Әһли Бејт -АБНА- хәбәр аҝентлијинин вердији хәбәрә әсасән: Ијулун 27-си Сәбаил Рајон Мәһкәмәсиндә Иҹтимаи Палатанын 2 апрел митингинә ҝөрә һәбс олунмуш АХҸП үзвләри Саһиб Кәримов, Ариф Алышлы, Бабәк Һәсәнов, Зүлфүгар Ејвазлы, Мүсават фәалы Елшән Һәсәнов вә битәрәф Елнур Исрәфиловун иши үзрә просес кечирилиб. Вәкил Јалчын Имановун “Медиа форум” сајтына вердији мәлумата ҝөрә, просесдә Бабәк Һәсәнов вә Елшән Һәсәнов ифадә верибләр.
Мүттәһимләр Ҹинајәт Мәҹәлләсинин 233-ҹү (иҹтимаи гајданын позулмасына сәбәб олан һәрәкәтләри тәшкил етмә вә ја бу ҹүр һәрәкәтләрдә фәал иштирак етмә) маддәси илә иттиһам олунурлар. Елнур Исрафилов Ҹинајәт Мәҹәлләсинин 186.1-ҹи (өзҝәнин әмлакыны гәсдән мәһв етмә вә ја зәдәләмә) маддәси илә дә тәгсирләндирилир.
Јалчын Имановун сөзләринә ҝөрә, просесдә зәрәрчәкәнләрин иштиракы илә бағлы вәсатәт галдырылыб, һаким вәсатәти тәмин едиб: “Бу ҝүн тәгсирләндириләнләрин ифадәләри баша чатды. Зәрәрчәкмиш гисминдә автобус сүрүҹүсү Сарван Мәһәррәмовун нүмајәндәси Тамерлан Сејидов ифадә верди. О, мүдафиә тәрәфинин суалларыны ҹавабландыра билмәди. Мәсәлән, нүмајәндә Сарван Мәһәррәмовун апрелин 2-дә аксија кечирилән әразијә нијә ҝәлдији суалыны ҹавабландыра билмәди. Биз дә сүрүҹүнүн өзүнүн ифадә вермәси үчүн вәсатәт галдырдыг, һаким вәсатәти тәмин етди”.
Вәкил гејд едиб ки, просес ҝедән заман мәһкәмә бинасынын гаршысында аксија кечирилиб, бир груп шәхс сијаси мәһбуслара азадлыг шүарлары сәсләндириб.
Просес ијулун 29-у саат 10.30-да давам едәҹәк.
Диггәт: Хәбәрдән истифадә етдикдә мәнбәјә истинад лазымдыр
