Милли Мәҹлис Франсанын гәрарыны писләмәди

Әһли Бејт -АБНА- хәбәр аҝентлијинин вердији хәбәрә әсасән: Милли Мәҹлисин дүнәнки иҹласында Франса парламентинин гондарма ермәни сојгырымынын инкар едилмәсини ҹинајәт сајан ганун лајиһәсини гәбул етмәси әсас мүзакирә мөвзуларындан бири олуб.Депутатлар чыхышларында Франса һөкумәтини асыб-кәссәләр дә, јекун олараг онларын сөјләдикләри сөз олараг галыб.ЈАП-чы депутат Мүбариз Гурбанлы билдириб ки, Түркијәнин ҝүҹләнмәси бөлҝәдә бир чох өлкәләри, о ҹүмләдән Франсаны да нараһат едир. Она ҝөрә дә бу мәсәләдән Түркијәјә тәзјиг васитәси кими истифадә етмәјә чалышырлар: “Азәрбајҹан иҹтимаи рәјиндә бу мәсәлә гынанылыр, писләнилир. Франсанын өзүндә дә мәсәләјә демәк олар ки, бирмәналы мүнасибәт јохдур”.Депутат Игбал Ағазадә дә ганун лајиһәсини топа тутуб. О, дејиб ки, бу антидемократија демәкдир. Депутатын сөзләринә ҝөрә һәмин сәнәдин гәбулу тәкҹә Түркијә вә Азәрбајҹан халгына дејил, ејни заманда Франса халгына гаршы атылмыш бир аддымдыр.ЈАП-чы депутат Мәлаһәт Ибраһимгызы да билдириб ки, Франса парламентиндә гәбул едилән ганун тәк Түркијәјә дејил, Азәрбајҹана гаршы да јөнәлиб: “Франса ГҺТ-ләрини бирләшдирән ҝениш бир коалисија да бу гануна гаршыдыр. Биз Франса халгына дејил, бәзи дөвләт рәсмиләринин атдығы аддыма гаршыјыг. Милли Мәҹлис бу ганунун Франса Сенатында гәбулуна јол верилмәмәси үчүн Сената мәктуб ҝөндәрмәлидир”.ЈАП-ын иҹрачы катиби Әли Әһмәдов Азәрбајҹан халгынын Франса парламентинин гәрарына гаршы олдуғуну вурғулајыб: “Бу, АТӘТ-ин Минск групунда һәмсәдр олан Франсанын Дағлыг Гарабағ мүнагишәсинин тәнзимләнмәси просесиндә әдаләтли мөвге тутдуғуна шүбһәләри артырыр. Минск групунда һәмсәдр олан Франсанын Хоҹалы сојгырымыны танымамасы бу өлкәнин мөвгејинин гәрәзли олдуғуну ҝөстәрир”.Витсе-спикер Баһар Мурадова исә Түркијә дөвләтинә вә вәтәндашларына сәсләниб: “Азәрбајҹан дөвләти, парламенти вә ҹәмијјәти сизин јаныныздадыр. Үзүмү Авропа өлкәләринә тутуб дејирәм ки, бу гәрар јалныз түркләр, азәрбајҹанлылара гаршы дејил, бүтөвлүкдә инсанлыға, демократијаја, сөз азадлығына гаршы гәбул едилән бир аддымдыр”.Биринҹи витсе-спикер Зијафәт Әсҝәров исә дејиб ки, Франса икинҹи мәрһәләдә Түркијәдән гондарма сојгырымы танымасыны тәләб едәҹәк: “Әсас мәгсәд Түркијәнин Авропа Бирлијинә гәбулунун гаршысыны алмагдыр. Чүнки Түркијә гондарма ермәни сојгырымыны танымајаҹаг вә о заман да дејәҹәкләр ки, буна ҝөрә Түркијәни Авропа Бирлијинә гәбул етмәк олмаз”.Спикер Огтај Әсәдов Франса парламентинин гәбул етдији гәрарын ҹылыз сијасәтин тәзаһүрү олдуғуну бәјан едиб: “Бурада узаг сијаси мәгсәдләрдән сөһбәт ҝедә билмәз. Түркијә бөјүк дөвләтдир. Авропа Бирлијинә о гәдәр дә еһтијаҹы јохдур. Бу, ермәни диаспорунун фәалијјәти нәтиҹәсиндә баш верир. Ермәни халгы јазыгдыр, ону идарә едән диаспор, хариҹи гүввәләрдир. Биз чалышмалыјыг ки, мәсәлә Франса Сенатында гәбул олунмасын, Франса президенти ону имзаламасын. Биз исә Франса Сенаты илә сых ишләмәлијик. Она ҝөрә дә мәсәләни диггәтдә сахламагла бир аз дөзүмлү јанашаг. Азәрбајҹан дөвләти һәмишә Түркијәнин јанындадыр”.Депутат Гәнирә Пашајева исә тәклиф едиб ки, Милли Мәҹлис Сената мүраҹиәт ҝөндәрсин: “Бурада фикирләр сәсләнди ки, биз сәбирли олаг, просесләрин ҝедишини изләјәк вә Сенатын гәбул едәҹәји гәрары ҝөзләјәк. Бу, доғру дејил. Милли Мәҹлис Франса Сенатына мүраҹиәт ҝөндәрмәлидир. Биз орада гејд етмәлијик ки, бу ганунун гәбул олунмасы Түркијә-Франса илә јанашы Азәрбајҹан-Франса мүнасибәтләринә ҹидди зәрбә вуруб”.Депутат Елмира Ахундова да охшар тәклифлә чыхыш едиб. Лакин һәр ики депутатын тәклифи гулагардына вурулуб. Бунунла да ајдын олуб ки, парламентин мәсәләјә мүнасибәти сахтадыр. Әҝәр Милли Мәҹлис сәмими олараг Түркијәјә дәстәк вермәк истәјирдисә, онда чыхышларын јекуну олараг Франсанын гәрарыны писләјән бәјанат гәбул етмәли иди. Бу оларды рәсми мөвге. Лакин Милли Мәҹлисин буна ҹәсарәти чатмады.  Диггәт: Хәбәрдән истифадә етдикдә мәнбәјә истинад лазымдыр