Әһли Бејт -АБНА- хәбәр аҝентлијинин вердији хәбәрә әсасән: Тәһсил системиндәки өзбашыналыглара нәһајәт ки, һакимијјәтин бир әнҹам гылаҹағы һагда мәлуматлар јајылыб. Республика прокурорлуғу да тотал јохламалар барәдә билҝи јајыб. Бу мәсәлә исә јенидән тәһсил назири Мисир Мәрдановун истефаја ҝөндәрилмә мәсәләсини ҝүндәмә дашыјыб.
Һөкумәт ичиндәки гајнағын данышдыгларындан белә мәлум олур ки, сон заманлар Тәләбә Гәбулу үзрә Дөвләт Комиссијасынын фәалијјәти нәтиҹәсиндә тәһсил системиндән ортаја чыхан биабырчы фактлар јухары даирәләрин дә диггәтини ҹәлб едиб.
Бу барәдә ТН-дәки билҝили гајнағын сөјләдикләри: «Артыг мәсәлә президент Илһам Әлијевин сәвијјәсиндә мүзакирә олунмагдадыр». Мәлумат үчүн билдирәк ки, дүнәнә гәдәр бир сыра гајнаглар тәһсил системинин башында дајанан назир Мисир Мәрдановун бунҹа тохунулмазлығыны вә нәзарәтсизлијини онун бирбаша олараг һакимијјәтә чох јахын чеврәләрлә әмәкдашлығы илә әлагәләндирирдиләр. Јәни өзүнә архајын олан Мисир Мәрданов истәнилән һалда ҝөрәв башында сахланылаҹағына әмин олдуғундан тәһсилимизин анасыны ағлатмағында давам етмәкдәдир.
Амма инди мәсәләјә «дур» дејилмәсинин заманынын чатдығы билдирилир. Мәлуматлы мәнбәнин дедијинә ҝөрә, Мисир Мәрдановун һәтта истефаја ҝөндәрилмәси, тәһсил системиндә фундаментал ислаһатларын һәјата кечирилмәси дә тәклиф олунур.
Хатырладаг ки, Мисир Мәрдановун истефа хәбәри бир мүддәт әввәл дә дөврү мәтбуатда һалландырылды. Вә гәзетләрдә јер алан информасијаја ҝөрә, бу поста ики шанслы иддиачы вар ки, јени назир мәһз онларын арасындан мүәјјән олунаҹаг. Иддиалылардан биринин һазырда назир мүавини посту тутдуғу билдирилир. 38 јашлы Елмар Гасымов әслиндә елә Мисир Мәрдановун өз кадры һесаб олунур вә о, бир заманлар Бакы Дөвләт Университетиндә ректор көмәкчиси вәзифәсини дашыјыб.
Мисир Мәрданов ону бирдән-бирә назир мүавини тәјин етди. Бу о заманлар иди ки, мәһз мәрһум президент Һејдәр Әлијевин ҝөстәришинә әсасән ҝәнҹ кадрларын ирәли чәкилмәси просесинә старт верилмишди вә һәмин әрәфәдә һәтта бу ҝүн мүхалиф мәтбуатын гәһрәманларындан һесаб олунан кечмиш сијаси мәһбус Ејнулла Фәтуллајев дә о заманкы әмәк вә әһалинин сосиал мүдафиәси назири Әли Нағыјевин көмәкчиси вәзифәсинә ирәли чәкилмишди.
Инди исә Мисир Мәрдановун кадры һесаб олунан Елмар Гасымовун тәһсил назири ола биләҹәји һагда мәлуматлар сәсләндирилир. Бу барәдә јер алан информасијаларда о да билдирилир ки, 38 јашлы Елмар Гасымовун адајлығыны дәстәкләјәнләр арасында елә Мисир Мәрдановун өзү дә вар. Јәни назир белә һесаб едир ки, посту һеч олмаса «јад әлләрә» гисмәт олмасын.
Диҝәр намизәдин исә һазырда Бакы Баш Тәһсил Идарәсинин мүдири вәзифәсини тутан Наилә ханым Рзагулијева олдуғу билдирилир. Онун да һакимијјәтин чох ҹидди чеврәләри илә бағынын олдуғу сөјләнилир. Инди исә белә бир ҝүвәнҹәли ханым кадрын тәһсил назири постуна тәјин олунма еһтималлары вар.
Сон олараг редаксијамыза дахил олан ифнормасијалара ҝөрә, Мисир Мәрдановла бағлы мәсәләнин сүрәтләндирилмәси намизәдләрин дә фәаллашмасы илә нәтиҹәләниб. Бу барәдә билҝини верән гајнаг иддиа едир ки, һәтта Мисир Мәрданов өзү илә бағлы һәр һансы аддымын атылаҹағы тәгдирдә Елмар Гасымовун назир постуна тәјин олунмасы үчүн индидән бир сыра даирәләрлә тәмасдадыр.
«Әслиндә Мисир Мәрдановун хидмәт етдији һакимијјәтичи груп да ТН кими бир структуру нәзарәт зонасындан чыхармагда мараглы дејил. Амма онларын Елмар Гасымовун намизәдлијини дәстәкләјиб-дәстәкләмәјәҹәкләри һәләлик мәлум дејил» дејән мәнбә билдирир ки, паралел олараг һәјата кечириләҹәк фундаментал ислаһатлар заманы исә Азәрбајҹан тәһсилинә бир чох јениликләрин ҝәтирилмәси нәзәрдә тутулур:
«Бу бахымдан даһа чох ҝәнҹ кадра үстүнлүк вериләҹәји инандырыҹыдыр. Јәни Наилә Рзагулијева даһа чох көһнә системин адамы кими танындығындан тәһсил системиндә нәзәрдә тутулан фундаментал ислаһатларын һәјата кечирилмәси үчүн һәм ҝәнҹ, һәм дә енержили кадра еһтијаҹ вар». Демәли, Елмар Гасымов даһа шанслыдыр.
Диггәт: Хәбәрдән истифадә етдикдә мәнбәјә истинад лазымдыр
