Әһли Бејт -АБНА- хәбәр аҝентлијинин вердији хәбәрә әсасән: Мисирдә иҹтимаи-сијаси вәзијјәт јенә гарышыб. Феврал ајында 18 ҝүн сүрән халг етиразларындан сонра кечмиш президент Һүснү Мүбарәки девирән мүхалифләр јенидән Тәһрир мејданында митингләрә башлајыблар. Бир һәфтәдир давам едән митингләрдә мүхалифләрин әсас тәләби демократик идарәетмәјә кечиди сүрәтләндирмәкдир.
Мүбарәкин деврилмәсиндә өнәм дашыјан пајтахт Гаһирәнин күчәләринә топлашан он минләрлә инсан, өлкәдә мүвәггәти кечид һөкумәтини өз үзәринә ҝөтүрән Јүксәк Һәрби Шураја демократијаја кечиди нәзәрдә тутан ислаһатлары сүрәтләндирмәк үчүн “Ҹүмә сон хәбәрдарлыг” чағырышыны едиб. Аксија иштиракчылары һәлә Һүснү Мүбарәк деврилән заман сөз верилән бүтүн демократик ислаһатларын јубанмадан һәјата кечирилмәсини истәјирләр. Тәләбләри јеринә јетириләнә гәдәр Тәһрир мејданында отураг аксијаларыны давам етдирмәк әзминдә олан халг күтләләри, һәмчинин һәлә феврал һадисәләри заманы 800 нәфәрин өлдүрүлмәсиндә рол алан шәхсләрин дә ҹәзаландырылмасыны тәләб едирләр.
Диггәт: Хәбәрдән истифадә етдикдә мәнбәјә истинад лазымдыр
