Әһли Бејт -АБНА- хәбәр аҝентлијинин вердији хәбәрә әсасән: Етираз едәнләр һәбс едилән Һаҹы Зүлфүгар Микајылзадә, Һаҹы Мөвсүм Сәмәдов вә диҝәр һәбс едилән руһаниләрин шәкилләрини әлләриндә тутублар. Онлар "мәмур өзбашынлығна сон!", "нефт халгындыр", "һиҹаб мәһбусларына азадлыг!" вә.с шүарлар сәсләндирибләр.
Санкт-Петербург шәһәриндә јашајан азәрбајҹанлыларын һиҹаб гадағасына етираз аксијасында гәбул едилмиш бәјанаты сизләрә тәгдим едирик:
"Әзиз һәмвәтәнләр,һөрмәтли аксија иштиракчылары! Биз Русијада јашајан азәрбајҹанлылар вәтәндән узагда олмағымыза бахмајараг үрәјимиз даима вәтән ешги илә чырпыныр. Һәр биримиз вәтәни бөјүк мәһәббәтлә севир ону азад вә хошбәхт ҝөрмәк истәјирик. Елә буна ҝөрә өлкәмиздә баш верән һадисәләри һәр ан изләјирик. Бизи вәтәнә бағлајан амилләрдән бири дә мүгәддәс динимиздир. Амма сон вахтлар өлкәмиздән динимизлә бағлы пис хәбәрләр ешидирик. Јашадығымыз ҝүнләр динимиз үчүн чох ағрылы-аҹылы ҝүнләрдир.
Доғма вәтәнимиз олан Азәрбајҹанда динимизә гаршы һәр ҝүн јени-јени гадағалар тәтбиг едилир. Азанын сәсинә гадаға гојулур, мәсҹидләр учурулур, һиҹаблы гадынлар ишә ҝөтүрүлмүр вә бәзи шәһәрләрдә јенијетмәләр мәсҹидә бурахылмырлар. Бу хәбәрләр ичәрисиндә ән дәһшәтлиси тәһсил назиринин конститусијамыза зидд олан јени тәһсил гануну барәсиндәки гәрарыдыр. Назирин бу гәрары республикамызда ҹидди бөһран јаратмышдыр. Чүнки бу гануна әсасән мәктәбли гызлар башыбағлы формада-јәни һиҹаблы шәкилдә мәктәбә ҝедә билмирләр. Назирин бу гәрәры артыг нечә ајдыр ки, мәктәб директорлары тәрәфиндән һәјата кечирилир вә һиҹаблы гызлар дәрсләрә бурахылмырлар. Бунун ардынҹа өлкәмизин инанҹлы вәтәндашлары тәһсил назирлијинин гаршысында, республикамызын бир чох рајонларында вә һәтта өлкәмизин һүдудларындан кәнарда етираз аксијалары кечирәрәк һөкумәт даирәләриндән конститусијамыза зидд олан бу ганунун ләғв едилмәсини тәләб етдиләр.
Лакин бу ҝүнә гәдәр бу тәләбләрә әһәмијјәт верилмәмишдир. Әксинә етираз едәнләр һәбс едилир вә ишкәнҹәләрә мәруз галырлар. Хүсусән республикамызын һөрмәтли руһаниләри башда олмагла инанҹлы вәтәндашлар мүхтәлиф ҝүлүнҹ иттиһамларла гејри-гануни һәбс едилиб мәһкәмәјә верилирләр. Артыг үч ајдыр ки, Ислам Партијасынын сәдри Һаҹы Мөвсүм Сәмәдов, Гуран һафизи Һаҹы Зүлфүгар Микајылов башда олмагла бир чох нуфузлу руһаниләр, тәләбәләр вә фәал диндарлар һәбс едилибләр. Онларын гануни һүгугларына риајәт едилмир. Һәбс едиләнләр дөвләтә гаршы ҹинајәтдә иттиһам едилирләр. Бу инсанлары таныјанлар јахшы билир ки,бу шәхсијјәтләр вәтәни, халгы јолунда ҹанындан кечән оғуллардандыр. Һамы билир ки, бу һәбсләр сифаришлидир. Бүтүн бунлар өлкәмиздә ҝәрҝин дурум јаратмышдыр.
