Әһли Бејт -АБНА- хәбәр аҝентлијинин вердији хәбәрә әсасән: Түркијәнин Макина вә Кимја Сәнајеси Тәшкилатындан (МКЕК) билдирилиб ки, Азәрбајҹан мүһәндисләринин јаратдығы 12.7 мм чаплы «Истиглал» снајпер түфәнҝинин (ИСТ-12.7 Анти-Материал Рифле) бу илин сонларында Түркијәдә истеһсалына башлана биләр.
Бу ири чаплы снајпер түфәнҝинин бирҝә истеһсалына даир Түркијә вә Азәрбајҹан арасында өтән илин сонларында анлашма әлдә олунуб. Бу илин феврал ајында исә МКЕК-лә Азәрбајҹан Мүдафиә Сәнајеси Назирлији (МСН) арасында имзаланмыш мүгавиләдә бирҝә истеһсал әксини тапыб.
Бирҝә истеһсал олунаҹаг снајпер түфәнҝи Азәрбајҹанда һазырда сынаг тестләри кечирилән моделдән хејли фәргләнәҹәк. Силаһын дизајнында, чәкисиндә вә бәзи системләриндә әһәмијјәтли дәјишикликләр едиләҹәк. Һазырда бунунла бағлы тәдгигатлар апарылыр, ејни заманда технолоҝијанын трансфери һәјата кечирилир.
Силаһын Түркијәдә истеһсал едиләҹәк моделинин һәм Түркијә Силаһлы Гүввәләринин силаһланмасына верилмәси, һәм дә МКЕК-МСН әмәкдашлығы чәрчивәсиндә диҝәр НАТО өлкәләринә вә хариҹи базарлара бирҝә чыхарылмасы нәзәрдә тутулур.
ИСТ-12.7 снајпер түфәнҝинин Түркијәдә истеһсалы Азәрбајҹанын илк һәрби-техноложи трансферидир.
Гејд едәк ки, һазырда Азәрбајҹан «Истиглал» снајперинин 14.5 чаплы версијасынын истеһсалыны да һәјата кечирир.
ИСТ-12.7 түфәнҝи 12.7х108 мм чаплы ҝүлләләрдән атәш ачыр. Чәкиси 16 кг олан силаһ өзүнү долдурма габилијјәтинә маликдир вә 2000 метр мәсафәдәки һәдәфләрә гаршы еффектив тәтбиг олуна билир.
Диггәт: Хәбәрдән истифадә етдикдә мәнбәјә истинад лазымдыр
