Әһли Бејт АБНА хәбәр аҝентлијинин вердији хәбәрә әсасән: Иҹтимаи Палатанын 2 апрел митингиндә иштирак етдијинә ҝөрә әввәлҹә амансызлыгла дөјүләрәк хәсарәт алан, даһа сонра ишдән чыхарылан, мәктәбли өвлады һәбсә дүшән Тәзәхан Мирәләмлијә гаршы дөвләт сәвијјәсиндә мәнәви террор һәјата кечирилдијини тәсдигләјән даһа бир сүбут ортаја чыхды.
Һәмин сүбута тохунмаздан әввәл хатырладаг ки, бир гәдәр әввәл Тәзәхан Мирәләмлинин чалышдығы мәктәбин директорунун интернетдә видеосу јајылмышды. Видеода ханым директор ағлајараг етираф едирди ки, Ҹәлилабад рајонунун тәһсил шөбәсинин мүдири Әдаләт Әсҝәров она тәзјиг ҝөстәрир. Ханым директордан тәләб едир ки, Мирәләмлинин ҝуја, педагожи коллективдә хулиганлыг етдији һагда акт тәртиб етсин вә бундан сонра һәмин акт әсасында полис Тәзәхан Мирәләмлини һәбс едәҹәк.
Ортаја чыхан сүбута ҝәлинҹә, сөзүҝедән сәнәдин мүәллифи тәһсил назири Мисир Мәрдановдур. Сөһбәт назирин апрелин 6-да Ҹәлилабад Рајон Тәһсил Шөбәсинә 46252419/16 сајлы мәктубундан ҝедир. Һәмин мәктубу рајон тәһсил шөбәсинин мүдири “Јени Мүсават” гәзетинә тәгдим едиб. Мәктубда јазылыб: “Нәзәринизә чатдырырыг ки, 1970-ҹи илдә Ҹәлилабад рајонунда анадан олмуш, Фәрзили кәнд там орта мәктәбинин мүәллими, Азәрбајҹан Халг Ҹәбһәси Партијасынын үзвү Мирәләмли Тәзәхан Мәһәррәм оғлу 2 апрел 2011-ҹи илдә мүхалифәт гүввәләринин Бакы шәһәриндә тәшкил олунмуш иҹазәсиз митингиндә иштирак етдијинә ҝөрә һүгуг-мүһафизә органлары тәрәфиндән сахланылмышдыр. Бунунла әлагәдар һәмин мүәллимин дөвләтчилик әлејһинә јөнәлмиш ганунсуз һәрәкәтләрдән чәкиндирилмәси мәгсәдилә онун аиләси вә өзү илә мүвафиг сөһбәтләрин апарылмасы, ҝәләҹәкдә белә һалларын тәкрарланмамасы үчүн лазыми тәдбирләрин һәјата кечирилмәси, ҝөрүлмүш вә ҝөрүләҹәк ишләр барәдә 2 ҝүн әрзиндә назирлијин рәһбәрлијинә мәлумат верилмәси сизә тапшырылыр”.
Әслиндә, нормал дөвләтдә белә бир сәнәдин ортаја чыхмасы кифајәтдир ки, тәһсил назири сәссиз-сәмирсиз истефа вериб, ҝедиб гојунларыны отарсын. Анҹаг иш бурасындадыр ки, Мисир Мәрданов кими феодалы һеч бир нормал дөвләтдә назир гојмурлар, гојсалар белә, она биздә олдуғу кими 13 ил дөзмүрләр.
Өлкәнин тәһсилинә башчылыг едән инсанын тәфәккүрүнә, дүшүнҹә тәрзинә бахын: о, бир мүәллимин өз конститусион һүгугундан истифадә етмәсини “дөвләтчилик әлејһинә јөнәлмиш ганунсуз һәрәкәт” сајыр. Мисир Мәрданов ола биләр ки, Ҹинајәт Мәҹәлләсини билмәсин. Анҹаг онун вәзифә борҹудур ки, орта мәктәбдә тәдрис олунан “Конститусијанын әсаслары”ны өјрәнсин.
Тәзәхан Мирәләмли һансы ганунсуз һәрәкәтә јол вериб ки, ону һәтта Азәрбајҹанын “бујруггулу” мәһкәмәләри дә мүһакимә етмәјиб? Т.Мирәләмли динҹ аксијада иштирак етдији үчүн полисин амансыз ишҝәнҹәси илә гаршылашыб, ҝөзү, аз гала кор олмаг һәддинәдәк зәдәләниб.
Мүәллимлик һуманист пешәдир, Мисир мүәллимин савадыјла ишимиз јохдур, амма истәнилән һалда, инсани дујғулары зәдәләнән һәмкарыны мүдафиә етмәлијди. Анҹаг о, өзүнү жандарм кими апарыр. Адам дүшүнүр ки, ираг олсун, мәсәлән, Рамил Усубовун јериндә Мәрданов олсајды, јәгин ки, о, аксијачыларын шаггаланмасы барәдә сәрәнҹам верәрди.
Мисир Мәрдановун үзә чыхан бу мәктубуну Азәрбајҹанла әмәкдашлыг едән бејнәлхалг донор тәшкилатлар да диггәтлә охумалыдыр. Ким дә билмәсә, иҹтимаи фәаллар билир ки, Мисир мүәллимин “контору” дәрсликләрдә, педагожи коллективләрдә, сивил, демократик дәјәрләрин јајылмасы үчүн нә гәдәр аврону, доллары һәзм-рабедән кечирир.
Диггәт: Хәбәрдән истифадә етдикдә мәнбәјә истинад лазымдыр
