Әһли Бејт -АБНА- хәбәр аҝентлијинин вердији хәбәрә әсасән: Јасамал Рајон Мәһкәмәсинә үнванланан шикајәтдә ҝөстәрилир ки, мүхалиф Иҹтимаи Палатанын 17 апрел митингиндә бир груп шәхсин тутулараг Јасамал Рајон Полис Идарәсинә ҝәтирилмәси вә онларын пис рәфтара мәруз галмалары илә бағлы мәлумат алараг һәмин ҝүн тәхминән саат 21 радәләриндә идарәнин гаршысына ҝәлибләр. Һәмин вахт орада тутуланларын аилә үзвләри вә достлары јығышыблармыш.
Ј.Иманов тутуланлардан Дәјанәт Бабајевин һүгугларынын мүдафиәсини һәјата кечирмәк вә онунла ҝөрүшмәк мәгсәдилә вәкил ордерини Јасамал Рајон Полис Идарәсинә тәгдим едиб. Әввәлҹә Ј.Иманова билдирилиб ки, Јасамал Рајон Полис Идарәсиндә һеч кәс сахланылмыр. Лакин Ј.Иманов тутуланларын һәмин идарәјә ҝәтирилдијини ора топланан аилә үзвләринин вә достларынын ҝөрдүјүнү вә вәкилә ҝөрүш верилмәсиндән имтинанын полис идарәсинин гапысында дајанан әмәкдаша дејил, буна сәлаһијјәти олан шәхсә мәхсус олдуғуну билдириб. Лакин полис ишчиләри она ҝөрүш имканы вермәјибләр.
Бир гәдәр ҝөзләдикдән сонра шикајәтчиләрә вә полис идарәсинин гаршысында дајанан шәхсләрә дағылышмаг ҝөстәриши верилиб. Буну Бакы Шәһәр Баш Полис Идарәсинин рәис мүавини ҝенерал-мајор Јашар Әлијевин полис идарәсиндән чыхаҹағы илә әлагәләндирибләр.
Бир нечә дәгигәдән сонра Ј.Әлијев полис идарәсиндән чыхыб. О, И.Әлијеви вә Ј.Иманову ҝөстәриб әтрафындакы полис ишчиләриндән һирслә сорушуб: “Бунлар кимдир?” Вәкилләр олдуғуну билдирәндә “Бунлары бура ким дәвәт едиб? Тутуланлар вәкилдән имтина едибләр!” дејә аҹыгланыб. Бу заман И.Әлијев она дејиб ки, вәкилләр мүгавилә бағлајыблар вә мүдафиә етдији шәхсләрлә ҝөрүшмәк истәјирләр, онлары полис идарәсинә бурахмырлар. Ј.Әлијев И.Әлијевдән јүксәк тонла “Сән кимсән?” сорушуб. И.Әлијев она һүгугшүнас олдуғуну, тутуланлар барәдә мәлумат алмаг истәдијини, вәкилләрин ганунсуз олараг полис идарәсинә бурахылмадыгларыны билдириб вә инсанлара “сән” јох, “сиз” дејә мүраҹиәт етмәли олдуғуну Ј.Әлијевин диггәтинә чатдырыб. И.Әлијевин бу ҹавабындан гәзәбләнән Ј.Әлијев әтрафдакы полисләрә “Бунлары бурадан узаглашдырын!” ҝөстәриши вериб вә тәһгирамиз ифадәләр ишләдиб. Полис ишчиләри И.Әлијеви вә Ј.Иманову кобуд шәкилдә, итәләјә-итәләјә идарәнин гаршысындан узаглашдырыблар.
Ј.Әлијев ҝетдикдән сонра Ј.Иманов тәкрар олараг идарәнин ҝириш гапысында дајанан полисләрә јахынлашыб ичәри бурахылмасыны тәләб едиб. Тәхминән ҝеҹә 1-ә ишләмишә гәдәр И.Әлијев вә Ј.Иманов полис идарәсинин гаршысында вәкилин нә вахт идарәјә бурахылаҹағыны ҝөзләсәләр дә, гапыда дајанан полис ишчиләри она бу имканы вермәкдән имтина едибләр.
Ј.Имановун полис идарәсинә онун вә мүдафиә етдији шәхсин һүгугларынын позунтусу илә бағлы шикајәти рәсми гајдада тәгдим етмәк истәји дә баш тутмајыб. Полисләр шикајәтин бир нүсхәсинә гәбул едилмәси барәдә гејд етмәк истәмәјибләр. Гапыда дајанан полис ишчиси шикајәтин гәбулу барәдә һәр һансы гејд едилмәсинә еһтијаҹ олмадығыны, ону гутуја атмағын кифајәт етдијини билдириб. Сонда о, Ј.Имановдан шикајәти алыб ҝиришдәки ағзыачыг гутуја гојуб, бу барәдә Ј.Иманова һәр һансы сәнәд вермәјиб, шикајәтин икинҹи нүсхәсинин үзәриндә гејд етмәјиб.
Һүгугшүнасларын полисин һәрәкәтләрииндән Јасамал Рајон Прокурорлуғуна шикајәт тәгдим етмәк ҹәһди дә баш тутмајыб. Һәмин гурумда онлара билдирибләр ки, бу ҹүр шикајәтләри гәбул етмәли олан нөвбәтчи прокурор јериндә јохдур.
Јасамал Рајон Мәһкәмәсинә үз тутан һүгугшүнаслар ҹавабдеһләрин онлара гаршы физики зор тәтбиг етмәләрини онларын инсан ләјагәтинә алчалдан рәфтара мәруз галмамаг һүгугунун позунтусу кими, Ј.Иманова өз вәзифәләрини һәјата кечирмәсинә мане олмаларыны онун пешә фәалијјәтинә әсассыз мүдахилә кими гијмәтләндирилмәсини, ҹавабдеһләрин үзәринә шикајәтчиләрдән үзр истәмәк вәзифәсинин гојулмасыны, ганунсуз һәрәкәтләри нәтиҹәсиндә шикајәтчиләрә вурулан зијанын әвәзи кими ҹавабдеһләрдән 1 манат тутулмасы барәдә гәтнамә чыхарылмасыны истәјирләр.
Диггәт: Хәбәрдән истифадә етдикдә мәнбәјә истинад лазымдыр
