Әһли Бејт -АБНА- хәбәр аҝентлијинин вердији хәбәрә әсасән: Иҹтимаи Палата 19 ијун аксијасы илә бағлы сон гәрарыны вериб. Иҹтимаи Палатанын Координасија Шурасынын үзвү, Мүсават Партијасынын башганы Иса Гәмбәр дејиб ки, митинг ијунун 19-да саат 17-дә “Нәриманов” кинотеатрынын гаршысында кечириләҹәк: “Бакы Шәһәр Иҹра Һакимијјәти конститусијаны вә “Сәрбәст топлашмаг азадлығы һаггында” гануну кобуд шәкилдә позараг митинглә бағлы мүраҹиәтимизә мәнфи ҹаваб вериб. Иҹтимаи Палата сон сессијасында гәбул олунан гәрара ујғун шәкилдә ијунун 19-да саат 17-дә “Нәриманов” кинотеатрынын гаршысында динҹ митингини кечирмәјә ҹәһд едәҹәк”.
Иса Гәмбәр билдириб ки, Иҹтимаи Палатанын Координасија Шурасынын ијунун 16-да кечирилән иҹласында меријанын ҹавабы мүзакирә олунуб вә митингин кечирилмәси гәрары гүввәдә сахланылыб.
Мүсават башганы гејд едиб ки, бејнәлхалг тәшкилатларын вә мүхтәлиф дөвләтләрин јүксәк вәзифәли нүмајәндәләринин Азәрбајҹана сәфәрләри заманы демократик гүввәләрин тәмсилчиләри илә ҝөрүшләри хејли интенсивләшиб: “Бүтүн ҝөрүшләрдә демократија, инсан һаглары контекстиндә сәрбәст топлашмаг азадлығы илә бағлы мәсәлә дә ҹидди мүзакирә олунуб. Һакимијјәтин конститусијаја вә гануна зидд гәрарлары Азәрбајҹан иҹтимаијјәтинә һөрмәтсизлик олдуғу кими бејнәлхалг бирлијә гаршы да сајмазлыгдыр. Азәрбајҹанын бејнәлхалг тәшкилатларын үзвү олараг үзәринә ҝөтүрдүјү өһдәликләри вар. Бакы Шәһәр Иҹра Һакимијјәтинин мүхалифәтин митингләри илә әлагәдар чыхардығы гәрарлары бејнәлхалг бирлик һәмин өһдәликләрин позулмасы кими дә гијмәтләндириб. Һесаб едирәм ки, бу истигамәтдә даһа ајдын вә ачыг мөвге ортаја гојулаҹаг”.
Диггәт: Хәбәрдән истифадә етдикдә мәнбәјә истинад лазымдыр
