Азәрбајҹанда вәтәндашын малы, ҹаны, мәнәви дәјәрләри сөзүн һәрфи мәнасында Әлијев режиминин тапдағы алтындадыр. Әввәлләр Бакы шәһәриндә идисә, инди бүтүн республика әразисиндә садә, мәзлум вәтәндашларын мүлкијјәт һүгугу Әлијев режиминин ҹәлладлары тәрәфиндән зорланыр.
Бәзән һүгуглары уғрунда мүбаризә апаран вәтәндашлар гәтлә јетирилир. Садә вә мәзлум вәтәндашларын евләринин, диҝәр дашынмаз әмлакларынын әлләриндән зорла алынмасы ишиндә санки гызғын бир јарышма вар.
Бу мәзлумлара зүлүмвермә јарышында ЗГАН Иншаат, Паша Иншаат, Зема Иншаат, Ҝилан Иншаат вә Аккорд ширкәти бәһсә ҝирмишди. Бу ширкәтләрин һамысы Илһам Әлијевин севимли әтрафынын фирмалардыр. ЗГАН Иншаат Нәглијјат назири Зија Мәммәдовун бир милјон авроја ајы кабабы јејән оғлу Анар Мәммәдова, Паша Иншаат Азәрбајҹанын биринҹи ханымы Меһрибан Әлијеванын әмиси оғлу Мирҹамал Пашајевә, Зема Иншаат Азәрбајҹан Һава Јоллары ГСҸ-нин сәдри Ҹаһанҝир Әсҝәровун һәјат јолдашы Зәрифә Һәмзәјеваја, Ҝилан Иншаат Фөвгаладә Һаллар Назири Кәмаләддин Һејдәрова мәхсусдур, Аккорд ширкәти исә бирбаша олмаса да баш прокурур Закир Гараловун һимајәсиндә иди, инди ширкәт фәалијјәтинин тәнәззүл дөврүнү јашајыр.
Амма 2010-ҹу илдән етибарән Азәрбајҹан Республикасы Әмлак Мәсәләләри Дөвләт Комитәсинин сәдри Кәрәм Һәсәновун гардашы Малик Һәсәнова мәхсус АЗИНКО һолдинг ширкәти вәтәндашларын евләрини вә диҝәр дашынмаз әмлакларыны әлләриндән зорла алынмасы јарышында диҝәр јухарыда адлары гејд едилән ширкәтәри ҝеридә гојуб.
Әлдә етдијимиз мәлумата ҝөрә АЗИНКО ширкәти садә вәтәндашларын мүлкијјәтләрини әлләридән алынмасы истигамәтиндә јени лајиһәјә старт верир. Бу дәфә һәдәф Әләт гәсәбәси, партнјор исә Исраил ширкәтидир.
Редаксијамыза дахил олан мәлумата ҝөрә бир мүддәт өнҹә Абшерон Һотелдә бир нечә јерли вә хариҹи иш адамлары илә ишҝүзар ҝөрүш заманы сөһбәтдә шәхсән Кәрәм вә Малик Һәсәнов гардашлары өзү иштирак едиб. Ҝөрүш, мәнзил гәрарҝаһы Исраилин Һајфа шәһәриндә јерләшән "Исраел Сһипјардс Лтд" ширкәтинин баш директору Ави Шаһафын рәһбәрлик етдији нүмајәндә һејәти илә Һәсәнов гардашлары арасындакы јәһудиләрин ҝерчәкләшдирмәк истәдикләри лајиһә илә бағлы деталларын мүзакирәсиндән бәһс едиб. Ави Шаһаф дејиб: "Исраел Сһипјардс Лтд" ширкәти Гарадағ рајонунун Әләт гәсәбсиндә вә Астара рајону әразисиндә ҝәми тәмири заводу вә заводун әмәкдашлары үчүн 3 чохмәртәбәли јашајыш комплексинин иншаасыны һәјата кечирмәк нијјәтиндәдир. Амма лајиһәнин реаллашмасы үчүн илк зәрури тәдбир иншаат әразисиндә мәскунлашмыш јашајыш массивинин көчүрүлмәсидир. Башланғыҹ үчүн, бәлкә дә бүтүн иншаат проссеси боју ән мүшкүл мәсәлә кими јашајыш массивинин көчүрүлмәсини гејд етмәк олар. Она ҝөрә дә илкин мәрһәләдә АЗИНКО ширкәтинин дәстәјинә еһтијаҹ вар".
Малик Һәсәнов исә ҹаваб олараг билдириб ки, сон заманлар ширкәт (АЗИНКО нәзәрдә тутулур-ред.) үзәриндә иҹтимаи нәзарәт вә тәзјигләр артыб, бу сәбәбдән дә илкин мәрһәлә һәгигәтән чәтиндир. "Амма сиз артыг өлкә рәһбәрлији тәрәфиндән дәстәк алдығыныз үчүн бу массивләрин көчүрүлмәси, орадакы мүлкләрин сөкүлмәси һөкмән һәјата кечириләҹәк". Кәрәм Һәсәнов да ҝүләрәк дејиб ки, артыг Малик бу ишләрдә чох пүхтәләшиб.
Исраилли иш адамлары Әләтдә АЗИНКО ширкәтинин апараҹағы сөкүнтү ишләринә вә ҝөстәрдикләри хидмәтә ҝөрә 100 мин авро өдәјәҹәкләр. Мәбләғ диҝәр сөкүнтүләрә ҝөрә өдәниләндән она ҝөрә белә аздыр ки, Әләтдә вә Астарада көчүрүләҹәк јашајыш массивиндәки евләрин вә вәтәндашларын сајы Бакыда сөкүнтүләрә мәруз галан евләрин вә вәтәндашларын сајындан аздыр: 300-ә јахын ев.
Демәли, садә вә мәзлум вәтәндашлар узун илләр мин бир әзијјәтлә, дишилә, дырнағы илә борҹ едиб бир ев тикибләр, инди дә бир Исраил ширкәтинин сифариши илә Әлијев режими һәмин евләри учуруб ҹамааты гојаҹаг күчәләрдә ки, нә вар нә вар, јәһудиләр бурда ҝәми тәмири заводу вә ишчиләр үчүн јашајыш комплекси тикәҹәк.
Арашдырмалар заманы мәлум олду ки, "Исраил Сһипјардс Лтд" ширкәти һеч дә јалныз мүлки ҝәмиләрин тәмири илә дејил, һәм дә вә әсасән һәрби, хүсусилә дә ракетдашыјан ҝәмиләрин истеһсалы вә тәмири илә мәшғул олур. Азәрбајҹан һөкумәти Әләтдә лиман салмағы планлашдырыр вә буна ҝөрә орада "Исраил Сһипјардс Лтд" ширкәтинин тәмирлә мәшғул олмасыны һардаса анламаг олар. Амма бу ширкәтин Астарада нә ишлә мәшғул олаҹағы анлашылмаз галыр. Әлдә етдијимиз мәлумата ҝөрә, Исраил ширкәти ҹәнуб зонасында да Һәсәнов гардашлары илә ишбирлијинә ҝириб. Амма бу бизнес пројектинин нәдән ибарәт олдуғуну там ајдынлашдыра билмәдик.
