Әһли Бејт -АБНА- хәбәр аҝентлијинин вердији хәбәрә әсасән: Һакимијјәтин бу илин јанвар ајынын орталарындан старт вердији коррупсија илә мүбаризә артыг баша чатмаг үзәрәдир. Һөкумәт ичиндәки мәнбәләрдән. Информасијаја ҝөрә, артыг «јухарылар» тәрәфиндән һәр бир дөвләт гурумуна «әввәлки иш режими» бәрпа барәдә ҝөстәриш верилиб.
Мәнбә билдирир ки, әслиндә бу, ҝөзләнилән иди: «Бунун лајиһә олмасы барәдә илк ҝүнләрдән иҹтимаијјәт мәлуматландырылды. Дүнја Банкы илә әмәкдашлыг чәрчивәсиндә алынан 1 милјард долларлыг вәсаит бир-ики хырда мәмурун ҹәзаландырылмасы илә мәнимсәнилди».
Мәнбә билдирир ки, тәмәлиндә коррупсија дајанан бир һакимијјәтин рүшвәтдән имтинасы мүмкүнсүздүр: «Әҝәр бир режимин әсас нәфәслији коррупсија һесаб олунурса, онун коррупсија илә мүбаризәси гејри-мүмкүндүр. О заман ҝәрәк һаким елита бүтүнлүкдә истефа версин. Коррупсија илә мүбаризә бу һалда уғурлу нәтиҹә верә биләр».
Мәнбә хатырладыр ки, һакимијјәт командасы дөвләтин ајры-ајры структурларынын хәтти илә јығылан рүшвәти системли шәкилдә идарә едирләр: «Бу пирамида формасында һәјата кечирилән бир механизмдирсә, һансыса «будама» ишләри илә фундаментал нәтиҹәләрин әлдә олунмасы гејри-мүмкүндүр. Буну илк башдан һәр кәс вурғулајырды. Һәтта өлкәнин баш прокурору да бу мәсәләјә ејһам едән бир ачыгламасы илә диггәтә ҝәлмишди».
Мәнбәмиз билдирир ки, просесин дурдурулмасы сәбәбиндән артыг Дүнја Банкы илә Азәрбајҹан дөвләти арасында да конфликт јараныб: «Һәр һалда, ајрылан бир милјард долларлыг вәсаитин һесабаты тәләб олунур. Рәсми Бакы исә тутарлы изаһатлар верә билмир».
Диггәт: Хәбәрдән истифадә етдикдә мәнбәјә истинад лазымдыр
