдә исә фактики олараг гачгын статусу да әлләриндән алынды. Онлара дөвләт тәрәфиндән гачгынлара шамил олунан ҝүзәштләр артыг шамил олунмур. Инди дә вериләҹәк әманәтләр онлара шамил едилмир”.
Е.Намазовун сөзләринә ҝөрә, бир нечә ил бундан әввәл Ермәнистанда әманәт банкында батмыш вәсаитләрин вәтәндашлара гајтарылмасы илә бағлы сәрәнҹам вериләркән азәрбајҹанлылары сијаһыдан там чыхартмышдылар: “Ермәнистан һөкумәти бу мәсәлә илә бағлы мөвгејини билдириб, орадан говулмуш азәрбајҹанлыларын әманәтләрини гајтармаг фикриндә дејил. Бәс онларын әманәтләрини ким гајтараҹаг вә нә ҹүр гајтарылаҹаг? Һесаб едирәм ки, Азәрбајҹан һөкумәти 14 мартда бу гәрары верәндә бу мәсәләјә диггәтлә јанашмалы иди. Һөкумәт өзү бу инсанларын әманәтләринин гајтарылмасы мәсәләсини бүдҹәдән һәлл етмәли иди”. Политолог билдириб ки, Азәрбајҹандан да көчән ермәниләрин батмыш әманәтләрлә бағлы Азәрбајҹан һөкумәтинә иддиалары мөвҹуддур. Онун фикринҹә, Азәрбајҹан һөкумәти Ермәнистандан говулан азәрбајҹанлыларын әманәтини гајтарылмағы өз бојнуна ҝөтүрсә, артыг Азәрбајҹана гаршы һансыса бир иддиалар да бејнәлхалг мәһкәмәләрдә ирәли сүрүлә билмәз: “Бу, һәм инсани, һәм сијаси тәрәфдән дүзҝүн аддым оларды. Инди артыг бәллидир ки, һәр өлкә дахилиндә бу проблеми өзү һәлл етмәлидир. Һөкумәт буну өз үзәринә ҝөтүрсә вә һәјата кечирсә, ермәниләр тәрәфиндән һансыса иддиаларын да гаршысыны ала биләр”.
Гејд едәк ки, Азәрбајҹанда вахты илә банклара 400 мин ермәни вә 120 мин русун әманәт гојмасы илә бағлы мәлуматлар вар. Бәзи експертәрин фикринҹә, ермәни вә руслар просесдән кәнарда сахланылса, бу, мәсәләнин мәһкәмә мүстәвисинә чыхарылмасы илә нәтиҹәләнәҹәк. Әксәр експертләр исә гејд едирләр ки, совет әманәтләринин ермәниләрә ҝөрә верилмәмәси версијасы доғру дејил. Чүнки өлкәни тәрк едән ермәниләрин әксәријјәти әманәтләрини ҝөтүрүб апарыб.
Р.РӘФИЈЕВА
Диггәт: Хәбәрдән истифадә етдикдә мәнбәјә истинад лазымдыр