Бу дурум әһалиси мүсәлман олан истәр өлкә дахилиндә истәрсә дә хариҹдә јашајан һәр бир азәрбајҹанлыны бәрк нараһат едир. Өлкәмизин 20 фаиз әразиси ишғал алтында,бир милјондан чох вәтәндашымызын мәҹбури көчкүн шәраитиндә јашадығы,һәмчинин мәмур өзбашыналығы, инһисарчылыг, рүшвәтхорлуг вә бизнес үзәриндә олан полад нәзарәт кими сүни игтисади проблемләр үзүндән милјонларла сојдашымызын чөрәк пулу газанмагдан өтрү гоншу өлкәләрә һиҹрәт етдији бир вәзијјәтдә јени-јени ҝәрҝинликләр јаратмаға һеч бир лүзум јохдур. Бизим мәгсәдимиз ҝәрҝин дуруму даһа да ҝәрҝинләшдирмәк дејил. Һиҹаб гадағасы арадан галдырылмалы вә һиҹаб гадағасы мәһбуслары азадлыға чыхмалыдыр. Чүнки мәктәбли гызлара гаршы тәтбиг едилән һиҹаб гадағасы Конститутијамызын 42-ҹи маддәсиндә гејд олунан азад тәһсил алма һүгугуна вә 48-ҹи маддәсиндә ҝөстәрилән виҹдан азадлығына зиддир.
48-ҹи маддәдә дејилир:
“Һәр кәсин виҹдан азадлығы вардыр. Һәр кәсин динә мүнасибәтини мүстәгил мүәјјәнләшдирмәк,һәр һансы динә тәкбашына вә ја башгалары илә бирликдә етигад етмәк,јахуд һеч бир динә етигад етмәмәк,динә мүнасибәтилә бағлы әгидәсини ифадә етмәк вә јајмаг һүгугу вардыр!”
Ҝөрүндүјү кими өлкәмизин ганунларында һиҹаб гадағасы үчүн һәтта бәһанә јери јохдур. Бундан әлавә һиҹаб Ислам мәдәнијјәтинин ајрылмаз бир һиссәсидир. Халгымызын Ислами дәјәрләринин 1400 иллик көкләри вардыр. Азәрбајҹан халгы Ислам динини гәбул едән ҝүндән бу динин мәдәнијјәти илә јашамыш, бу мәдәнијјәти јашатмышдыр. Ата-бабаларымыз өз ганлары баһасына әманәт кими бу мәдәнијјәти горујуб бизә чатдырмышдыр. Бизә дә ваҹибдир ки, бу әманәти горујуб ҝәләҹәк нәсилләрә чатдыраг. Бүтүн бунлары нәзәрә алараг биз Санкт-Петербург шәһәриндә јашајан азәрбајҹанлылар Азәрбајҹан республикасынын рәһбәрлијиндән тәләб едирик:
1)Әһалиси мүсәлман олан Азәрбајҹан республикасында орта мәктәбләрдә башөртүјү гадағасы мәнсуб олдуғумуз Ислам дининин зәрури ганунунун кобуд шәкилдә позулмасыдыр. Буна ҝөрә сиздән мәнсуб олдуғумуз Ислам дининин ганунларына һөрмәт вә риајәт етмәјинизи тәләб едирик.
2)Гызларын баш өртмәси улу нәнәләримизин бизә јадиҝар гојдуғу исмәт-һәја әманәти олмагла јанашы һәм дә улу бабаларымызын горудуғу вә ондан өтрү ҹан вердији намус-гејрәт символудур. Сиздән бу милли-мәнәви дәјәримизә һөрмәт етмәји вә ону јашатмағы тәләб едирик.
3)Орта мәктәбләрдә башөртүјү гадағасы һәм Азәрбајҹан республикасынын конститусијасына вә һәм дә дүнјадакы инсан һагларына зиддир. Сиздән һәм конститусијамыза вә һәм дә инсан һагларына әмәл етмәји вә ону позмамағы тәләб едирик.
4)Демократија принсипләри әсасында идарә олунан өлкәмиздә өз фикирләрини азад сөјләмәк һүгугуна малик олан вә халгын һөрмәт етдији руһаниләрин, ҝүнаһсыз инсанларын ҝүлүнҹ вә јарашмајан иттиһамларла ҹинајәткар кими һәбс едилмәсини писләјир вә сиздән онларын тез бир заманда азад едилмәсини тәләб едирик."
Диггәт: Хәбәрдән истифадә етдикдә мәнбәјә истинад лазымдыр.
