Әһли Бејт -АБНА- хәбәр аҝентлијинин вердији хәбәрә әсасән: Русијада јерли сакинләрлә азәрбајҹанлылар арасында атышма олуб, өлән вар
Русијанын Свердловск вилајәтинин Верхнаја Пышма шәһәринин Сагра гәсәбәсиндә јерли сакинләрлә азәрбајҹанлылар арасында силаһлы атышма олуб. Русија мәтбуатынын вердији хәбәрә ҝөрә, бу барәдә Русија Федерасијасы Истинтаг Комитәсинин Свердловск вилајәти үзрә Истинтаг Идарәсинин мәтбуат хидмәти мәлумат вериб.
Мәлумата ҝөрә, ијулун 1-и ҝеҹә саатларында баш верән инсидент нәтиҹәсиндә Јекатеринбург сакини дөшүндән алдығы дөрд ҝүллә јарасындан хәстәханаја апарыларкән јолда кечиниб. Атәшин ким тәрәфиндән ачылдығы исә мәлум дејил. Һазырда һадисәнин башвермә шәраити вә мотивләри арашдырылыр. Фактла бағлы Русија Федерасијасы Ҹинајәт Мәҹәлләсинин 105-ҹи маддәсинин 1-ҹи һиссәси үзрә (Гәтл) ҹинајәт иши галдырылыб. Тәһгигат апарылыр.
Русија мәтбуатынын һадисә шаһидләри вә јерли сакинләрә истинадән вердији хәбәрә ҝөрә, атышма етник мүнагишә зәмининдә баш вериб. Силаһлы инсидент әввәлләр јерли сакинләр тәрәфиндән гәсәбәдән говулан гарачы наркотик алверчиләринә ҝөрә олуб вә онлар азәрбајҹанлылары да мүнагишәјә сөвг едибләр.
Јерли сакинләрин билдирдијинә ҝөрә, ҝеҹәјары ичәрисиндә гафгазлыларын олдуғу бир нечә машын гәсәбәјә ҝәлиб. Вә бу заман тәрәфләр арасында силаһлы тоггушма баш вериб.
Диггәт: Хәбәрдән истифадә етдикдә мәнбәјә истинад лазымдыр
