Әһли Бејт -АБНА- хәбәр аҝентлијинин вердији хәбәрә әсасән: Бенгази вә Дерне шәһәрләриндәки етираз аксијалары заманы бәзи түрк фирмаларына мәхсус иншаат саһәләри вә иш јерләринин талан едилмәси һаллары Түркијәдә нараһатлыгла гаршыланыб.
Түркијә һөкүмәти јанында фәалијјәт ҝөстәрән Фөвгәладә Һаллар Идарәсинин јајдығы мәлумата ҝөрә, Түрк Һава Јолларынын Истанбул-Бенгази-Истанбул сәфәрини јеринә јетирән тәјјарәсинә әлавә олараг Ливијадакы Түркијә вәтәндашларынын вәтәнә ҝәтирилмәси үчүн һәмин өлкәјә даһа 2 тәјјарә ҝөндәрилиб.
3 тәјјарә илә үмумиликдә 670 Түркијә вәтәндашынын Истанбула ҝәтирилмәси планлашдырылыр.
Түркијәнин дөвләт назири Зәфәр Чағлајан билдириб ки, Ливијанын Бенгази вә Дерне шәһәрләриндә өлкә рәһбәрлији әлејһинә кечирилән етираз аксијалары заманы бир нечә түрк фирмасынын иншаат саһәләри вә иш јерләриндә талан һадисәләри гејдә алыныб.
Һәмин иш јерләринә ҹидди зијан дәјиб.
Хариҹи ишләр назири Аһмет Давутоғлу исә билдириб ки, Анкара Ливијадакы дипломатик миссијалары васитәси илә бу өлкәдәки һадисәләри диггәтлә изләјир.
Ливија илә Түркијә арасында узун тарихә малик достлуг әлагәләри олдуғуну хатырладан Давутоғлу бу өлкәдә тәһлүкәсизлик вә әмин-аманлығын олмасынын Түркијә үчүн бөјүк әһәмијјәт кәсб етдијини вурғулајыб.
Түркијәнин хариҹи сијасәт идарәсинин башчысы үмумијјәтлә Јахын Шәргдә сон һәфтәләр әрзиндә баш верән һадисәләрлә бағлы үмидвар олдуғуну билдириб ки, бөлҝә халгларынын истәкләри нәзәрә алынаҹаг вә кечид просеси реҝионда хаосла нәтиҹәләнмәјәҹәк.
“Түркијә тәҹрүбәси бәзи Әрәб мүшаһидәчиләри тәрәфиндән уғурлу бир модел кими гәбул едилир.
Әҝәр бу модел гардаш өлкәләр үчүн нүмунә тәшкил едәрсә, биз өз төһфәмизи вермәјә шад оларыг. Амма һәр бир өлкәнин өз хүсусијјәтләри вар”, о билдириб.
Диггәт: Хәбәрдән истифадә етдикдә мәнбәјә истинад лазымдыр.
