Әһли Бејт -АБНА- хәбәр аҝентлијинин вердији хәбәрә әсасән: Парламентин сон иҹласында депутат Гүдрәт Һәсәнгулијев Нахчыванда һакимијјәт бөлҝүсүнүн һәјата кечирилмәси үчүн конститутсија ислаһатларынын апарылмасыны тәклиф едиб.
“Конститусијаја ујғун олараг Нахчыванда һакимијјәт бөлҝүсү һәјата кечирилмәлидир. Нахчыван мухтар республикадыр, бу мухтар республиканын башчысы олмалыдыр вә онун сәлаһијјәтләри апараты олмалыдыр. Нахчыван Али Мәҹлиси исә ајрыҹа гурум кими фәалијјәт ҝөстәрмәлидир”,- дејә Гүдрәт Һәсәнгулијев билдириб.
Һәмкары Фазил Мустафа да онун фикирләрини дәстәкләјиб.
Һәр ики депутатын белә бир тәклифлә чыхыш етмәси бәзи мүлаһизәләрә јол ачыб. Илк олараг ағла һакимијјәтин Нахчываны сонракы мәрһәлә үчүн өзүнүнкүләшдирмәк нијјәтиндә олдуғу ҝәлир. Јәни, Азәрбајҹанда ингилаби просесләр баш верәҹәји тәгдирдә һакимијјәт Нахчывана сығынмаг үчүн Мухтар Республиканы тәдриҹән өлкәмиздән ајырмаг истәјир.
Лакин витсе-спикер Зијафәт Әсҝәровун Гүдрәт Һәсәнгулијевин тәклифини рәдд етмәси бу мәсәләдә сепаратизм мејлләринин олмадығыны ҝөстәрир. Әҝәр бу тәклиф Нахчываны Азәрбајҹандан ајырмаг үчүн ортаја атылсајды, онда парламентин ЈАП-чы тәркиби јекдилликлә Гүдрәт Һәсәнгулијеви дәстәкләјәрдиләр.
О һалда дүшүнмәк олар ки, бу тәклиф һакимијјәтдәки групларарасы мүбаризәдән доғуб. Һәм Гүдрәт Һәсәнгулијев, һәм дә Фазил Мустафа һакимијјәтдә ајры-ајры груплары тәмсил едир. Биринҹи фөвгәладә һаллар назири Кәмаләддин Һејдәрова, икинҹи исә Президент Администрасијасынын (ПА) рәһбәри Рамиз Меһдијевә јахын шәхс сајылыр. Кәмаләддин Һејдәровла Рамиз Меһдијев рәгиб олсалар да, онларын һәр икисинин Нахчыван МР али мәҹлисинин сәдри Васиф Талыбовла мүнасибәтләри хошаҝәлән дејил. Ејни заманда унутмаг лазым дејил ки, һәр үч шәхс һакимијјәтдәки “Нахчыван груплашмасы”нын ајры-ајры рәһбәрләри һесаб едилир. Јәни, “Нахчыван груплашмасы” бу шәхсләрин рәһбәрлији алтында 3 јерә бөлүнүб. Вә тәбии ки, Кәмаләддин Һејдәровла Рамиз Меһдијев Нахчывана да нәзарәт имканларыны артырмаг истәјирләр. Бунун үчүн исә “Васиф Талыбов манеәси” арадан галдырылмалыдыр.
Експертләр һесаб едир ки, бу тәклиф дә Васиф Талыбову Нахчыванын биринҹи шәхси статусундан мәһрум етмәк үчүн дүшүнүлә биләр. Онларын фикринҹә, конститусија ислаһатларына ҝедиләҹәји тәгдирдә биринҹи шәхс статусу Мухтар Республиканын баш назиринә кечәҹәк. Лакин експертләр дүшүнүр ки, әҝәр белә план варса, бунун баш тутаҹағы бир гәдәр инандырыҹы ҝөрүнмүр.
Диггәт: Хәбәрдән истифадә етдикдә мәнбәјә истинад лазымдыр
